Read new_tumbuka_bible 1 Samuele 22 Bible Online

1 Samuele 22 - new_tumbuka_bible bible

1 Samuele 22

¹Davide wakafumako ku msumba wa Gati ndipo wakachimbilirira ku mphanji ya Adulamu. Para ŵabali ŵakhe na wose ŵa mu nyumba ya kwawo ŵakapulika, ŵakaruta kwenekura.

²Wose awo ŵakakweŵekanga mu mtima, awo ŵakaŵa na matewu na awo ŵakaŵa ŵambula kukhorweskeka mu vinthu vinyakhe, ŵakiza na kuwungana kwa Davide ndipo iyo wakazgoka kuŵa murongozgi wawo. Ŵanthu wose ŵara ŵakaŵa 400.

³Davide wakafumako ku Adulamu ndipo wakaruta ku Mizipe mu charu cha Mowabu. Wakaromba karonga wa ku Mowabu kuti, “Nkhumuŵeyani, zomerezgani kuti ŵadada na ŵamama ŵize kuti ŵazakakhare kuno ndisuke ndimanye icho Chiuta wati wandichitirenge.”

⁴Ntheura wakiza nawo kwa karonga wa charu cha Mowabu kuti wakharenge na iyo nyengo yose iyo Davide wakaŵira mu linga.

⁵Ndipo nchimi zina lakhe Gadi yikamuphalira Davide kuti, “Ureke kukhara mu linga, ufumeko ndipo urute ku charu cha Yuda. Ntheura Davide wakufumapo na kuruta ku nkhorongo ya ku Hereti.”

⁶Sauli wakapulika kuti Davide pamoza na ŵanthu ŵakhe ŵasangika pamoza na awo ŵakaŵa nawo. Sono iyo Sauli wakakharanga mu msumba wa Gibeya musi mwa khuni la mtaŵa pa malo ghakukwera uku wakorera mukondo wakhe ndipo nduna zakhe zose zikimilira kumuzingirizga iyo.

⁷Iyo wakati kwa izo, “Pulikani sono imwe ŵaBenjamini, kasi mwana wa Yese wangamupani mose imwe minda yakuti mulimengepo mpheska? Kasi wangamuzgorani mose imwe kuŵa ŵarongozgi ŵa ŵasilikari chikwi chimoza panji 100?

⁸Asi ichi ndicho chifukwa mose imwe mukundiwukira ine? Palije na yumoza wa imwe uyo wali kundiphalirapo kuti mwana wane wachita phangano na Davide mwana wa Yese? Palije na yumoza wa imwe uyo wali na chitima na ine panji kundiphalirapo kuti mwana wane ndiyo wawuska mtima wa muteŵeti wane Davide kuti wandiwukire na kundikhazga kuti wandikome nga ndi umo wakuchitira muhanya uno.”

⁹Doyegi wa fuko la Edomu mweneuyo wakimilira pamoza na nduna za Sauli wakati, “Ine nkhamuwona Davide, wakiza kwa musofi Ahimeleki mwana wa Ahitubu ku Nobu.

¹⁰Musofi Ahimeleki wakafumba kwa FUMU ivyo Davide wakwenera kuchita. Wakamupa chakurya ndiposo na lupanga lwa Goliyati mu Filisiti yura.”

¹¹Penepapo Karonga Sauli wakatuma ŵanthu kuti wakamucheme musofi Ahimeleki mwana wa Ahitubu na ŵa mu nyumba ya wiske wose awo nawo ŵakaŵa ŵasofi ku Nobu. Ndipo nadi wose ŵakiza kwa karonga.

¹²Sauli wakati, “Pulika sono iwe mwana wa Ahitubu. Ahimeleki wakazgora wakati, ‘Nkhupulika sekuru wane.’ ”

¹³Sauli wakati kwa iyo, Kasi nchifukwa uli wandiwukira ine iwe na Davide mwana wa Yese? Iwe wamupa Davide chakurya na lupanga ndipo wamufumbira kwa Chiuta. Muhanya uno wandiwukira ine ndipo wakundikhazga kuti wandikome.

¹⁴Ntheura Ahimeleki wakamuzgora karonga wakati, “Kasi ndi njani mukati mwa nduna zinu za nkhondo uyo ngwa kugomezgeka nga ndi Davide? Davide ndi mukweni winu. Iyo ndi murongozgi wa ŵasilikari awo ŵakuvikirira umoyo winu ndiposo Davide ngwa kuchindikika chomene mu nyumba yinu?

¹⁵Zuŵa lira kuti likaŵa lakwamba chara kuti ine ndimufumbire kwa Chiuta. Ndipo imwe karonga mureke kundipa mrandu ine nda muteŵeti winu nanga mpha mbumba yose ya ŵadada pakuti ine nda muteŵeti winu kuti nkhumanyapo kanthu na kamoza chara, kakuru panji kachoko.”

¹⁶Karonga Sauli wakati, “Iwe Ahimeleki na nyumba yose ya ŵawuso muti mufwenge nadi.”

¹⁷Ntheura karonga wakalangula ŵasilikari awo ŵakimilira na kumuzingirizga wakati, “Komani ŵasofi ŵa FUMU aŵa pakuti ŵali pamoza na Davide. Iwo ŵakamanya kuti wakuchimbira, kweni wakandiphalirapo chara.” Kweni ŵasilikari ŵa karonga kuti ŵakakhumba chara kukoma ŵasofi ŵa FUMU.

¹⁸Penepapo karonga wakalangula Doyegi, wa fuko la Edomu kuti, “Koma ŵasofi awo.” Ntheura Doyegi wakaruta na kukoma ŵasofi ŵara. Pa zuŵa lira wakakoma ŵasofi 85 awo ŵakavwara malaya gha efodi gha bafuta.

¹⁹Sauli wakakoma ŵanthu wose ŵa mu Nobu, msumba wa ŵasofi. Ntheura wakakoma ŵanarume na ŵanakazi, ŵana na ŵabonda, ng'ombe, mbunda, ndiposo na mberere.

²⁰Kweni Abiyatara mwana wa Ahimeleki, muzukuru wa Ahitubu ndiyo wakathaskikapo pakuti wakachimbira na kurondezga Davide.

²¹Abiyatara wakamuphalira Davide kuti Sauli wakoma ŵasofi ŵa FUMU.

²²Penepapo Davide wakati kwa Abiyatara, “Kufuma zuŵa lenelira para Doyegi wa fuko la Edomu wakaŵa kwenekura, nkhamanya kuti wamkuphara kwa Sauli. Ndine ndaŵazigha ŵanthu wose aŵa ŵa mu nyumba ya ŵawuso kuti wafwe.

²³Sono iwe kharanga na ine ndipo ureke kopa, pakuti munthu uyo wakupenja umoyo wako wakupenja na umoyo wane wuwo. Kweni iwe pakukhara na ine, uti usungikenge makora.”