Read new_tumbuka_bible 1 Samuele 23 Bible Online

1 Samuele 23 - new_tumbuka_bible bible

1 Samuele 23

¹Ŵanthu ŵakamuphalira Davide kuti ŵaFilisiti ŵakurwa nkhondo na ŵanthu ŵa msumba wa Keyila ndipo ŵakuskogha vyakurya ivyo vili pa luwugha.

²Ntheura Davide wakafumba kwa FUMU kuti wamanye icho wangachita ndipo wakati, “Kasi ndingaruta kuti nkharwe nkhondo na ŵaFilisiti?” FUMU yikazgora yikati, “Rutanga, ukarwe nkhondo na ŵaFilisiti na kuthaska msumba wa Keyila.”

³Kweni ŵasilikari ŵa Davide wakati kwa iyo, “Ise tikukhalira mu wofi kuno ku Yuda, sono kasi kuŵenge uli usange tikuruta ku Keyila kuti tikarwe nkhondo na ŵaFilisiti.”

⁴Ntheura Davide wakafumbaso kwa FUMU ndipo FUMU yikamuzgora yikati, “Rutaninge mukarwe nkhondo ku msumba wa Keyila pakuti nditi ndiperekenge ŵaFilisiti mu mawoko ghinu.”

⁵Ntheura Davide na ŵasilikari ŵakhe ŵakaruta ku msumba wa Keyila na kurwa nkhondo chomene na ŵaFilisiti. Ŵakakoma ŵaFilisiti ŵanandi ndipo ŵakatora viŵeto vyawo vyose na kuthaska ŵanthu ŵa msumba wa Keyila.

⁶Para Abiyatara mwana wa Ahimeleki wakachimbilira kwa Davide ku Keyila wakayegha laya lakhe la bafuta la efodi.

⁷Ŵanthu ŵakamuphalira Sauli kuti Davide wali ku Keyila, ndipo Sauli wakati, “Chiuta wamupereka Davide mu mawoko ghane pakuti wajijalira yekha pakunjira mu muzi wa Keyila uwo uli na vipata na mphingirizgo.”

⁸Penepapo Sauli wakachema ŵasilikari ŵakhe wose kuti ŵarwe nkhondo pakuruta ku msumba wa Keyila kuti wakamuzingirizge Davide na ŵasilikari ŵakhe.

⁹Para Davide wakamanya kuti Sauli wakanozgekeranga kumuchitira chinthu chiheni, wakati kwa musofi Abiyatara, “Zanalo kwa ine laya lako la bafuta la efodi.”

¹⁰Penepapo Davide wakaromba kwa FUMU wakati, “Mwe FUMU, Chiuta wa Israele muteŵeti winu wapulika kuti Sauli wakukhumba kwiza kuno ku Keyila kwiza kabwangandula msumba chifukwa cha muteŵeti winu.

¹¹Kasi ŵanthu ŵa mu msumba wa Keyila wandiperekenge kwa iyo? Kasi Sauli wizenge nadi nga ndi umo muteŵeti winu wapulikira? Mwe FUMU, Chiuta wa Israele. Muphalirani muteŵeti winu.” FUMU yikazgora yikati, “Sauli wati wizenge nadi.”

¹²Davide wakafumbaso wakati, “Kasi ŵanthu ŵa msumba wa Keyila wandiperekenge ine na ŵasilikari ŵane kwa Sauli.” FUMU yikazgora yikati, “Ŵati ŵamuperekani nadi.”

¹³Ntheura Davide na ŵasilikari ŵakhe awo ŵakaŵa pakunji 600 ŵakafumamo mu msumba wa Keyila na kuruta ku malo ghakupambanapambana. Para ŵanthu ŵakamuphalira Sauli kuti Davide wafumamo mu msumba wa Keyila, kuti ŵakarutako ku Keyila chara.

¹⁴Davide wakakharanga na kubisama mu zimphanji mu charu cha mapiri cha mapopa gha Zifu. Nyengo na nyengo, Sauli wakamupenjanga Davide kweni Chiuta kuti wakamupereka Davide mu mawoko gha Sauli chara.

¹⁵Apo Davide wakaŵa ku Horeshi mu mapopa gha Zifu, wakapulika kuti Sauli wiza kuti wamukome.

¹⁶Ndipo Yonatani mwana wa Sauli wakawuka na kuruta ku Horeshi uko kukaŵa Davide kuti wamukhwimiska mtima mwakuti wasange nkhongono mwa Chiuta.

¹⁷Iyo wakati, “Ungopanga, pakuti ŵadada kuti ŵakukhwaskenge chara. Iwe uti uŵenge karonga wa Israele yose ndipo ine nditi ndiŵenge wa chiŵiri kwa iwe. Ŵadada nawo ŵakuchimanya.”

¹⁸Ntheura wose ŵaŵiri ŵakachita phangano la kutemwana yumoza na munyakhe panthazi pa FUMU. Ndipo Yonatani wakaruta ku nyumba kwakhe kweni Davide wakakhara kwenekura ku Horeshi.

¹⁹Penepapo ŵanthu ŵa ku Zifu ŵakaruta kwa Sauli ku Gibeya na kuti kwa iyo, “Davide wakubisama kwa ise mu zimphanji za Horeshi pa Phiri la Hakila cha ku mwera kwa Yeshimoni ku Yudeya.

²⁰Sono imwe karonga usange mukukhumba kwiza ku charu chithu mwize. Ise ndise tizamupereka kwa imwe mwe karonga.”

²¹Sauli wakati, “FUMU yimutumbikani pakuti mwaŵa ŵa chiwuravi kwa ine.

²²Rutani kuti mukapanikizgepo ndipo mukayawone malo ghakhe apo wakubisamapo ndipo ndi njani wamuwona ku malo gheneghara, pakuti ndapulika kuti ndi muryarya chomene.

²³Ntheura rutani mukawone na kumanya malo ghose agho wakubisamamo ndipo mukizeso kwa ine kuti mwizakandiphalire makani ghenecho. Ndipo ine ndizamkuruta pamoza na imwe ndipo usange wali ku malo gheneghara tamkumupenja chomene mukati mu vikwi vyose vya ŵanthu ŵa ku Yuda.”

²⁴Ntheura ŵanthu ŵara ŵakawuka na kuwerera ku Zifu, kudangirako pambere Sauli wandarute. Panyengo iyi Davide na ŵasilikari ŵakhe ŵakaŵa ku mapopa gha Mawoni ku Araba cha ku mwera kwa Yeshimoni.

²⁵Sauli na ŵasilikari ŵakhe ŵakamba kumupenja Davide. Kweni para Davide wakapulika kuti wakupenjeka, wakaruta ku jarawe ilo yili mu mapopa gha Mawoni. Para Sauli wakapulika kuti Davide wachimbilira ku mapopa gha Mawoni wakamurondezga kwenekura.

²⁶Sauli wakendanga dera linyakhe la phiri ndipo Davide na ŵasilikari ŵakhe ŵakendanga dera linyakhe la phiri. Kweni wakendeska luŵiro kuti wamuchimbira Sauli apo Sauli na ŵasilikari ŵakhe ŵakaŵa pafupi kuŵakora.

²⁷Penepapo nthumi yikiza kwa Sauli ndipo yikati, “Mwize luŵiro pakuti ŵasilikari ŵa ŵaFilisiti ŵanjira mu charu.”

²⁸Ntheura wakareka kurondezga Davide ndipo wakaruta kuti wakarwe nkhondo na ŵaFilisiti. Ichi ndicho chifukwa malo ghara ghakachemeka kuti, “Jarawe Lakurekana.”

²⁹Davide wakafumako kwenekura ndipo wakaruta na kuya kakhara ku mphanji za Engedi.