Read new_tumbuka_bible 1 Samuele 27 Bible Online

1 Samuele 27 - new_tumbuka_bible bible

1 Samuele 27

¹Davide wakaghanaghananga mu mtima wakhe kuti, “Zuŵa limoza Karonga Sauli wati wandikomenge. Chinthu chiweme icho ndingachitapo ndikuchimbilira ku charu cha ŵaFilisiti. Apo ndipo Sauli wangareka kundipenja mu charu cha Israele ndipo ndithaskike kwa iyo.”

²Ntheura Davide na ŵasilikari ŵakhe ŵakukwana 600 awo wakaŵa nawo ŵakambukira kwa Karonga Akishi mwana wa Mawoki wa ku msumba wa Gati.

³Davide na ŵasilikari ŵakhe ŵakazenga mwenemura mu Gati pamoza na Karonga Akishi. Musilikari waliyose wakaŵa na mbumba yakhe ndipo Davide nayo wakaŵa na ŵawoli ŵakhe ŵaŵiri Ahinowamu wa ku Yezireyele na Abigelu wa ku Karimele, chokoro cha Nabala.

⁴Para Sauli wakapulika kuti Davide wali ku Gati, wakareka na kumupenja wuwo.

⁵Pamanyuma Davide wakati kwa Akishi, “Usange ndasanga uchizi pa maso pinu, mundipeko malo ghakuti ndizengepo mu msumba umoza wa mu charu mwakuti ndimo ndikharenge. Nchifukwa uli ine nda muteŵeti winu ndikharenge namwe mu msumba pamoza na karonga?”

⁶Ntheura mu zuŵa lira Karonga Akishi wakapereka kwa Davide msumba wa Zikilagi ndipo mpaka sono msumba uwu ukazgoka kuŵa charu cha ufumu wa Yuda.

⁷Davide wakakhara mu charu cha ŵaFilisiti chirimika chimoza na myezi yinayi.

⁸Pa nyengo yose iyi, Davide na ŵasilikari ŵakhe ŵakarutanga kuya karwa nkhondo na ŵaGeshuru, ŵaGerizi na ŵaAmaleki. Aŵa ndiwo ŵakaŵa ŵenecharu ichi kufuma papo kale. Charu chawo chikafumira ku Shuru kuya kafika ku mphaka za charu cha Eguputo.

⁹Nyengo yose apo Davide wakafikanga pa chigaŵa kuti warwe nkhondo, kuti wakarekangapo mwanarume panji mwanakazi kuŵa na umoyo chara. Kweni wakatorangapo mberere na mbuzi, ng'ombe mbunda na ngamila ndiposo na vyakuvwara. Pamanyuma wakaweranga na kwiza navyo kwa Akishi.

¹⁰Para Akishi wakamufumba Davide kuti, “Kasi muhanya uno mwakarwanga na njani?” Davide wakazgoranga kuti, “Tikarwanga na ŵanthu ŵa chigaŵa cha mapopa cha charu Yuda. Ndipo nyengo yinyakhe wakazgoranga kuti, ‘Tikarwanga na ŵanthu ŵa chigaŵa cha ku mwera kwa ŵaYerameyele, panji ŵanthu ŵa chigaŵa cha ku mwera kwa ŵaKeni.’ ”

¹¹Davide kuti wakarekangapo mwanarume panji mwanakazi kuŵa wa moyo chara kopa kuti wangiza kayowoya kuti ŵanthu ŵa ku Gati kuti, “Davide wali kuchita ivi na ivi kwa ise.” Davide wakachitanga vyeneivi nyengo yose umo wakakhalira mu charu cha ŵaFilisiti.

¹²Akishi wakamugomezga chomene Davide ndipo wakati kwa iyomwene, “Davide wazgoka munthu wakuseruska chomene na ŵanthu ŵa ku kwakhe ŵaIsraele, kweni kwa ine wati waŵenge muteŵeti wane kwa muyirayira.”