Read new_tumbuka_bible 1 Samuele 28 Bible Online

1 Samuele 28 - new_tumbuka_bible bible

1 Samuele 28

¹Zuŵa limoza ŵaFilisiti ŵakawungana ŵasilikari ŵawo kuti ŵarwe nkhondo na ŵaIsraele. Ntheura Akishi wakati kwa Davide, “Ukwenera kumanya kuti iwe na ŵasilikari ŵako tikwenera kuŵa pamoza pakurwa nkhondo iyi.”

²Davide wakazgora kuti, “Nchiweme chomene, ndipo muti muwone icho ine muteŵeti winu nditi ndichite.” Akishi wakati kwa Davide, “Nchiweme chomene, ndipo nditi ndikwimike kuti uŵenge muvikiriri wane mu umoyo wane wose.”

³Pa nyengo iyi Samuele wakaŵa wafwa kale ndipo ŵaIsraele wose ŵakamulira na kumusunga ku msumba wakhe wa Rama. Ndipo Sauli wakaŵa waŵachimbizgamo wose awo ŵakaŵa ŵawukwi na ŵamayere mu charu cha Israele.

⁴ŴaFilisiti ŵakawungana ŵasilikari ŵawo ndipo ŵakiza na kuzenga misasa yawo ku Shunemu, ndipo Sauli nayo wakawunganya ŵasilikari ŵakhe na kuzenga misasa yakhe ku Gilibowa.

⁵Para Sauli wakawona ŵasilikari ŵa ŵaFilisiti, wakopa chomene na kwamba kutenthema.

⁶Ntheura wakafumba kwa FUMU kuti wasange icho wangachita. FUMU kuti yikamuzgora chara manyi ndi mu maloto panji mu mphenduzgo ya Urimu nanga nkhwizira mu nchimi.

⁷Penepapo Sauli wakati kwa nduna zakhe, “Mundipenjere mwanakazi muwukwi mwakuti ndirute kwa iyo kuti nkhafumbeko.” Nduna zakhe zikamuzgora kuti, “Ku msumba wa Endoro kuli mwanakazi yumoza uyo ndi muwukwi.”

⁸Ntheura Sauli wakajizgora mu kawonekero na kuvwara malaya ghanyakhe. Ndipo wakatorapo ŵanthu ŵaŵiri na kuruta ku mwanakazi yura muwukwi na nyengo ya usiku ndipo wakati kwa iyo, “Undiwukwire ku mzimu wa munthu wakufwa na kundichemera yumoza uyo nditi ndimuzunure.”

⁹Kweni mwanakazi muwukwi yura wakazgora wakati, “Nadi namwe mukumanya icho Sauli wakachita pakuchimbizgamo ŵawukwi wose na ŵamayere wose mu charu. Kasi nchifukwa uli mukundithya mu chipingo kuti ndikomeke.”

¹⁰Ndipo Sauli wakarapira mu zina la FUMU kuti, “Nkhurapira mwa FUMU kuti uti ulangikenge pa chifukwa ichi chara.”

¹¹Penepapo mwanakazi yura wakafumba kuti, “Kasi mukukhumba kuti ndi muchemerani njani?” Sauli wakazgora kuti, “Undichemere Samuele.”

¹²Para mwanakazi wakawona Samuele, wakalira na kuchemerezga chomene. Ndipo wakati kwa Sauli, “Kasi nchifukwa uli mwandipusika ntheura? Asi ndimwe Sauli?”

¹³Karonga Sauli wakati ku mwanakazi yura, “Ungopanga chara, kasi ukuwona vichi?” Mwanakazi wakati, “Nkhuwona muzguka ukukwera kufuma mu charu.”

¹⁴Sauli wakafumba wakati, “Kasi kawonekero kakhe kali uli?” Mwanakazi wakati, “Nkhuwona munthu muchekuru wakukwera kufuma mu charu, wavwara munjilira.” Penepapo Sauli wakamanya kuti ndi Samuele ndipo wakasindamira pasi na kupereka nchindi.

¹⁵Samuele wakati kwa Sauli, “Kasi wanditimbanizgirachi ntheura pakundiwuska?” Sauli wakazgora kuti, “Ndili mu visuzgo vikuru pakuti ŵaFilisiti ŵakundizira na nkhondo ndipo Chiuta wawukako kwa ine. Kuti wakundizgoraso chara manyi kwizira mu nchimi panji mu maloto. Ntheura ndamuchemani kuti mundiphalire icho nkhwenera kuchita.”

¹⁶Samuele wakazgora kuti, “Kasi nchifukwa uli ukundifumba sono apo ukumanya kuti FUMU yafumako kwa iwe ndipo yazgoka kuŵa murwani wako?

¹⁷FUMU yachita icho yikayowoya kwa ine vya iwe. FUMU yili kupoka ufumu kwa iwe na kuupereka kwa Davide, yumoza wa ŵazengezgani ŵako.

¹⁸FUMU yikuchita ichi muhanya uno chifukwa iwe kuti ukayipulikira chara ndiposo ukareka kufiska ukari wakhe pa ŵaAmaleki.

¹⁹Ntheura FUMU yiti yikupereke iwe pamoza na ŵaIsraele mu mawoko gha ŵaFilisiti. Ndipo na machero iwe pamoza na ŵana ŵako muti mwize kuno kwa ine ku ŵanthu ŵakufwa. Nadi FUMU yiti yipereke ŵasilikari ŵa ŵaIsraele ku ŵaFilisiti.”

²⁰Penepapo Sauli wakawa pasi thambalala. Wakopa chomene chifukwa cha mazgu gha Samuele. Ndipo wakaŵavye na nkhongono chifukwa wakarya chakurya chara zuŵa lose lira na usiku wuwo.

²¹Para mwanakazi yura wakasenderera kufupi na Sauli na kuwona kuti wakutenthema chomene, wakati kwa Sauli, “Wonani, muteŵeti-kazi winu wangumupulikirani imwe. Ine ndangutaya umoyo wane pakuchita icho mwangundiphalira kuti ndichite.

²²Ntheura sono nkhumuŵeyani, namwe mundipulikire ine muteŵeti-kazi winu. Mundizomerezge kuti ndinozge kachakurya murye mwakuti muŵe na nkhongono para mukuruta.”

²³Sauli wakakana pakuyowoya kuti, “Ine kuti ndingarya chara.” Kweni nduna zakhe ziŵiri zira pamoza na mwanakazi yura ŵakamuchichizga Sauli kuti warye, ndipo pa umaliro wakaŵapulikira. Ntheura wakawuka pasi na kukhara pa chitara kuti warye chakurya.

²⁴Mwanakazi yura wakaŵa na mwana wa ng'ombe wakututuŵa ndipo mwaluŵiro wakamukoma. Wakatora ufu na kuwukonkhakonkha na kuphika chingwa chambula chirungo.

²⁵Penepapo wakiza na chingwa chira kwa Sauli na nduna zakhe ndipo ŵakarya. Penepapo usiku wenewura ŵakawuka na kuruta.