Read new_tumbuka_bible 1 Samuele 29 Bible Online

1 Samuele 29 - new_tumbuka_bible bible

1 Samuele 29

¹ŴaFilisiti ŵakawunganya pamoza mawumba ghose gha ŵasilikari ŵawo ku Afeki, ndipo ŵaIsraele ŵakazenga misasa yawo pafupi na mbwiwi mu dambo la Yezireyele.

²Para ŵakaronga ŵankhonde ŵa ŵaFilisiti ŵakarongozganga ŵasilikari ŵawo 100 na vikwivikwi, Davide na ŵasilikari ŵakhe ŵakarondezga kunyuma pamoza na Akishi.

³Ŵarongozgi ŵa ŵasilikari ŵa ŵaFilisiti ŵakafumba ŵakati, “Kasi ŵaHebere aŵa ŵakuchitachi kuno?” Akishi wakaŵazgora ŵarongozgi ŵa ŵasilikari ŵa ŵaFilisiti wakati, “Asi uyu ndi Davide nduna ya Sauli, karonga wa charu cha Israele. Iyo wakhara na ine kujumpha chirimika chimoza, ndipo kufumira pa zuŵa ilo wakachimbilira kwa ine mpaka sono, kuti ndasangamo kafukwa mwa iyo chara.”

⁴Kweni ŵarongozgi ŵasilikari ŵa ŵaFilisiti ŵakamukwiyira Akishi ndipo ŵakati kwa iyo, “Umuwezge munthu uyu mwakuti warutenge ku malo agho ukamupa. Wareke kuruta nase ku nkhondo mzire apo tichali kurwa nkhondo wazgoke na kutiwukira ise. Kasi munthu uyu wangakaphemana nayo uli sekuru wakhe? Asi wangakaphemana nayo pakumutorera mitu ya ŵasilikari ŵithu.

⁵Asi ndi Davide mweneuyu uyo ŵanakazi ŵakakoŵerananga pakwimba uku wakuvina kuti, ‘Sauli wakakoma ŵasilikari vikwi, kweni Davide wakoma ŵasilikari vikwi khumi.’ ”

⁶Ntheura Akishi wakamuchema Davide na kuti kwa iyo, “Nkhurapira mwa FUMU, Chiuta wa Israele kuti, iwe wanguŵa wakugomezgeka kwa ine, ndipo changuŵa chakundikondweska chomene kuti iwe unditeŵeterenge ine mu nkhondo. Chifukwa kufuma pa zuŵa ilo ukafikira kwa ine mpaka sono, ine ndilije kusangamo kafukwa kwa iwe. Kweni ŵakaronga ŵanyakhe kuti ŵakukuzomerezga iwe chara.

⁷Ntheura sono werera kumanyuma, urute mu mutende kuti ureke kukwiyiska mtima ya ŵakaronga ŵa ŵaFilisiti.”

⁸Davide wakafumba Akishi wakati, “Kasi ndachita chiheni uli sekuru? Kasi mwasangamo chiheni uli mwa muteŵeti winu kufuma pa zuŵa ilo nkhizira kwa imwe mpaka sono? Kasi ine ndingareka uli kuruta kuti nkharwe nkhondo na ŵarwani ŵa karonga, sekuru wane?”

⁹Akishi wakamuzgora Davide wakati, “Ine nkhumanya kuti iwe waŵa wambula kalema kwa ine nga ndi mungelo wa Chiuta. Kweni ŵarongozgi ŵa ŵasilikari ŵaFilisiti ŵati, ‘Wakwenera kuruta nase ku nkhondo chara.

¹⁰Ntheura na machero para kwacha urutenge iwe na ŵasilikari ŵa sekuru wako awo ukiza nawo. Mwambe na mulenje chomene, ndipo murutenge apo kukungweruka waka.’ ”

¹¹Penepapo Davide na ŵasilikari ŵakhe ŵakawuka na mulenje kwati kwacha na kuruta, kuwerera ku malo agho ŵaFilisiti ŵakamupa. Kweni ŵasilikari ŵa ŵaFilisiti ŵakarutilira mpaka ŵakaya kafika ku Yezireyele.