Read new_tumbuka_bible 1 Samuele 30 Bible Online

1 Samuele 30 - new_tumbuka_bible bible

1 Samuele 30

¹Davide na ŵasilikari ŵakhe ŵakafika ku Zikilagi pa zuŵa la chitatu, na kusanga kuti ŵaAmaleki ŵayamba kale kurwa nkhondo ku mwera kwa chigaŵa cha Yudeya ku mu msumba wa Zikilagi. Ŵakawuthereska msumba wa Zikilagi na kuwuwocha na moto,

²ndipo ŵakakora uzga ŵanakazi na wose awo ŵakaŵa mu msumba, ŵachoko na ŵakuru wuwo. Kuti wakakomapo na yumoza chara, kweni ŵakaŵatora waka na kuruta nawo.

³Para Davide na ŵasilikari ŵakhe ŵakafika mu msumba wa Zikilagi wakasanga kuti wocheka na moto ndipo ŵawoli ŵawo, na ŵana ŵawo ŵatorekera ku umikori.

⁴Penepapo Davide na ŵasilikari ŵakhe ŵakalira chomene mwakukwezga mazgu ŵakasuka ŵakaŵavye nkhongono zakulirira.

⁵Ŵanakazi ŵaŵiri ŵa Davide Ahinowamu wa ku Yezireyele na Abigelu, chokoro na Nabala wa ku Karimele nawo ŵakakorekera ku uzga.

⁶Davide wakaŵa na chitima chomene pakuti ŵasilikari ŵakhe ŵakayowoyanga zakuti ŵamukome pakumudina na mawe, chifukwa wose ŵakaŵa ŵakari pakuti ŵana ŵawo ŵakatorekera ku umikori. Kweni Davide wakasanga nkhongono mwa FUMU, Chiuta wakhe.

⁷Penepapo Davide wakati kwa musofi Abiyatara, mwana wa Ahimeleki, “Zanalo kwa ine laya la bafuta la efodi.” Ntheura Abiyatara wakiza nalo laya lira kwa Davide.

⁸Ndipo Davide wakafumba kwa FUMU kuti, “Kasi ndiŵaronde ŵasilikari aŵa ŵa ŵaAmaleki? Kasi nditi ndi ŵathereske?” FUMU yikazgora yikati, “Ŵarondezge ŵamkuŵathereska nadi ndipo ŵamkupokeska wose kwambula kutondeka.”

⁹Ntheura Davide na ŵasilikari ŵakhe 600 ŵakawuka na kuruta kurondezga ŵaAmaleki. Ndipo ŵakati ŵafika pa mronga wa Besoro, ŵanji awo ŵakasidikanga kumanyuma, ŵakakhara penepara.

¹⁰Iwo ŵakaŵa 200 ŵeneawo vikaŵalemera chomene kuti ŵambuke mronga wa Besoro. Kweni Davide na ŵasilikari ŵanyakhe 400 ŵakarutilira kurondezga ŵaAmaleki.

¹¹Apo ŵakarutanga wakasanga muEguputo yumoza mu thengere, ndipo ŵakiza nayo kwa Davide. Ŵakamupa chakurya kuti warye ndiposo na maji kuti wamwe.

¹²Ntheura ŵakamupa chiduswa cha chingwa chipapati cha vikuyu na makunje ghaŵiri gha mpheska. Ndipo wakati warya, mtima wakhe ukawereramo pakuti wakarya chilichose chara nesi kumwa maji pa mazuŵa ghatatu muhanya na usiku.

¹³Davide wakafumba wakati, “Kasi sekuru wako ndi njani ndipo iwe ukufuma nkhu?” Iyo wakamuzgora Davide kuti, “Ine ndine muEguputo, muzga wa muAmaleki. Sekuru wane wakandireka pano pamanyuma pakurwara mazuŵa ghatatu agho ghajumpha.

¹⁴Tikanjizga nkhondo ku mwera kwa charu cha Yuda ku ŵanthu ŵaKereti, na ŵaKalebu, ndiposo tikawocha na moto msumba wa Zikilagi.”

¹⁵Davide wakafumba wakati, “Kasi ungandirongozgera ku ŵasilikari aŵa?” MuEguputo yura wakazgora wakati, “Inya, kweni murape danga kwa Chiuta panthazi pa ine kuti mwamkundikoma chara nanga nkhundipereka kwa sekuru wane. Pamanyuma ndipo ndi murongozgani ku ŵasilikari ŵeneaŵa.”

¹⁶Ntheura munthu yura wakarongozga Davide ku ŵasilikari ŵa ŵaAmaleki. Pa nyengo iyi ŵasilikari ŵa ŵaAmaleki ŵakaŵa ŵabaralikira apa na apa uku ŵakurya, ŵakumwa na kuvina chifukwa cha vya kuskogha vinandi ivyo ŵakatora ku vyaru vya ŵaFilisiti na cha Yuda.

¹⁷Davide na ŵasilikari ŵakhe ŵakarwa nawo nkhondo kwamba na mulenjelenje mpaka na machero ghakhe na mise. Pakaŵavye na yumoza muAmaleki uyo wakaponapo kuwuskako ŵanyamata 400 awo ŵakakwera ngamila na kuchimbira.

¹⁸Ntheura Davide wakapokeska vyose ivyo ŵaAmaleki ŵakatora kusazgapo ŵawoli ŵakhe ŵaŵiri.

¹⁹Pakaŵavye na kamoza ako kakasoŵapo, manyi kachoko panji kakuru, ŵana ŵanarume panji ŵanakazi, vya kuskogha vyose panji chilichose icho chikatoreka. Davide wakatora na kwiza navyo vyose.

²⁰Wakapokaso mberere na mbuzi zose, ng'ombe zose, ndipo ŵanthu ŵakhe ŵakavikhwema viŵeto vira panthazi pakhe na kuyowoya kuti, “Vyeneivi ndivyo vya kuskogha vya Davide.”

²¹Ndipo Davide wakiza apo pakaŵa ŵasilikari ŵara 200, ŵeneawo vikaŵalemera chomene kuti ŵendenge kumurondezga Davide ndipo wakakhara pa mronga wa Besoro. Iwo ŵakati wamuwona Davide ŵakiza kuti ŵakumane nayo pamoza na ŵanthu awo ŵakaŵa nawo pakuruta ku nkhondo. Ndipo para Davide wakafika pafupi na ŵanthu ŵara, ŵakaŵatauzga.

²²Penepapo ŵanthu ŵanyakhe ŵa mitima yiheni na ŵakusuzga awo ŵakaruta na Davide wakati, “Kuti tiŵapengeko kanthu chara pa ivyo tikaya kaskogha pakuvipokeska chifukwa chakuti ŵakaruta nase chara, ndipouli waliyose watore muwoli wakhe na ŵana ŵakhe ŵarutenge.”

²³Kweni Davide wakati, “Mureke kuchita ntheura mwa ŵanyane, na ivyo Fumu yili kutipa. FUMU ndiyo yatisunga na kupereka mu mawoko yithu ŵasilikari awo ŵakiza kuti ŵalimbane nase.

²⁴Kasi ndi njani uyo wangazomerezgana namwe pa makani agha? Phande la uyo wakakhara na katundu ŵithu na la uyo wakaruta ku nkhondo liti liyanenge waka.”

²⁵Ndipo kwamba zuŵa lenelira Davide wakalangula kuti ichi chiŵenge chilayizgo na dango la muyirayira mu Israele kufuma zuŵa lira mpaka sono.

²⁶Para Davide wakafika mu msumba wa Zikilagi, wakatuma vinyakhe vya ivyo wakaskogha ku ŵarara ŵanji ŵa ŵaYuda ŵeneawo wakaŵa ŵabwezi ŵakhe, ndipo wakati, “Pokererani chawanangwa ichi kufuma pa ivyo tikaskogha ku ŵarwani wa FUMU.”

²⁷Vyawanangwa vira vikaperekeka ku ŵanthu ŵa ku Betele, ŵa ku Ramoti, ku mwera kwa Yuda na ŵaYatiri,

²⁸ŵa ku Aroyere, wa ku Sifimoti, ŵa ku Eshitemowa

²⁹na ŵa ku Rakala. Ku ŵanthu ŵa ku misumba ya ŵaYerameyele na ŵaKeni,

³⁰ŵanthu awo ŵakakharanga ku Horima, Boro Ashani, Ataki

³¹na ku Heburoni ndiposo na ku malo ghose uko Davide na ŵanthu ŵakhe ŵakendangako.