Read new_tumbuka_bible 1 Samuele 5 Bible Online

1 Samuele 5 - new_tumbuka_bible bible

1 Samuele 5

¹Sono ŵaFilisiti ŵakati ŵapoka Bokosi la Phangano la Chiuta, ŵakiza nalo ku Ashidodi kufuma ku Ebenezara.

²Ŵakalitoraso bokosi lira na kwiza nalo ku nyumba ya chiuta wawo Dagoni ndipo ŵakaliŵika pa mphepete na chiuta yura.

³Para ŵanthu ŵa ku Ashidodi ŵakawuka na machero ghakhe ku mulenje, wakasanga kuti Dagoni wawa kavunama panthazi pa Bokosi la Phangano la FUMU. Ŵakamuwuska Dagoni yura na kumwimika pa malo ghakhe.

⁴Para ŵakawuka machero ghakhe ku mulenje, ŵakasangaso kuti Dagoni wawaso kavunama panthazi pa Bokosi la Phangano la FUMU, ndipo mutu na mawoko ghakhe ghaŵiri ghadumukadumuka ghali pa khonde la nyumba ya Dagoni. Chithupi chakhe pera ndicho chikakharako kwambula kusweka.

⁵Ichi ndicho chifukwa mpaka zuŵa lino ŵasofi ŵa Dagoni na ŵanthu ŵanji wose awo ŵakunjira mu nyumba ya Dagoni kuti wakukandapo pa khonde la nyumba yakhe mu Ashidodi chara.

⁶FUMU yikaŵalanga ŵanthu ŵa ku Ashidodi pamoza na ŵanyakhe ŵa pafupi na msumba wa Ashidodi pakuŵaŵika mu wofi ukuru na kuŵasuzga na mapumba.

⁷Para ŵanthu ŵa ku Ashidodi ŵakawona umo vinthu vikaŵira ŵakati, “Bokosi la Phangano la chiuta wa Israele lireke kuŵa na ise, pakuti nkhongono yakhe njikuru chomene pa ise na pa Dagoni chiuta withu.”

⁸Ntheura ŵakatuma ŵanthu kuti ŵakacheme nduna za ŵaFilisiti kuti zikumane pamoza ndipo zikafumbana zikati, “Kasi tichite uli na Bokosi la Phangano la Chiuta wa Israele?” Zikazgora zikati, “Torani Bokosi la Phangano la Chiuta wa Israele na kuruta nalo ku Gati.” Ntheura ŵakaruta nalo ku Gati,

⁹Kweni ŵakati ŵafika nalo ku Gati, FUMU yikaŵalanga ŵanthu ŵa msumba wa Gati pakuŵaŵika mu suzgo yikuru. Ŵana na ŵarara wuwo ŵakakoreka na mapumba.

¹⁰Ntheura ŵakalituma Bokosi la Phangano la Chiuta ku Ekuroni. Apo ŵakafikanga nalo ku Ekuroni, ŵanthu ŵa kwenekura ŵakachemerezga ŵakati, “Bokosi la Phangano la Chiuta wa Israele ŵiza nalo kwa ise mwakuti lizakatikome ise na ŵanthu ŵithu.”

¹¹Ntheura wakatumaso ŵanthu kuti ŵacheme nduna zose za ŵaFilisiti kuti ziwungane pamoza ndipo zikati, “Liwuskanimo Bokosi la Phangano la Chiuta wa Israele. Muliwezgere ku malo ghakhe uko likafuma, kuti lireke kutikoma ise na ŵanthu ŵithu. Pakuti ŵanthu ŵakufwa chomene mu msumba wose.” Chiuta wakaŵalanga chomene ŵanthu ŵa msumba ura.

¹²Ŵanthu awo ŵakomeka chara, ŵakakoreka na mapumba, ndipo kulirira kwa ŵanthu ŵa mu msumba kukakwerera mpaka kuchanya.