Read new_tumbuka_bible 1 Samuele 6 Bible Online

1 Samuele 6 - new_tumbuka_bible bible

1 Samuele 6

¹Bokosi la Phangano la FUMU likaŵa mu charu cha ŵaFilisiti pa myezi yinkhonde na yiŵiri.

²Ntheura ŵaFilisiti ŵakachema ŵasofi na ŵaroski ŵawo ndipo ŵakaŵafumba ŵakati, “Kasi tichite nalo uli Bokosi la Phangano la FUMU? Mutiphalire, kasi tirutume na vichi ku malo ghakhe?”

³Iwo ŵakazgora ŵakati, “Usange mukuliwezga Bokosi la Phangano la Chiuta wa Israele, mureke kulituma kwambula chilichose, kweni mu nthowa yiliyose mulitume kwa iyo pamoza na sembe yakuphepiskira majuvyo ghinu. Mwa ntheura muti muchizgikenge ndipo muti mumanyenge chifukwa icho wamulangirani ntheura.”

⁴ŴaFilisiti wakafumba wakati, “Kasi ndi sembe yakuphepiskira majuvyo uli iyo tingayituma kwa iyo?” Ŵasofi pamoza na ŵawukwi ŵakazgora ŵakati, “Munozge vikozgo vya mapumba vinkhonde vya golide na vikozgo vya mbeŵa navyo vinkhonde vya golide kwakuyana na unandi wa ŵakaronga ŵa ŵaFilisiti. Pakuti nthenda yakofya iyi yikakora mose na nduna zinu wuwo.

⁵Mupange vikozgo ivi vya mapumba na vya mbeŵa zeneizo zikwananga charu chinu ndipo mumuchindike Chiuta wa Israele. Panyakhe wati wapepuske chilango chakhe pa imwe, pa ŵachiuta ŵinu na pa charu chinu.

⁶Nchifukwa uli mukunonofya mitima yinu nga mba Eguputo na Faro ŵeneawo ŵakanonofya mitima yawo? Chiuta wa Israele wakati wa ŵazerezeska iwo, asi ŵakaŵazomerezga kuti ŵaIsraele ŵarute ndipo ŵakaruta nadi?

⁷Ntheura sono nozgekerani gareta liphya na ng'ombe ziŵiri zanakazi izo zikonkheska ndipo zindakakikepo goliwoli na kale. Zeneizo ndizo muzikake mu gareta, kweni ngwata muziwezgere ku kaya ku chiŵaya chakhe.

⁸Mutore Bokosi la Phangano la FUMU, na kuliŵika mukati mu gareta ndipo vikozgo vya golide ivyo mwamkuvipereka kwa iyo nga ndi sembe yakuphepiskira majuvyo yinu muviŵike pafupi na Bokosi lira la FUMU. Ntheura muzireke ng'ombe kuti zirutenge na gareta pa izo zekha.

⁹Kweni muliwone. Usange likuruta mu nthowa yakuya ku charu cha kwakhe ku msumba wa Beti Shemeshi, ntheura manyani kuti FUMU ya Israele ndiyo yikatichitira chinthu chiheni na chikuru ichi. Kweni usange likuruta kunyakhe, titi timanye kuti ndi FUMU iyo yatilanga chara, kweni chithu ichi chatiwira waka mwasoka.”

¹⁰Ŵanthu ŵara ŵakachita ntheura. Ŵakatora ng'ombe zanakazi zira na kuzikaka ku goliwoli ku gareta ndipo ngwata zawo wakazijalira mu chiŵaya.

¹¹Ŵakaŵika Bokosi la Phangano la FUMU mu gareta lira pamoza na kabokosi umo mukaŵa vikozgo vya mbeŵa na vikozgo vya mapumba vya golide.

¹²Ng'ombe zira zikamba ulendo mwakurutilira kurazga ku nthowa ya ku Beti Shemeshi kwambula kuzgokera ku maryero panji ku mazere kwa nthowa. Para ng'ombe zira zikarutanga zikabamanga. Nduna za ŵaFilisiti zikazirondezga mpaka zikaya kafika pa mphaka za Beti Shemeshi.

¹³Sono ŵanthu ŵa ku Beti Shemeshi ŵakavunanga tirigu wawo mu dambo, ndipo para ŵakalaŵiska, ŵakawona Bokosi la Phangano lira. Ntheura ŵakasekerera ŵakati ŵaliwona.

¹⁴Gareta lira likiza na kwimilira mu munda wa Yoshuwa wa ku Beti Shemeshi apo pakaŵa jarawe likuru. Ŵanthu ŵakaswa mathabwa gha gareta kuŵa nkhuni ndipo ŵakakoma ng'ombe zira na kuzipereka kuŵa sembe yakocha kwa FUMU.

¹⁵ŴaLevi ŵakakhizga Bokosi la Phangano lira pamoza na kabokosi ako kakaŵa na vikozgo vya golide ndipo ŵakaviŵika pa jarawe likuru lira. Pa zuŵa lira ŵanthu ŵa Beti Shemeshi wakapereka sembe zakocha mburuma na sembe zakukoma kwa FUMU.

¹⁶Nduna zinkhonde za ŵa ŵaFilisiti zikati zawona vinthu vyose ivi, zikawerera ku Ekuroni zuŵa lenelira.

¹⁷Vikozgo vya mapumba vinkhonde vya golide ivyo ŵaFilisiti ŵakatuma kuŵa sembe yakuphepiskira majuvyo ghawo kwa FUMU ndi ivi: ku msumba wa Ashidodi chimoza, ku msumba wa Gaza chimoza, ku msumba wa Ashikeloni chimoza, ku msumba wa Gati chimoza ndipo ku msumba wa Ekuroni chimoza.

¹⁸Ndipo unandi wa vikozgo vya mbeŵa za golide, ivyo ŵakaperekaso, vikayana na unandi wa misumba ya ŵaFilisiti ya ŵakaronga ŵankhonde ŵara, pamoza na misumba ya malinga na vikaya vyambula malinga. Jarawe likuru lira ilo ŵakaŵikapo Bokosi la Phangano la FUMU lichalipo mpaka sono mu munda wa Yoshuwa wa ku Beti Shemeshi kuŵa ukaboni.

¹⁹FUMU yikakomapo ŵanthu ŵanji ŵa ku Beti Shemeshi ŵakukwana 70 chifukwa wakalingizgamo mu Bokosi la Phangano la FUMU. Ntheura ŵanthu ŵakatengera chifukwa FUMU yikachitiska kuti ŵanthu ŵanandi chomene ŵakomeke.

²⁰Ŵanthu ŵa ku Beti Shemeshi ŵakafumba ŵakati, “Kasi ndi njani uyo wangima panthazi pa FUMU, Chiuta mutuŵa uyu? Kasi nkhwa njani uko Bokosi la Phangano la FUMU lingatorekera.”

²¹Ntheura ŵakatuma nthumi kuti zirute ku Kiriyati Yeyarimu na kuŵaphalira kuti, “ŴaFilisiti ŵaliwezga Bokosi la Phangano la FUMU. Mwize kuno kuti mwizakalitorere kwa imwe.”