Read new_tumbuka_bible 1 Samuele 9 Bible Online

1 Samuele 9 - new_tumbuka_bible bible

1 Samuele 9

¹Kukaŵa munthu yunji zina lakhe Kishi wa fuko la Benjamini mweneuyo wakaŵa musambazi na wakumanyikwa chomene. Iyo wakaŵa mwana wa Abiyele, muzukuru wa Zeroro, wa mbumba ya Bekorati mwana wa Afiya ndipo wakakharanga mu charu cha Benjamini.

²Iyo wakaŵa na mwana zina lakhe Sauli, muwukirano wa nkharo yiweme kuruska waliyose mu ŵaIsraele. Wakaŵaso mutali kufuma mu viŵegha vyakhe kuruska waliyose.

³Zuŵa limoza, mbunda za Kishi uyo wakaŵa wiske wa Sauli zikazgeŵa. Ndipo iyo wakati kwa Sauli mwana wakhe, “Mwana wane, tora muteŵeti yumoza ndipo murute kuya kazipenja mbunda.”

⁴Ntheura ŵakaporota mu charu cha mapiri cha Efurayimu na mu chigaŵa cha Shalisha, kweni kuti ŵakazisanga chara. Ŵakarutilira kupenja mu chigaŵa cha Shaalimu, kweni namoso mbunda kuti zikaŵamo chara. Pamanyuma ŵakaporota mu charu cha Benjamini, kweni ŵakazisanga chara.

⁵Ŵakati ŵafika mu charu cha Zufu, Sauli wakati kwa muteŵeti uyo wakaŵa nayo, “Tiye tiwerere, mzire ŵadada ŵareke kwenjerwa za mbunda, ŵambe kwenjera za ise.”

⁶Muteŵeti wakamuzgora wakati, “Reka danga. Mu msumba uwu muli munthu wa Chiuta mweneuyo ŵanthu ŵakumuchindika chomene, ndipo chilichose icho wakuyowoya chikuchitika. Sono tiyeni tirute mwenemumo panyakhe wangayakatiphalira uko kuli mbunda.”

⁷Sauli wakati ku muteŵeti yura, “Usange tikuruta, kasi tamkumupachi munthu wa Chiuta. Chakurya icho changuŵa mu mathumba yithu chamara. Tilije na cha wanangwa chilichose icho tingapereka ku munthu wa Chiuta. Kasi tili na vichi?”

⁸Muteŵeti yura wakamuzgoraso Sauli kuti, “Pano ndili na kandarama kachoko chomene ka siliva ndipo keneaka ndamkumupa munthu wa Chiuta kuti watiphalire uko tingasanga mbunda.”

⁹Kale chomene muIsraele usange munthu wakuruta kuya kafumbako kanthu kwa Chiuta, wakayowoyanga kuti, “Tiye tirute kwa muwukwi, pakuti mweneuyo mazuŵa ghano wakuchemeka kuti nchimi, kale wakachemekanga kuti muwukwi.”

¹⁰Ntheura Sauli wakati kwa muteŵeti yura, “Wayowoya makora, tiye tirute.” Ntheura ŵakaruta mu msumba umo mukaŵa munthu wa Chiuta.

¹¹Para ŵakakweranga phiri kuruta ku msumba, mu nthowa ŵakakumana na ŵasungwana awo ŵakafumanga ku dambo kukanegha maji ndipo ŵakaŵafumba kuti, “Kasi muwoni walimo mu msumba?”

¹²Ŵasungwana ŵakazgora kuti, “Inya wali mwenemumo. Yura wali panthazi pinu. Sono yendeskani pakuti wafika sonosono mu msumba ndipo muhanya uno ŵanthu ŵati ŵaperekenge sembe ku malo gha pachanya ghakusoperako.

¹³Para mwanjira waka mu msumba, muti mumusange wachali wandarute ku malo gha pachanya ghakusoperako kuti wakarye. Ŵanthu kuti ŵati ŵarye chara wasuke iyo wafike pakuti wakwenera kutumbika sembe. Pamanyuma pakhe ndipo awo ŵachemeka ŵati ŵarye. Ntheura sono rutaninge, muti mumusangenge pa nyengo iyi.”

¹⁴Penepapo Sauli na muteŵeti yura wakakwerera ku msumba ndipo apo ŵakanjiranga waka, ŵakamuwona Samuele wakwiza panthazi pawo kuruta ku malo gha pachanya ghakusoperako.

¹⁵Sono mu zuŵa ilo Sauli wakaŵa wachali wandafike mu msumba, FUMU yikamuvumbulira Samuele kuti,

¹⁶“Na machero pa nyengo yakuŵa nga ndi iyi ndamkukutumira munthu wa fuko la Benjamini. Mweneuyo ndiyo ukamuphakazge mafuta kuti waŵe karonga wa ŵanthu ŵane ŵaIsraele. Iyo ndiyo wati wathaske ŵanthu ŵane ku ŵaFilisiti pakuti ndaviwona visuzgo vyawo ndipo ndapulika kulira kwawo.”

¹⁷Para Samuele wakamuwona Sauli, FUMU yikati kwa iyo, “Uyu ndiyo munthu mweneuyo nkhayowoyanga kwa iwe. Mweneuyu ndiyo wati wawusenge ŵanthu ŵane.”

¹⁸Penepapo Sauli wakasenderera kufupi kwa Samuele uyo wakaŵa pa chipata ndipo wakafumba wakati, “Nkhumuŵeyani, mundiphalire kasi nyumba ya muwukwi yilinkhu?”

¹⁹Samuele wakazgora wakati, “Ine ndine muwukwi. Dangirani, murutenge ku malo gha pachanya ghakusoperako pakuti muhanya uno muti muryenge pamoza na ine. Na machero ndipo nditi ndimuphaliraninge vyose ivyo vili mu mitima yinu na kumurekani kuti murutenge.

²⁰Kwakuyana na mbunda izo zili kuzgeŵa mazuŵa ghatatu agho ghajumphapo, mureke kwenjerwa nazo pakuti zili kusangika. Kweni sono kasi khumbo lose la Israele liri pa njani? Asi liri pa iwe na pa mbumba yose ya ŵawuso?”

²¹Sauli wakazgora wakati, “Ine ndine muBenjamini wa fuko lichoko chomene mu mafuko ghose gha Israele. Mbumba yane ndiyo ya umaliro mu mbumba zose za Benjamini. Kasi ndi chifukwa uli mukuyowoya ntheura kwa ine?”

²²Ntheura Samuele wakamutora Sauli pamoza na muteŵeti yura kwiza nawo mu nyumba yakuryeramo chakurya. Wakaŵakhazika pa malo ghakuzirwa panthazi pa wose awo ŵakachemeka awo ŵakakwana 30.

²³Samuele wakati ku wakuphika, “Zanayo nyama iyo ndangukupa yeneiyo ndakukuphalira kuti uyiŵike pa dera.”

²⁴Ntheura wakuphika yura wakaya katora mukhono pamoza na nganga yakhe na kuŵika panthazi pa Sauli. Ndipo Samuele wakati, “Nyama iyi ndiyo ndangukusungira. Tora urye chifukwa ndanguyiŵika pa dera kuti iwe urye panyengo iyi pamoza na awo ŵachemeka.” Ntheura Sauli wakarya pamoza na Samuele zuŵa lenelira.

²⁵Ŵakati ŵawerako kufuma ku malo gha pachanya ghakusoperako, kwiza mu msumba, ŵakamunozgera Sauli chitara pachanya pa nyumba,[4] ndipo iyo wakagona.[5]

²⁶Sono ku matandakucha, Samuele wakamuchema Sauli pachanya pa nyumba uko wakagona, wakati, “Wuka, mwakuti tirayilane apo nkhukuperekezga.” Ntheura Sauli wakawuka ndipo wose pamoza iyo na Samuele ŵakafumira kuwaro.

²⁷Ndipo apo wakendanga mu msewu ku umaliro wa msumba, Samuele wakati kwa Sauli, “Muphalire muteŵeti wako kuti wadangireko.” Ndipo muteŵeti wati wadangirako, iwe wimilire pa kanyengo kachoko waka mwakuti ndikuphalire mazgu gha Chiuta.