Read Ngaju GENESIS 1 Bible Online

GENESIS 1 - Ngaju bible

GENESIS 1

¹Intu tamparae haliai Hatalla manjapa langit tuntang petak,[1]

²kalunen hindai aton ampin tampae, tuntang magon hewoi-habureh. Tasik lombah hagalombang, je manutup taloh handiai, inyangkulep awi taloh je kaput pijem, tapi kuasan Hatalla manari intu hunjun kare danum te.[2]

³ Hatalla hamauh: “Keleh aton kalawa!” Palus kalawa manjadi.

⁴Hatalla sanang manampayah taloh te. Palus imisah Awie kalawa te bara kakaput.

⁵Tuntang inggare Awie kalawa te “Handau”, tuntang kakaput te “Hamalem”. Hamalem mahalau hanjewu dumah. Jete andau je solake.

⁶ Limbah te Hatalla hamauh, “Keleh aton taloh hambirang je mambaris danum te manjadi due, tuntang manahae hong due eka je hapisah.” Palus taloh te manjadi. Kalote Hatalla manampa taloh je tau mamisah uka manahan danum hong penda bara danum hong hunjun.

⁸Hatalla manggare taloh hambirang te “langit”. Hamalem mahalau hanjewu dumah. Jete andau je kadue.

⁹Balalu Hatalla hamauh “Keleh danum hong penda langit mahasor akan ije eka, mangat eka te tau gitan.” Palus taloh te manjadi.

¹⁰Hatalla manggare eka je gitan te “Petak”, tuntang danum te “Tasik”. Hatalla sanang manampayah taloh te.

¹¹Hatalla hamauh tinai, “Keleh petak mampalembut sepsimpan ampin kare taloh imbul, iete taloh imbul je habawak tuntang taloh imbul je mamua.” Palus taloh te manjadi.

¹²Kalote petak mampalembut sepsimpan ampin taloh imbul. Hatalla sanang manampayah taloh te.

¹³Hamalem mahalau hanjewu dumah. Andau je kateloe.

¹⁴Palus Hatalla hamauh, “Keleh aton taloh balawa hong langit je mampalawa petak, mangat mamisah handau bara hamalem, tuntang mangat manukas katika tamparan andau, nyelo, andau hai agama.” [3] Palus taloh te manjadi.

¹⁶Kalote Hatalla manampa due taloh balawa je hai, iete matanandau hapa marentah andau, tuntang bulan hapa marentah alem; beken bara te inampae kea kare bintang.

¹⁷Hatalla mingkes taloh balawa te intu langit mangat mampalawa kalunen,

¹⁸hapa marentah andau tuntang alem, tuntang hapa mamisah kalawa bara kakaput. Hatalla sanang manampayah taloh te.

¹⁹Hamalem mahalau hanjewu dumah. Andau je kaepat.

²⁰Limbah te Hatalla hamauh, “Keleh hong danum baraguet are macam taloh belom, tuntang hong penda langit are kare burong tarawang.”

²¹Hatalla manampa kare meto hai huang tasik tuntang kare macam taloh belom hong danum, tuntang kare macam burong. Hatalla sanang manampayah taloh te.

²²Hatalla mamberkat kakare taloh te hayak manenga parentah akan taloh belom hong danum mangat manak-manaka mangontep tasik, tuntang akan kare burong mangat sasar are.

²³Hamalem mahalau hanjewu dumah. Andau je kalime.

²⁴Limbah te Hatalla hamauh, “Keleh petak mampalua sepsimpan ampin meto hunjun petak, meto balinek tuntang bariar, aloh meto je hai tuntang je korik.” Palus taloh handiai te manjadi.

²⁵Kalote Hatalla jari manjadian taloh handiai te, tuntang Ie mite taloh handiai te uras bahalap.

²⁶ Limbah te Hatalla hamauh Koae, “Toh keleh itah manampa olon hatamunan arep itah, tumon ampin itah. Ewen kareh marentah kare lauk hong tasik, kare burong tuntang kare meto beken, aloh je balinek atawa baliar,[4] aloh je hai atawa korik.”

²⁷ Palus Hatalla manjapa olon hatamunan Arepe kabuat. Ie manjapa olon hatue tuntang bawi.

²⁸Limbah te Ie mamberkat ewen te hayak hamauh Koae: “Manak keton batila-tilap, dahang-dahanga bitin keton, suang salepah petak tuntang nguasa jete. Tinai Aku manyoho keton marentah kare lauk, kare burong tuntang sepsimpan ampin kare meto je haguet hunjun petak.

²⁹Akan panginan Aku manenga akam sepsimpan ampin kare taloh je tumbo hunjun petak je habawak tuntang kare bua je habawak je impalembut awi kare batang kayu beken.

³⁰Tapi akan kare burong tuntang kare meto tuntang kare taloh belom je haguet hunjun petak Aku manenga dawen kare taloh je tumbo hunjun petak akan panginae.” Palus kare taloh handiai te manjadi tumon te.

³¹Maka Hatalla manampayah taloh je jari injadian Awie te, toto uras bahalap. Maka hamalem mahalau tuntang hanjewu dumah tinai. Andau je kajahawen.