Read Ngaju GENESIS 11 Bible Online

GENESIS 11 - Ngaju bible

GENESIS 11

¹Solake, kare bangsa hong hapus kalunen mahapan basa ije bewei. Ewen mahapan bawak kotak je sama.

²Metoh ewen manamuei akan hila timor, ewen sampai hong ije janah intu Babilonia. Ewen palus melai hete.

³Ewen hamauh sama arepe, “Keleh itah manampa batu bata tuntang mamapuie sampai batekang.” Kalote ewen mawi batu bata akan batun huma tuntang tér akan dampul hapa mampalekete.

⁴Koan ewen, “Keleh itah mampendeng lewu dengan ije candi je tahunyoke sampai langit, te itah kareh basewut tuntang dia kasaburan akan hapus kalunen.”

⁵Maka TUHAN mohon handak manampayah lewu tuntang candi je impendeng olon.

⁶Balalu ie hamauh, “Ewen toh ije bangsa tuntang mahapan ije basa. Jetoh harue tamparan kare gawin ewen. Dia tahi tinai ewen olih malalus en bewei je ingahandak ewen.

⁷Keleh itah mohon tuntang mampakahut basan ewen mangat ewen dia tau sama sinde harati auh kolae.”

⁸Kalote TUHAN manaburan ewen akan hapus kalunen. Palus ewen terai mampendeng lewu te.

⁹Awi te lewu te inggare Babel (kakahut), [24] awi intu hete TUHAN mampakahut basan kare bangsa. Bara hete ewen inaburan awi TUHAN akan hapus kalunen.

¹⁰Jetoh turonan Sem, due nyelo limbah danum soho, metoh Sem 100 nyelo umure, ie mandino anak hatue, arae Arpaksad.

¹¹Limbah te ie magon belom 500 nyelo tinai. Ie mandino kare anak je beken.

¹²Metoh Arpaksad 35 nyelo umure, ie mandino anak hatue, arae Selah.

¹³Limbah te Arpaksad magon belom 403 nyelo tinai. Ie mandino kare anak je beken.

¹⁴Metoh Selah 30 nyelo umure, ie mandino anak hatue, arae Eber.

¹⁵Limbah te Selah magon belom 403 tinai. Ie mandino kare anak je beken.

¹⁶Metoh Eber 34 nyelo umure, ie mandino anak hatue arae Peleg.

¹⁷Limbah te Eber magon belom 430 nyelo tinai. Ie mandino kare anak je beken.

¹⁸Metoh Peleg 30 nyelo umure, ie mandino anak hatue, arae Rehu.

¹⁹Limbah te Peleg magon belom 209 nyelo tinai. Ie mandino kare anak je beken.

²⁰Metoh Rehu 32 nyelo umure, ie mandino anak hatue, arae Serug.

²¹Limbah te Rehu magon belom 207 nyelo tinai. Ie mandino kare anak je beken.

²²Metoh Serug 30 nyelo umure, ie mandino anak hatue, arae Nahor.

²³Limbah te ie magon belom 200 nyelo tinai. Ie mandino kare anak je beken.

²⁴Metoh Nahor 29 nyelo umure, ie mandino anak hatue, arae Terah.

²⁵Limbah te Nahor magon belom 119 nyelo tinai. Ie mandino kare anak je beken tinai

²⁶Limbah umur Terah 70 nyelo, ie mandino telo anak hatue, iete Abram, Nahor tuntang Haran.

²⁷Jetoh turonan Terah: Terah bapa Abram, Nahor tuntang Haran. Haran mandino anak hatue, arae Lot.

²⁸Haran matei hong kampung ekae inakan, iete Ur hong Babilonia. Metoh te bapae magon belom.

²⁹Abram kawin dengan Sarai, tuntang Nahor kawin dengan Milka je anak Haran. Haran aton tinai anake hatue je beken arae Yiska.

³⁰Sarai te tamanang.

³¹Terah malihi lewu Ur hong Babilonia haya-hayak dengan Abram anake, esoe Lot, tuntang manantue Sarai, iete sawan Abram. Ie handak haguet akan lewu Kanaan. Tapi sana sampai hong Haran, ewen melai hete.

³²Tuntang hong hete kea Terah matei hong umur 205 nyelo.