Read Ngaju GENESIS 12 Bible Online

GENESIS 12 - Ngaju bible

GENESIS 12

¹ TUHAN hamauh dengan Abram, “Lihi lewum, tundah kolam tuntang human bapam, palus haguet akan lewu je handak imparahang-Ku akam.

²Aku handak menenga akam turonan je are tuntang ewen kareh jadi bangsa je hai. Aku handak mamberkat ikau tuntang manjadian aram basewut. Palus ikau kareh jadi berkat.

³ Aku handak mamberkat kare oloh je mamberkat ikau tuntang manyapa kare oloh je manyapa ikau. Tuntang ganan ikau Aku handak mamberkat kakare bangsa hong kalunen.” [25]

⁴Umur Abram 75 nyelo metoh ie malihi Haran, manumon parentah TUHAN akae. Abram haguet akan tanah Kanaan haya-hayak dengan sawae Sarai, tuntang Lot akee, tuntang kare panataue tuntang kare jipee je dinon ewen hong Haran. Limbah ewen sampai hong Kanaan,

⁶Abram mangumbang tanah te. Te ie sampai pukong pahewan hong More, eka olon sombayang hong Sikhem. (Metoh te oloh Kanaan magon melai tanah te.)

⁷ TUHAN mamparahan Arepe akan Abram hayak hamauh dengae, “Jetoh lewu je akan inenga-Ku akan turonam.” Palus Abram mampendeng ije mesbeh intu hete akan TUHAN je jari mamparahan Arepe akae.

⁸Limbah te ie manuntong pangguete akan salatan, akan tanah je habukit hong hila timor lewu Betel. Ie mampendeng kemahe helat Betel dengan Ai. Betel hila barat tuntang Ai hila timor. Hete kea ie mampendeng mesbeh tuntang manyembah TUHAN.

⁹Limbah te ie marajur tinai pangguete manende kare eka bara ije eka akan eka je bekan, manintu hila salatan tanah Kanaan.

¹⁰Metoh te oloh hong tanah Kanaan buah lau paham. Awi te Abram haguet sasar kejau tinai akan hila salatan, balalu ie akan Misir mangat melai hete sampai kasusah lau te terai.

¹¹Metoh te ie handak mahalau watas tuntang tame tanah Misir. Ie hamauh dengan Sarai sawae, “Ikau bahalap ampim, sawangku.

¹²Amon oloh Misir manampayah ikau, ewen kareh manyangka je ikau sawangku. Tagal te aku kareh impatei tuntang ikau inalua belom.

¹³ Awi te keleh mansanan je ikau toh andiku. Mangat aku tau inalua belom tuntang ihaga dengan kahalap tagal ikau.”

¹⁴Te toto kea, limbah Abram mahalau watas tuntang sampai tanah Misir, oloh Misir nampayah je Sarai paham kahalap ampie.

¹⁵Pire-pire biti pagawai istana mite ie. Ewen mansanan akan raja je oloh bawi te paham bahalap ampie. Awi te ewen mimbite akan istana raja.

¹⁶Tagal Sarai, raja mangatau Abram tuntang manenga akae kare jipen, are tabiri tuntang kambing, sapi, kalidai tuntang onta.

¹⁷Tapi awi raja manduan Sarai, TUHAN mampadumah kare panyakit je papa toto mawi raja tuntang kare oloh hong istanae.

¹⁸Balalu raja mantehau Abram tuntang misek ie, “Narai taloh je jari iawim dengangku toh? Mbuhen ikau dia mansanan je ie te sawam?

¹⁹Mbuhen ikau mansanan je ie andim tuntang manalua aku manduae jadi sawangku? Toh ie sawam; duan tuntang lius!”

²⁰Raja manenga parentah akan pira-pire pagawai ayue, tuntang ewen mampalua Abram bara lewu te haya-hayak dengan sawae tuntang kare ramoe.