Read Ngaju GENESIS 15 Bible Online

GENESIS 15 - Ngaju bible

GENESIS 15

¹Limbah te, Abram mandino paite tuntang mahining TUHAN hamauh dengae, “Ela mikeh, Abram, aku handak mangalindong ikau bara bahaya. Aku handak manenga akam upah je hai.”

²Tapi Abram tombah, “TUHAN pangkahai, TUHAN dia manenga anak akangku. Oloh je mawaris kare ramongku baya Elieser. Ie rewarku bara Damaskus. [27] Awi te narai gunae TUHAN manenga upah akangku?”

⁴Limbah te Abram mahining TUHAN hamauh tinai dengae, “Dia ie rewarm te je kareh mandino waris bara ikau, tapi anak hatue ayum kabuat.”

⁵ TUHAN mimbit Abram balua palus hamauh dengae, “Tanggera akan langit, tuntang coba ise kare bintang te, maka turonam kareh kilau bintang te karee.”

⁶ Abram percaya dengan TUHAN, tagal te TUHAN manarima ie kilau oloh je manyanang ateie.

⁷Limbah te Hatalla hamauh tinai dengae, “Aku TUHAN, je jari mimbit ikau balua bara lewu Ur hong Babilonia, manenga petak toh akam manjadi petak ayum.”

⁸Tapi Abram misek, “O, TUHAN pangkahai, kilen ampie aku tau katawan je petak toh akan jadi petak ayungku?”

⁹Tombah TUHAN, “Duan akang-Ku ije kongan sapi bawie, ije kongan kambing bawie tuntang ije kongan kambing hatue je uras telo nyelo umure, tuntang tinai ije kongan burong kuku tuntang burong dara ije kongan kea.”

¹⁰Palus Abram manduan kare meto te akan Hatalla. Sapi, kambing tuntang tabiri te uras inyilae jadi due. Ie mingkes kare tangkal meto te hataharep hong due kabaris. Tapi kare burong te dia ie manyilae.

¹¹Isin meto te iningkep kare burong je tukang kumam hantu, tapi Abram maharake.

¹² Metoh matanandau nampara belep, Abram tapatiroh tujah. Salenga lembut kikehe paham toto.

¹³ TUHAN hamauh dengae, “Ingat turonam akan jadi oloh perantau intu lewun oloh. Ewen jadi jipen hete tuntang ingapehe 400 nyelo katahie.

¹⁴ Tapi bangsa je mahajipen turonam te akan ihukum awiku. Maka amon turonam malihi lewu te, ewen akan mimbit are panatau.

¹⁵Ikau kabuat akan manyampai umur je panjang. Ikau akan matei hong kasanang, palus ingubur.

¹⁶Limbah girir turonan je kaepate, anak esom akan buli haluli akan hetoh, Awi aku dia handak maharak oloh Amori helo bara ewen jari paham kapapae sampai patut ihukum.”

¹⁷Metoh jari hamalem, salenga lembut ije tungku je hasep, tuntang obor je banyala, palus mahoroi helat kare tangkal isin meto te.

¹⁸ Metoh te kea TUHAN mampendeng janjin Aie dengan Abram. Koan TUHAN, “Aku bajanji handak manenga akan turonam hapus tanah toh. Iete nampara bara helat dengan tanah Misir sampai sungei Euprat.

¹⁹Hong hete tamput kea tanah oloh Keni, Kenas, Kadman,

²⁰Het, Peris, Repaim,

²¹Amori, Kanaan, Girgasi tuntang Yebus.”