Read Ngaju GENESIS 16 Bible Online

GENESIS 16 - Ngaju bible

GENESIS 16

¹Sarai sawan Abram, hindai kea dinon anak. Tapi ie tempon rewar ije biti oloh Misir. Rewar te bawi arae Hagar.

²Sarai hamauh dengan Abram, “TUHAN dia manenga jalan akangku manak. Awi te keleh ikau hinje dengan rewarku toh. Ayau ie tau manak akangku.” Abram manumon auh Sarai.

³Te Sarai manenga Hagar akan Abram indu gundike. Metoh te Abram jari sapuluh nyelo melai hong Kanaan.

⁴Abram hinje Hagar, maka oloh bawi te batihi. Tapi sana ie katawan arepe batihi, ie manampara bajoho paham tuntang manawah Sarai.

⁵Palus Sarai hamauh dengan Abram, “Aku jari manenga Hagar rewarku akam. Tapi sana ia katawan arepe batihi, ie manawah aku. Jete kasalan ayum.[28] Keleh TUHAN mamutus perkara toh akan kue.”

⁶Tombah Abram, “Mana koam ih, ie rewarm je penda kuasam.” Balalu Sarai mawi Hagar dengan kakaras, sampai rewar te mandari arepe.

⁷Malekat TUHAN manyondau Hagar tokep lowang danum hong padang pasir, iete hong jalan je manintu padang Sur.

⁸Koan Malekat te, “Hagar, rewar Sarai, ikau bara kueh tuntang handak akan kueh?” Tombah Hagar, “Aku hadari bara Sarai tempongku.”

⁹Malekat te hamauh, “Buli haluli talih ie tuntang numon kare parentahe.”

¹⁰Palus koan malekat te tinai, “Aku handak manenga akam are toto anak eso, sampai dia olih oloh misee.

¹¹Dia tahi tinai ikau manak anak hatue. Sewut arae Ismael, [29] awi TUHAN jari mahining tangism.

¹²Tapi anakm te akan belom kilau kalidai bariar. Ie akan malawan gagenep oloh. Tapi gagenep oloh kea akan malawan ie. Ie akan belom hambilang bara kare tundah kolae.”

¹³Hagar misek hong ateie, “En toto aku jari mite Hatalla je manantuani aku?” Te ie menyewut TUHAN, je jari hamauh dengae, “Hatalla je manantuani”.

¹⁴Awi te oloh manyewut kalin danum je helat Kades dengan Bered te, “Kalin danum Ayue je belom, je manantuani aku.”

¹⁵ Balalu Hagar manak anak hatue. Abram bapae, manggare anak te Ismael.

¹⁶Metoh te umur Abram hanya puluh jahawen nyelo.