Read Ngaju GENESIS 17 Bible Online

GENESIS 17 - Ngaju bible

GENESIS 17

¹Metoh Abram jalatien puluh nyelo umure, TUHAN mamparahan Arep akae tuntang hamauh, “Aku toh Hatalla Je Jaton Tikas Kuasang-Ku. Keleh manumon auh-Ku tuntang lalus kahandak-Ku harajur.

²Aku handak mampendeng janjing-Ku dengam tuntang manenga akam turonan je are.”

³Palus Abram sontop manyembah, limbah te Hatalla hamauh,

⁴ “Toh janji je impendeng-Ku dengam: Aku hajanji je ikau akan jadi tato hiang kare bangsa. Tagal te aram dia tinai Abram, tapi Abraham. [30]

⁶Aku handak manenga akam anak eso je are. Bara ewen te kareh aton je jadi kare raja. Turonam akan are toto, sampai ewen akan jadi kare bangsa.

⁷ Aku handak malalus janjing-Ku dengam tuntang dengan kare turonam je turon tamuron. Janjing-Ku te palus katatahie. Aku handak jadi Hatallam tuntang Hatalla ain turonam.

⁸ Aku handak manenga akam tuntang akan turonam, petak toh, je ielaim kilau oloh tamui katika toh. Salepah tanah Kanaan kareh jadi bagin turonam katatahie, tuntang aku kareh jadi Hatallan ewen.”

⁹Hatalla hamauh tinai dengan Abraham, “Ikau kea musti baketep dengan janji toh, ikau tuntang turonam turon manuron.

¹⁰ Ikau tuntang salepah turonam je hatue uras inyunat.

¹¹Nampara bara katika toh musti ikau manyunat genep anak awau hatue je hanya andau umure. Hong baris ewen te tamput kea kare jipen je inakan hong humam atawa je imilim. Sunat te akan jadi tanda janji bara Aku tuntang ikau.

¹³Genep biti musti inyunat. Jete akan jadi tanda sara kaolon je mamparahan je janjing-Ku dengam toh palus katatahie.

¹⁴Genep oloh hatue je dia inyunat Aku dia mangakue kilau ungkup ayung-Ku, basa ie dia mimbing janji te.”

¹⁵Limbah te Hatalla hamauh dengan Abraham, “Ikau ela tinai manyewut aran sawam te Sarai. Nampara bara katika toh arae Sarah.

¹⁶Aku handak mamberkat ie. Ie kareh manak ije anak hatue je handak inenga-Ku akam. Yoh, Aku handak mamberkat Sarah. Ie kareh jadi tato hiang kare bangsa. Bara turonae akan aton kare raja.”

¹⁷Palus Abraham sontop manyembah, tapi ie tatawe metoh lembut tiroke, “En tau oloh hatue je jari seratus nyelo umure mandino anak? En tau Sarah manak hong umur jalatien puluh nyelo?”

¹⁸Ie hamauh dengan Hatalla “Keleh Ismael bewei je manjadi waris aingku.”

¹⁹Tapi Hatalla hamauh, “Dia, Sarah sawam te kareh manak anak hatue tuntang ikau manggare arae Isaak. [31] Aku handak baketep dengan janjing-Ku akan anak te tuntang akan turonam palus katatahie.

²⁰Tapi aku manarima kea palakum tahiu Ismael. Ie kareh jadi tato hiang due walas raja. Awi te ie akan imberkat awi-Ku tuntang inenga-Ku turonan je are. Ie akan jadi tato hiang due walas kapala suku tuntang turonae handak injadian awi-Ku bangsa je hai.

²¹Tapi janjing-Ku handak impendeng-Ku dengan Isaak, anakm je inakan awi Sarah, nyelo naharep kira-kira wayah kilau toh kea.”

²²Limbah hapus auh Aie kalote, Hatalla malihi Abraham.

²³Andau te kea, Abraham manumon peteh Hatalla tuntang manyunat Ismael anake. Kalote kea oloh hatue hong humae uras inyunate, tamput kare jipen je inakan hong humae tuntang je imilie.

²⁴Umur Abraham jalaiten puluh jalatien nyelo metoh ie inyunat

²⁵tuntang Ismael anake, telo walas nyelo umure.

²⁶Ewen inyunat hong andau je sama,

²⁷haya-hayak dengan kakare jipen Abraham.