Read Ngaju GENESIS 18 Bible Online

GENESIS 18 - Ngaju bible

GENESIS 18

¹TUHAN mamparahan Arep akan Abraham tokep kare pukong pahewan eka sombayang hong Mamre. Metoh te andau paham balasot, tuntang Abraham metohe mondok hong bauntonggang kemahe.

² Metoh ie manampayah akan baun, ie mite telo biti oloh mendeng tandipah ie. Abraham palus hadari handak manyambut ewen. Sambil sontop manyembah.

³Ie hamauh, “O kare tuan ela ah manangkalau kemahku toh. Keleh jaka aku toh tau akan indu soho-rentah keton.

⁴Keleh aku manduan danum hapa menyau kare pain tuan. Keleh tuan malayan kaheka hong penda upon kayu toh.

⁵Aku handak manyarongan panginan isut, mangat kare tuan tau mandino kaabas tinai mangat tau manuntong jalanan. Tuan samandiai jari mahormat aku amon tuan nahuang tende akan human rewar tuan toh.” Tombah ewen, “Tarima kasih tagal kahalapm. Ikeh puna nahuang tende.”

⁶Abraham kaje-kajeng tame kemah tuntang hamauh dengan Sarah, “Jeleng, duan ije kusak tepong je paling bahalap, tampa rote.”

⁷Limbah te ie hadari akan eka kawan metoe, mintih anak sapi je baseput hayak balemo isie, palus manenga akan pelayae, dan ie bajeleng manguae.

⁸Limbah te Abraham manduan susu, mantega tuntang isin meto je jari impakasak te, palus manyarongae akan kare oloh luar te. Metoh ewen kuman, Abraham kabuat jadi pelayan ewen hong penda upon kayu te.

⁹Limbah te ewen misek, “Kueh Sarah, kabalim?” “Kanih hong kemah,” tombah Abraham.

¹⁰ Ije biti bara ewen je maja te hamauh, “Jalatien bulan limbah toh[32] aku nahuang maja tinai. Katika te Sarah sawam te mandino anak hatue.” Metoh te Sarah kanjerae manyeneh hong bauntonggang kemah, hila likut oloh je maja te.

¹¹Abraham tuntang Sarah te jari bakas toto, tuntang Sarah jari dia tau dumah bulae.

¹² Awi te Sarah tatawe huang ateie tuntang hamauh, “Aku jari bakas kambareot kilau toh, en aton kanahuangku tinai dengan banangku? — Kalote kea banangku mahin jari bakas.”

¹³Balalu TUHAN misek Abraham, “Mbuhen Sarah tatawe tuntang bembang tahiu arepe en ie tau manak hong andau kabakase?”

¹⁴ En aton taloh je dia tau manjadi akan TUHAN? Kilau koangku nah, “Jalatien bulan tinai aku nahuang haluli akan hetoh. Metoh te Sarah manak ije biti anak hatue.”

¹⁵Awi Sarah mikeh, ie milim, koae, “Aku dia tatawe,” Tapi TUHAN tombah, “Ikau puna tatawe endau.”

¹⁶Limbah te telo biti oloh luar te haguet iagah awi Abraham. Balalu ewen sampai ije eka je bara hete ewen tau mite Sodom.

¹⁷TUHAN hamauh hong ateie, “Aku dia maku manyahokan akan Abraham taloh je handak ilalusku.

¹⁸En dia turonae dapit jadi bangsa je bakapal tuntang kuasa? En dia mahalau ie kakare bangsa hunjun petak akan imberkat awi-Ku?[33]

¹⁹Ie jari intih-Ku uka marentah kare anake tuntang turonae mangat manumon auh-Ku tuntang malalus taloh je bahalap tuntang taloh je bujur. Amon ewen malalus taloh te, kare janjing-Ku dengan Abraham uras akan ilalus-Ku.”

²⁰Palus TUHAN hamauh dengan Abraham, “Aton auh dawa babehat mawi Sodom tuntang Gomora. Dosan ewen te puna hai toto.

²¹Tagal te Aku handak mohon akan hete mangat mariksa en kare auh dawa je hining-Ku te toto atawa dia.”

²²Balalu due bara kare perantau te haguet manintu Sodom, tapi TUHAN magon melai dengan Abraham.

²³Abraham manokep TUHAN palus misek, “En toto TUHAN nahuang mampalomos oloh je jaton bara kasalan haya-hayak dengan oloh je jaton kasalae?

²⁴Paribasae aton 50 biti oloh je jaton bara kasalan hong lewu te, en hapus lewu te impalomos awi TUHAN? En dia TUHAN maku mampun uka lime puluh biti te salamat?

²⁵Ela ah kare oloh je dia bara kasalan te impatei haya-hayak dengan oloh je sala. Ela TUHAN! Awi amon TUHAN malaluse, oloh je dia bara kasalan batantu ihukum haya-hayak dengan oloh je bara kasalan. Dia bakae hakim akan salepah kalunen salenga tau malalus taloh je dia bujur!”

²⁶TUHAN hamauh, “Paribasae aton 50 biti je dia bara kasalan hong Sodom, Aku nahuang mampun hapus lewu te tagal ewen.”

²⁷Abraham hamauh tinai, “Keleh mampun aku tagal kahanyingku manontong kotak toh, TUHAN. Aku toh baya olon, tuntang dia patut mansanan taloh en-en.

²⁸Tapi mikeh baya aton epat puluh lime biti bewei je dia bara kasalan, dia ie lime puluh. En TUHAN handak mambinasa hapus lewu te baya awi tapas epat puluh lime biti bewei?” TUHAN hamauh, “Aku dia mampalomos lewu te paribasae hete aton epat puluh lime biti je dia bara kasalan.”

²⁹Abraham hamauh tinai, “Kilen amon baya epat puluh biti?” TUHAN tombah, “Tagal epat puluh biti te Aku handak mambalang kanahuang-Ku.”

³⁰Abraham hamauh, “Ela balait, TUHAN, amon aku hakotak tinai. Kilen amon baya aton telo puluh biti bewei?” TUHAN hamuh, “Amon aton telo puluh biti, Aku handak mambalang kanahuang-Ku.”

³¹Abraham hamauh, “Keleh mampun kahanyingku manontong kotak-pander toh TUHAN. Amon baya aton due puluh biti bewei?” TUHAN tombah, “Amon aton due puluh biti, Aku dia mampalomos lewu te.”

³²Kajariae Abraham hamauh, “Ela balait, TUHAN, aku baya bakotak sinde tinai. Kilen amon baya aton sapuluh biti bewei?” TUHAN hamauh, “Amon aton sapuluh biti je dia bara kasalan, Aku dia handak mambinasa lewu te.”

³³Limbah hapus auh Ie hakotak dengan Abraham, TUHAN haguet, tuntang Abraham buli humae.