Read Ngaju GENESIS 19 Bible Online

GENESIS 19 - Ngaju bible

GENESIS 19

¹Limbah maja Abraham, kadadue malekat te haguet akan Sodom tuntang sampai intu hete jari hamalem. Lot metohe mondok intu bauntonggang Sodom, tuntang sana mite ewen, ie harikas manambang ewen palus ie sontop manyembah intu taharep ewen

²tuntang hamauh, “Tuan samandiai, keleh tende hong humangku. Keton tau manyampai tuntang baramalem hong humangku. Jewu amon keton nahuang, keton tau misik hayak jajewu tuntang marajur jalanan keton.” Tapi ewen tombah, “Tarima kasih, ikei baramalem intu hetoh bewei, hong alun-alun lewu.”

³Lot musok ewen, tuntang kajariae ewen tame pahayak ie akan humae. Lot manatap panginan je mangat tuntang mamanggang rote sukup karee, palus ewen kuman.

⁴Tapi helo bara kare oloh luar te batiroh, kare oloh Sodom mangapong huma te. Kakare oloh hatue hong lewu te, bakas tabela aton hong hete.

⁵ Ewen mantehau Lot tuntang misek, “Kueh oloh je dumah baramalem hong humam nah? Sarah ewen akan ikei, mangat ikei tau marantep arep ikei dengan ewen!”

⁶Lot balua bara humae, tuntang limbah manutup bauntonggang,

⁷ie hamauh dengan kare oloh Sodom te, “Pahari samandiai, aku balaku toto-toto, ela ih mawi taloh je kalote kapapae!

⁸Toh hining, aku aton anak due biti bawi je jari kasene oloh hatue. Nauhe aku manyarah ewen akan keton. Keton tau malalus taloh en bewei dengan ewen. Tapi ela mawi taloh en-en dengan kare oloh je maja toh; awi ewen patut ingalindong awiku.”

⁹Tapi koan kare oloh Sodom te dengan Lot, “Kanih ikau! En ikau oloh je manyelat-maneseng handak mator ikei? Ayo kejau! Amon dia, ikei kareh manjera belaim labih bara due biti oloh te.” Balalu ewen manggian Lot tuntang miar boho-boho handak manepe bauntonggang.

¹⁰Tapi due oloh je maja te manjuju lengen ewen, manyintak Lot tame akan huang huma, palus manutup bauntonggang.

¹¹ Ewen mambute matan kakare oloh je aton hong luar huma te, sampai kare oloh te dia olih sondau bauntonggang tinai.

¹²Due oloh je maja te hamauh dengan Lot, “Amon ikau aton anak hatue, anak bawi, manantu atawa tundah kolam je beken melai lewu toh, imbit ewen balua bara hetoh,

¹³awi lewu toh handak imbinasa ikei. TUHAN jari mahining kare auh dawa babehat mawi oloh intu hetoh. Ikei jari inyoho TUHAN mampalomos lewu Sodom toh.”

¹⁴Palus Lot haguet manyondau due biti tunangan due anake tuntang hamauh, “Jeleng balua bara eka toh, awi TUHAN handak mambinasae.” Tapi ewen manyewut Lot hureh bewei.

¹⁵Lius hanjewu, due malekat te hajajuan mangat Lot bajeleng haguet. “Jeleng”, koan ewen. “Keleh haguet dengan sawam tuntang due anak bawi aim te bara hetoh, mangat keton dia matei amon lewu toh impalomos.”

¹⁶ Lot bembang. Tapi TUHAN masi ie; awi te due-due oloh je maja te magah Lot dengan sawae tuntang kadadue anake akan luar lewu.

¹⁷Limbah te, ije bara due malekat te hamauh, “Dari, nyalamat hambaruan keton! Ela tampaliau akan hila likut tuntang ela tende hong petak randah. Dari akan eka je habukit, mangat keton dia matei!”

¹⁸Tapi Lot tombah, “Kayah, Tuan ela manyoho ikei hadari akan tanah je habukit.

¹⁹Toto, Tuan jari mawat aku toto-toto tuntang manyalamat hambaruangku. Tapi tanah je habukit te lalau kejau; mikeh aku jake awi calaka te palus matei helo bara sampai kanih.

²⁰Item, hila baun te aton lewu korik je dia lalau kejau. Aku balaku uka tau akan hete mangat salamat.”

²¹Malekat te tombah, “Tau, aku puna dia nahuang mampalomos lewu je korik te.

²²Jeleng, dari! Basa aku dia tau mawi taloh en-en helo bara ikau sampai intu hete.” Awi Lot mansanan lewu te korik, maka lewu te inggare Soar. [34]

²³Katika matanandau lembut, Lot sampai Soar.

²⁴ Salenga TUHAN malabuh ujan barirang hayak apui mawi Sodom tuntang Gomora.

²⁵Kadadue lewu te irusak, tamput kea hapus petak randah tuntang kakare taloh belom je tumbo hunjun petak tuntang kakare oloh je mangkalewu intu hete.

²⁶ Tapi sawan Lot tampaliau akan hila likut, balalu ie basaloh jadi turus uyah.

²⁷Andau jewue, hanjewu, Abraham kaje-kajeng haguet akan eka ie mendeng intu taharep TUHAN andau malee.

²⁸Ie nampayah akan hila Sodom tuntang Gomora dengan hapus petak randah. Ie mite asep mangangkewol bara petak te, kilau asep bara tungku hai.

²⁹Kalote katika Hatalla mambinasa kare lewu te hong petak randah eka Lot melai. Hatalla mingat Abraham tuntang mandohop Lot hadari.

³⁰Awi Lot dia omba melai hong Soar, ie palus haguet akan tanah bukit dengan due anake bawi. Ewen balalu melai hong ije goha.

³¹Maka anak bawi je tambakase hamauh dengan andie, “Bapa itah jari bakas, tuntang hong hapus lewu toh[35] jaton oloh hatue je tau kawin dengan itah mangat itah mandino anak.

³²Ayo, itah mambusau bapa, palus itah batiroh dengae mangat itah mandino anak.”

³³Hong alem te ewen mampihop bapae hapan anggor, palus anak je tambakase batiroh dengan bapae; tapi bapae paham babusau sampai ie dia katawan taloh je manjadi.

³⁴Andau jewue tinai, anak je tambakase hamauh dengan andie, “Alem endau aku jari batiroh dengan bapa! Alem kareh ikau mambusau ie tinai. Palus batiroh ih ikau dengae. Kareh genep bitin kue dinon anak.”

³⁵Kalote hong alem te ewen mambusau Lot, palus anake je kaduee batiroh dengae. Lot paham babusau tinai sampai ie dia katawan taloh je manjadi.

³⁶Palus kadadue anak Lot te batihi awi bapa ewen kabuat.

³⁷Anak je tambakase manak anak hatue je inggaree Moab. [36] Ie jadi tato hiang oloh Moab je wayah toh.

³⁸Anak je kaduee manak anak hatue kea je inggaree Ben-Ami. [37] Ie jadi tato hiang bangsa oloh Amon je aton wayah toh.