Read Ngaju GENESIS 21 Bible Online

GENESIS 21 - Ngaju bible

GENESIS 21

¹TUHAN mamberkat Sarah, kilau je jari injanji Awie.

² Hong katika je jari inukas Hatalla, metoh Abraham jadi bakas Sarah batihi palus manak ije anak hatue.

³Abraham manampa aran anak te Isaak;

⁴ tuntang metoh Isaak hanya andau umure, Abraham manyunate, manumon parentah Hatalla.

⁵Umur Abraham seratus nyelo metoh Isaak inakan.

⁶Sarah hamauh, “Hatalla jari mawi aku tatawe [38] awi kahanjak. Gagenep oloh je mahining taloh toh kareh tatawe hanjak hayak dengangku.”

⁷Tinai koae, “Eweh helo bara toh tau hamauh dengan banangku je aku tau mampatuso anak? Tapi aku jari manak kea aloh banangku bakas toto.”

⁸Anak te sasa-sasar hai, tuntang hong andau ie malekak tuso, Abraham malalus pesta hai.

⁹Sinde katika, Ismael, anak Abraham tuntang Hagar bawin oloh Misir te, kanjerae bangang dengan [39] Ishak, anak Sarah.[40]

¹⁰ Sarah mite taloh te tuntang hamauh dengan Abraham, “Harak rewar bawi te dengan anake. Dia tau anak rewar bawi te mandino bagi bara panataum je kareh iwaris anakku Isaak.”

¹¹Abraham samasinde dia sanang dengan palaku te, awi Ismael anake kea.

¹² Tapi Hatalla hamauh dengan Abraham, “Ela ikau mikeh tahiu rewarm Hagar tuntang anake te. Numon kanahuang Sarah, awi bara Isaak ikau kareh mandino turonan je injanji-Ku te.

¹³Kalote kea akan anak Hagar handak inanga-Ku are anak eso mangat ewen jadi ije bangsa. Basa ie anakm kea.”

¹⁴Andau jewue, hanjewu Abraham manenga akan Hagar panginan tuntang ije kantong upak meto basuang danum akan bahata hong benteng jalan. Ie mingkes anak te hong likut Hagar, tuntang manyoho oloh bawi te haguet. Palus Hagar haguet tuntang manamuei hong padang pasir Berseba.

¹⁵Sana danum bahata lepah, Hagar mingkes anak te hong penda rowut,

¹⁶palus mondok lakau seratus meter bara eka te. Koae huang ateie, “Aku dia olih manampayah anakku matei.” Balalu ie[41] manangis.

¹⁷Hatalla mahining auh Ismael, tuntang bara langit malekat Hatalla hakotak dengan Hagar, koae, “Narai je inyusahm Hagar? Ela mikeh, Hatalla jari mahining auh anakm.

¹⁸Talih anakm, gatang tuntang pasuni ie. Aku akan mawi turonae manjadi bangsa je bakapal.”

¹⁹Palus Hatalla mampatarang tampayah matan Hagar sampai ie balalu mite ije kalin danum. Palus ie hingkat manyuang kantong upak meto te dengan danum, limbah te ie mampihop anake.

²⁰Hatalla mampahayak Ismael. Anak te jala-jalan hai; ie manetep hong padang Paran, tuntang jadi oloh pamandop je pintar.

²¹Indue mangawin ie dengan ije biti bawin oloh Misir.

²² Katika te raja Abimelekh tuntang Pikhol, kapala tantara aie, dumah manalih Abraham tuntang hamauh, “Hatalla mandohop ikau intu kare gawim.

²³Tagal te, keleh sumpah intu hetoh intu taharep Hatalla, je ikau dia handak malalus kapapa dengangku, aloh dengan kare anakku atawa turonangku. Kilau aku jari malalus kahalap dengam, lalus kilau te kea akangku tuntang akan lewu je ielaim toh.”

²⁴Koan Abraham, “Aku sumpah!”

²⁵Tapi katika rahian tinai Abraham manyalan Abimelekh tahiu ije kalin danum je jari irampas awi kare jipee.

²⁶Koan Abimelekh, “Aku dia katawan eweh je jari mawie. Hindai puji ikau mansanae akangku, harungku toh mahininge.”

²⁷Palus Abraham manenga tabiri tuntang sapi akan Abimelekh, tuntang ewen due te hajanji.

²⁸Abraham mamisah uju anak tabiri bara kare tabirie.

²⁹Abimelekh misek ie, “Mbuhen ikau mawi taloh toh?”

³⁰Abraham tombah, “Duan uju anak tabiri toh, indu turus janji je ikau mangaku aku je jari mangali kalin danum toh.”

³¹Tagal te eka te inggare Berseba, [42] awi hete due biti oloh te mawi sumpah.

³²Limbah ewen hajanji intu Berseba, Abimelekh tuntang Pikhol haluli akan lewun oloh Pilistin.

³³Palus Abraham mimbul ije kabatang anak kayu intu Berseba, tuntang bara katika te, ie mahapan eka te manyembah TUHAN, Hatalla je bara katatahie.

³⁴Limbah te Abraham melai tahi kea hong lewun oloh Pilistin.