Read Ngaju GENESIS 24 Bible Online

GENESIS 24 - Ngaju bible

GENESIS 24

¹Abraham jari bakas toto, tuntang ie imberkat TUHAN huang kare taloh samandiai.

²Sinde andau Abraham hakotak dengan reware je tambakase, je tukang manantuani kare ramoe, “Ingkes lengem intu helat kadadue upon sapakku.[45]

³Keleh sumpah tagal TUHAN, Hatallan langit tuntang petak, je ikau dia handak manggau oloh bawi akan kabalin Isaak anakku bara kare oloh hong tanah Kanaan toh.

⁴Ikau musti buli tanah ekaku inakan mangat manggau sawae bara kare kolangku.”

⁵Palus reware te misek, “Kilen amon oloh bawi te dia maku malihi humae tuntang dia maku omba aku akan lewu toh? En aku kareh mimbit anakm akan lewu asalm te?”

⁶Tapi Abraham tombah, “Awas! Ela haliai ikau mimbit anakku te akan kanih!

⁷TUHAN, Hatalla je manguasa langit, jari mimbit aku balua bara human bapaku tuntang bara lewun kolangku. Ie jari sumpah dengangku je Ie handak manenga lewu toh akan turonangku. Ie kea handak manyoho malekat Ayue uka mandohop ikau, mangat ikau tau sondau ije biti oloh bawi je manjadi kabalin anakku bara kanih.

⁸Tapi amon oloh bawi te dia maku omba ikau, te ikau empas bara sumpah toh. Aloh kilen ampie kea ela samasinde mimbit anakku te akan kanih.”

⁹Limbah te reware te mingkes lengee intu helat pakan Abraham tempoe te, tuntang sumpah handak malalus taloh je ilaku Abraham te.

¹⁰Rewar te manduan sapuluh kongan onta tuntang kare macam ramo barega ayun tempoe balalu haguet akan lewu eka Nahor melai kahum pambelome; eka te aton hila utara bara Mesopotamia.

¹¹Limbah ie sampai intu kanih, ie mampatende kare onta te mangat manyarenan kahekae tokep ije kalin danum intu ruar lewu. Andau jari halemei, tuntang metoh te kare oloh bawi dumah uka masip danum intu kali te.

¹²Palus rewar te balakudoa, “TUHAN, Hatallan tempongku Abraham, dohop, mangat gawingku mimbit hasil hong andau toh; keleh masi tempongku Abraham.

¹³Ite, aku mendeng intu tokep kalin danum toh. Dia tahi tinai kare oloh bawi bara lewu dumah masip danum.

¹⁴Aku kareh hamauh dengan ije biti bara kare ewen te, ‘Dohop pamohon kandim tuntang tenga akangku danum ihop.’ Amon ie tombah, ‘Ihop bewei, tuntang kare onta ayum akan impihopku kea!’ iete je iintih TUHAN akan rewarm Isaak. Amon taloh te manjadi, te aku akan katawan je TUHAN jari masi tempongku Abraham.”

¹⁵Metoh ie balakudoa te, Rebeka, ije biti oloh bawi je bahalap toto tuntang je bujang salia, sampai intu kalin danum te mimbit kandi intu hunjun bahae. Ie anak Betuel, tuntang oloh bakas Betuel te iete Nahor tuntang Milka; Nahor te kaka Abraham. Rebeka manalih kalin danum te tuntang manyuang kandie, palus mules buli.

¹⁶

¹⁷Rewar Abraham hadari manokep ie tuntang hamauh, “Dohop, nak, tenga akangku danum ihop bara kandim kau.”

¹⁸Oloh bawi te tombah, “Ihop bewei, Pak,” Palus ie bajeleng pamohon kandie bara hunjun bahae, tuntang sambil mimbing kandi te, ie mampihop rewar te.

¹⁹Limbah rewar te jari mihop; oloh bawi te hamauh, “Aku handak masip danum akan kare onta ayun bapa kea, mangat kakare meto te tau mihop sampai peda belaie.”

²⁰Limbah te ie bajeleng manusoh danum akan huang sarangan danum ihop onta, palus ie hadari haluli akan kalin danum mangat masip danum labih are tinai sampai uras meto te terai teah belaie.

²¹Katahin te rewar Abraham harajur manantuani ie hayak jaton auh kotake. Ie handak mangatawan en TUHAN manenga hasil akan taloh gawie atawa dia.

²²Limbah kare onta jari peda mihop, rewar Abraham manduan sowang amas je barega, palus mangkepae intu urong oloh bawi te. Hong lengee ie mangkepan ije kapasang galang amas.

²³Balalu rewar te hamauh, “Sanan eweh bapam. En aton eka baramalem hong humae akangku tuntang kare oloh ayungku?”

²⁴“Bapaku Betuel, anak Nahor tuntang Milka,” tombah oloh bawi te.

²⁵“Intu human ikei aton eka baramalem akam, are kea tampilai tuntang panginan meto.”

²⁶Rewar te balalu sontop manyembah TUHAN.

²⁷Koae, “Tara akan TUHAN Hatallan tempongku Abraham. TUHAN harajur baketep tuntang bahalap ateie dengan tempongku Abraham. Ie mimbit aku manintu tundah kolae.”

²⁸Limbah te oloh bawi te hadari akan human indue tuntang manyarita kare taloh je manjadi te.

²⁹Rebeka aton kakae, arae Laban. Ie mahining saritan andie tahiu taloh je ingotak awi rewar te. Ie mite kea sowang intu uronge tuntang galang intu lengen andie te. Laban palus hadari balua huma mangat manyondau rewar Abraham te je magon mendeng marak kare ontae tokep kalin danum te.

³⁰

³¹Balalu koan Laban, “Bapa toh oloh je imberkat TUHAN! Ela melai intu luar toh. Keleh manalih human ikei. Ikei jari manatap kamar akan bapa tuntang akan kare onta ain bapa.”

³²Palus rewar te omba tuntang tame akan huma. Laban mampamohon kare taloh je ieton awi kare onta. Ie manenga tampilai tuntang panginan akan kare meto te. Limbah te ie mimbit danum hapa menyau pain rewar Abraham tuntang kare oloh ayue.

³³Katika panginan inyarongan, rewar te hamauh, “Aku dia handak kuman helo bara aku manyampai peteh je iimbitku.” Koan Laban, “Yoh, mander ih.”

³⁴Palus rewar Abraham manampara hakotak, koae “Aku toh rewar Abraham.

³⁵TUHAN paham mamberkat tempongku te tuntang manjadian ie tatau toto. TUHAN jari manenga akae kare kawan tabiri, kambing, sapi, onta, kalidai; tuntang kea perak, amas, dengan rewar hatue tuntang bawi.

³⁶Hong umure je jari bakas, Sarah sawan tempongku te jari manak hatue; tuntang tempongku te jari manenga kare panataue indu waris akan anake.

³⁷Ie manyoho aku bajanji hapan sumpah uka manumon parentah. Koae, ‘Ela ikau mintih kabalin anakku bara marak kare oloh bawi hong tanah Kanaan toh;

³⁸malengkan bara marak tundah kolan bapaku. Te keleh ikau haguet bajeleng akan kanih.’

³⁹Balalu aku misek ie, ‘Kilen amon oloh bawi te kareh dia maku omba aku?’

⁴⁰Ie tombah, ‘TUHAN je harajur imendaku, kareh manyoho malekat ayue uka mandohop mangat gawim mimbit hasil. Ikau kareh sondau oloh bawi akan kabalin anakku bara marak jalahangku kabuat, iete bara tundah kolan bapaku.

⁴¹Baya amon ewen dia manarima ikau, harue ikau empas bara sumpahm.’

⁴²Tuntang metoh aku sampai intu kalin danum, aku balakudoa huang atei, ‘TUHAN Hatalla tempongku Abraham, keleh mawi gawingku aton hasile.

⁴³Aku tetep mendeng darah kalin danum toh. Jaka ije biti oloh bawi dumah handak masip danum, aku kareh balaku dengae uka mampihop aku.

⁴⁴Amon ie maku malaluse, tuntang handak kea mampihop kare onta aingku, batantu ie te je jari iintih TUHAN jadi sawan anak tempongku te.’

⁴⁵Hindai lepah aku mangotak lakodoa te huang atei, palus Rebeka dumah mimbit kandi intu hunjun bahae tuntang manduan danum bara kalin danum. Limbah te aku hamauh dengae, ‘Dohop, pihop aku.’

⁴⁶Bajeleng ie manipas kandie bara hunjun bahae tuntang hamauh, ‘Keleh mihop, tuntang kare onta ain bapa kea handak impihopku.’ Palus aku mihop tuntang limbah te kare ontangku te impihope kea.

⁴⁷Limbah te aku misek, ‘Eweh bapam?’ tuntang ie tombah, ‘Bapaku Betuel, anak Nahor tuntang Milka.’ Palus aku mangkepan sowang amas intu uronge tuntang ije kapasang galang intu lengee.

⁴⁸Aku sontop manyembah tuntang manara TUHAN, Hatallan tempongku Abraham. Ie jari mimbit aku manintu hetoh, manalih tundah kolan tempongku, sampai aku tau sondau oloh bawi toh akan anake.

⁴⁹Toh, amon keton handak malalus kahalap akan tempungku tuntang malalus kapatut gawi akae kilau paharin keton, keleh sanan akangku; tapi amon dia, sanan kea, mangat aku katawan narai je patut ilalusku.”

⁵⁰Laban tuntang Betuel tombah, “Tagal narai je jari manjadi toh bara TUHAN, ikei dia patut manenga tukas.

⁵¹Toh Rebeka; nauhe ie omba ikau tuntang jadi sawan anak tempom, kilau je jari insanan TUHAN kabuat.”

⁵²Limbah rewar Abraham te mahining auh ewen, ie sontop manyembah TUHAN.

⁵³Balalu ie mampalua pakaian, taloh ramo bara perak tuntang amas, ie manenga uras taloh te akan Rebeka. Kakae tuntang indue inengae kea panenga je uras barega.

⁵⁴Limbah te rewar Abraham tuntang kare oloh ayue kuman tuntang mihop, palus bamalem intu hete. Limbah ewen misik andau jewue rewar te hamauh, “Aku handak buli manalih tempungku.”

⁵⁵Tapi kaka tuntang indu Rebeka hamauh, “Keleh nauhe Rebeka melai dengan ikei lakau ije minggo atawa sapuluh andau tinai, limbah te ie tau haguet.”

⁵⁶Tapi rewar te hamauh, “Ela manahan aku, TUHAN mawi jalanangku jari aton hasile; keleh nyoho aku tau lius buli manalih tempongku.”

⁵⁷Tombah ewen, “Keleh itah mantehau Rebeka tuntang misek tiroke.”

⁵⁸Balalu ewen mantehau Rebeka tuntang misek, “En handak ikau omba oloh toh?” Tombah oloh bawi te, “Yoh, aku handak.”

⁵⁹Palus ewen manyoho Rebeka tuntang pelayae haguet omba rewar Abraham tuntang kare oloh ayue. Ewen mamberkat Rebeka dengan kare auh toh, “Keleh, Rebeka jadi indu bajuta-juta oloh! Keleh turonam mampakalah kare lewun musohe!”

⁶⁰

⁶¹Limbah te Rebeka batatap tuntang kare oloh bawi tabela je jadi pelayae, palus mandai onta tuntang haguet manuntut rewar Abraham te.

⁶²Hong katika te kea Isaak jari dumah bara[46] padang pasir, mahalau kalin danum je inyewut “Ie Je Manantuani Aku” Ie melai hong hila salatan Kanaan.

⁶³Sinde katika metoh andau halemei ie balua bara kemahe handak manajo-nanjong intu tana, palus gitae kare onta dumah.

⁶⁴Metoh Rebeka mite Isaak, ie mohon bara ontae,

⁶⁵tuntang misek rewar Abraham te, “Eweh oloh hatue hong tana te je dumah manintu itah?” “Ie tuangku,” tombah rewar te. Palus Rebeka manduan sanduronge tuntang manutup baue.

⁶⁶Limbah te rewar te manyarita akan Isaak kare taloh je jari ilaluse.

⁶⁷Balalu Isaak mimbit Rebeka tame akan huang kemah Sarah indue. Isaak kawin dengan Rebeka, ie sinta Rebeka. Balalu kapehen atei Isaak awi pampatei indue te iampong.