Read Ngaju GENESIS 25 Bible Online

GENESIS 25 - Ngaju bible

GENESIS 25

¹Abraham kawin tinai dengan ije biti oloh bawi je arae Ketura.

²Sawae te manak kare anak je arae: Simran, Yeksan, Medan, Midian, Isbak tuntang Suah.

³Yoksan bapa Seba tuntang Dedan. Turonan Dedan iete oloh Asur, oloh Letus tuntang oloh Leum.

⁴Kare anak Midian iete: Epa, Eper, Henokh, Abida tuntang Eldaa. Ewen uras turonan Ketura.

⁵Aloh Abraham mawaris kare ramoe akan Isaak,

⁶katahin pambelome ie manenga are panenga akan kare anak je dinoe bara kare sawae je beken. Limbah te inyohoe kare anake te bindah akan tanah hila timor Kanaan, mangat mangejau ewen bara anake Isaak.

⁷Abraham matei metoh umure jari bakas, iete 175 nyelo.

⁹Ie ingubur awi kare anake, iete Isaak tuntang Ismael, intu goha Makhpela je intu tana hila timor Mamre. Bihin tana te ayun Epron anak Sohar, oloh Het,

¹⁰ tahi jari imili Abraham bara olon Het te. Sarah sawan Abraham kea ingubur hete.

¹¹Limbah Abraham matei, Hatalla mamberkat Isaak, anak Abraham. Metoh te Isaak melai tokep kalin danum je bagare “Ie Je Manantuani Aku.”

¹²Ismael iete anak Abraham ewendue Hagar, bawin oloh Misir, jipen Sarah te.

¹³Ismael aton anake due walas biti. Kare anake te manumon gilire inakan: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Napis tuntang Kedma. Kare anake te jadi tato hiang due walas bangsa. Kampung tuntang kemah eka ewen bapodok inampa arae manumon kare aran ewen.

¹⁷Umur Ismael 137 nyelo metoh ie matei.

¹⁸Turonae melai hong tanah helat Hawila dengan Sur intu hila timor Misir manintu Asur. Ewen belom hapisah bara turonan Abraham je beken.

¹⁹Toh rinting Isaak, anak Abraham.

²⁰Isaak epat puluh nyelo umure metoh ie kawin dengan Rebeka, andi Laban, anak Betuel, ije biti oloh bara Mesopotamia.

²¹Awi Rebeka jaton dinon anak, Isaak balakudoa intu TUHAN tagal sawae. TUHAN manarima lakudoan Isaak, palus Rebeka batihi.

²²Ie manihi anak tatop due. Helo bara kare anak te inakan, ewen hagian huang kanaie. Koan Rebeka, “Mbuhen taloh toh balalu manjadi akangku?” palus ie balaku pansanan bara TUHAN.

²³ TUHAN hamauh dengae, “Due bangsa aton huang kanaim; ikau kareh manak due bangsa je hamusoh; andie labih gancang bara kakae, je bakas mamenda je busu.”

²⁴Te sampai katikae Rebeka luas, ie manak tatop due iete due biti anak hatue.

²⁵Je bakas bahanda-handang ampin pupuse, upake kilau jubah je habulu. Awi te ie inampa arae Esau.[47]

²⁶Metoh anak je kadue inakan, lenge mimbing takir Esau. Awi sabab te ie inampa arae Yakob.[48] Umur Isaak 60 nyelo metoh ewen inakan.

²⁷Kadue-due anak te sasar hai, Esau jadi oloh pamandop je pintar tuntang mangumbang hapus janah. Tapi Yakob oloh je suni-suni tuntang rajin melai intu huma.

²⁸Isaak labih sayang dengan Esau, awi Isaak rajin kuman isin meto dinon Esau mandop. Tapi Rebeka labih sayang dengan Yakob.

²⁹Sinde andau metoh Yakob kanjerae mampakasak johon kacang bahandang, te Esau dumah bara janah. Ie balau.

³⁰Kuae dengan Yakob, “Aku balau toto laku isut johon kacang bahandang te.” (Awi te ie inyewut Edom.)[49]

³¹Tombah Yakob, “Yoh, asal ikau manenga helo pangkat kabakasm.”

³²Koan Esau, “Aku dia paduli pangkat te. Aku balau bakamatei!”

³³ Koan Yakob tinai, “Keleh sumpah helo je ikau manenga pangkat kabakasm te akangku.” Esau sumpah tuntang manenga pangkat kabakase akan Yakob.

³⁴Limbah te Yakob manenga akae rote tuntang belahe bara johon kacang bahandang te. Esau kuman tuntang mihop. Kalote Esau dia paduli pangkat kabakase.