Read Ngaju GENESIS 26 Bible Online

GENESIS 26 - Ngaju bible

GENESIS 26

¹Intu tanah te lembut tinai lau kilau je manjadi hong jaman Abraham. Isaak manaharep Abimelekh, rajan oloh Pilistin intu Gerar. Ie balaku uka tau melai intu hete.

²Taloh te ilakue awi TUHAN jari mamparahan arepe dengae tuntang hamauh, “Ela haguet akan Misir; keleh melai hong lewu toh, kilau je jari irentah-Ku akam.

³ Aku handak mangalindong tuntang mamberkat ikau. Hapus tanah toh inenga-Ku akam tuntang akan turonam. Aku handak malalus janjing-Ku je jari inenga-Ku akan Abraham bapam.

⁴Aku handak manenga akam anak eso kilau bintang intu langit, tuntang hapus tanah toh handak inenga-Ku akan ewen. Salepah bangsa hong kalunen kareh balaku dengang-Ku mangat Aku mamberkat ewen kilau Aku jari mamberkat turonam.

⁵Aku handak mamberkat ikau, awi Abraham jari manumon auh-Ku tuntang mahaga kare tukas tuntang parentah-Ku.”

⁶Kalote Isaak melai hong Gerar.

⁷ Metoh kare oloh hete misek tahiu Rebeka, Isaak tombah je ie te andie, dia ia sawae. Isaak mikeh kare oloh te kareh mampatei ie hapan mandino Rebeka je paham bahalap te.

⁸Limbah Isaak melai hete pire-pire katahie, sinde andau raja Abimelekh nampayah bara baunsengoke, palus gitae Isaak kanjerae hureh dengan Rebeka.

⁹Palus ie mantehau Isaak tuntang hamauh, “Diakah oloh bawi te puna sawam? Mbuhen ikau mansanan ie andim?” Tombah Isaak, “Tiroku, aku kareh impatei amon mansanan je ie te sawangku.”

¹⁰“Narai je jari iawim dengan ikei,” koan Abimelekh. “Ije biti bara oloh ayungku tau ih marantep sawam. Amon taloh te manjadi, ikau je mananggong kare kasalan ikei te.”

¹¹Palus Abimelekh mampingat hapus oloh ayue, koae, “Ewe-eweh je mangapehe oloh toh atawa sawae, kareh ihukum matei.”

¹²Isaak manawor paung hapa nguan taloh imbul hong lewu te. Hong nyelo te ie mandino hasil seratus lipet bara je inawore, awi TUHAN mamberkat ie.

¹³Panataue sasar mandahang, palus ie paham tatau.

¹⁴Oloh Pilistin bahiri dengae, awi ie aton kare reware, kare tabiri tuntang sapi.

¹⁵Balalu ewen manawon hapan petak uras kare kalin danum je jari ingali awi kare rewar Abraham metoh ie magon belom.

¹⁶Palus Abimelekh hamauh dengan Isaak, “Keleh haguet bara lewun ikei. Ikau jari labih kuasa bara ikei.”

¹⁷Balalu Isaak haguet tuntang mampendeng kemah intu janah Gerar. Hete ie melai pire-pire katahie.

¹⁸Ie mangali haluli kare kalin danum je jari ingali hong jaman Abraham tuntang je jari inawon awi oloh Pilistin limbah Abraham. Kare kalin danum te inampa arae sama dengan aran je inenga bapae.

¹⁹Kare rewar Isaak manampa kalin danum hong janah Gerar te, palus sondau danum malabien karee.

²⁰Tapi kare sakatik hong Gerar hakaridu dengan kare sakatik ain Isaak. Koan ewen, “Danum toh ayun ikei.” Awi te Isaak manampa aran kalin danum te “Karidu.”

²¹Kare rewar Isaak manampa kare kalin danum je beken tinai, palus ewen manakian kalin danum te kea. Awi te, Isaak manggare kalin danum te “Kamusoh”.

²²Limbah te ewen bindah bara hete tuntang mangali kalin danum je kateloe. Sinde toh jaton karidu. Awi te Isaak manampa aran kalin danum te “Kamardeka”. Koae, “Toh TUHAN jari manenga akan itah kamardeka melai hong lewu toh, itah kareh sanang intu hetoh.”

²³Limbah te Isaak haguet palus sampai intu Berseba.

²⁴Hong alem te TUHAN mamparahan arepe dengae hayak hamauh, “Aku toh Hatallan bapam Abraham. Ela mikeh; aku mangalindong ikau. Aku handak mamberkat tuntang manenga akam turonan je are tagal janjing-Ku akan rewar-Ku Abraham.”

²⁵Palus Isaak mampendeng mesbeh tuntang manyembah TUHAN intu eka te. Ie mampendeng kemah hete tuntang kare reware manampa kalin danum je beken.

²⁶ Sinde andau Abimelekh dumah bara Gerar, dengan Ahusat, panasehat ayue, tuntang Pikhol, kapala tantarae, handak manyondau Isaak.

²⁷Isaak misek, “Mbuhen keton dumah manyondau aku toh, padahal bihin keton malawan tuntang maharak aku bara lewun keton?”

²⁸Palus ewen tombah, “Toh ikei katawan je TUHAN mangalindong ikau tuntang toh ikei manirok keleh ikei mampendeng janji. Keleh sumpah

²⁹je ikau dia handak mawi kapapa dengan ikei, kilau ikei kea dia puji mawi kapapa dengam. Ikei tetep bahalap dengam tuntang nalua ikau haguet dengan kasanang. Jadi tarang akan ikei je TUHAN mamberkat ikau.”

³⁰Limbah te Isaak manyarongan ewen, palus ewen kuman tuntang mihop.

³¹Hanjewu jewue genep biti manyewut janji je jari indehen hapan sumpah. Palus Isaak manyewut selamat jalan akan ewen tuntang ewen hapisah kilau sobat.

³²Andau te kea kare rewar Isaak dumah tuntang mansanan akae tahiu kalin danum je jari inampa ewen. Koan ewen, “Ikei jari dinon danum.”

³³Balalu Isaak manampa aran kalin danum te “Sumpah”. Jete tamparae lewu te inyewut Berseba. [50]

³⁴Metoh Esau epat puluh nyelo umure, ie kawin dengan due oloh bawi bara bangsa oloh Het, iete Yudit anak Beri, tuntang Basmat anak Elon.

³⁵Kadadue oloh bawi te mawi kasusah pambelom Isaak tuntang Rebeka.