Read Ngaju GENESIS 28 Bible Online

GENESIS 28 - Ngaju bible

GENESIS 28

¹Limbah te Isaak mantehau Yakob, palus mamberkat ie hayak hamauh, “Ela ikau kawin dengan bawin oloh Kanaan.

²Lius haguet akan Mesopotamia, akan human buem Betuel. Palus keleh ikau kawin dengan ije bara kare anak mamam Laban.

³Keleh Hatalla, Je Jaton Tikas Kuasae mamberkat pangawim, tuntang manenga akam anak eso je are, sampai ikau jadi tato hiang kare bangsa!

⁴ Keleh TUHAN mamberkat ikau tuntang turonam, kilau Ie jari mamberkat Abraham. Tuntang keleh ikau jadi tempon tanah je ekam melai toh, je jari inenga Hatalla akan Abraham!”

⁵Kalote Isaak malapas Yakob haguet akan Mesopotamia, akan Laban, anak Betuel oloh Aram te. Laban te kaka Rebeka indu Yakob tuntang Esau.

⁶Esau mahining je Isaak jari mamberkat Yakob tuntang malapas ie haguet akan Mesopotamia uka manggau oloh bawi hete akan indu kabalie. Tinai hong katika Isaak mamberkat Yakob, ie mangahana Yakob kawin dengan bawin oloh Kanaan.

⁷Beken bara te Esau katawan je Yakob manumon auh indu bapae tuntang jari haguet akan Mesopotamia.

⁸Palus haratin Esau je Isaak, bapae, dia rajin dengan bawin oloh Kanaan.

⁹Tagal te Esau haguet manalih Ismael, anak Abraham, tuntang kawin dengan anak Ismael je bagare Mahalat andi Nebayot.

¹⁰Yakob malihi Berseba tuntang haguet akan Haran.

¹¹Metoh matanandau belep ie sampai intu ije eka,[53] palus baramalem intu hete. Ie menter handak batiroh; takoloke habantal ije batu.

¹² Palus ie nupi je ie mite ije tangga mendeng intu petak tuntang lawie sampai akan langit tuntang kare malekat mohon mandai intu tangga te.

¹³ Intu balikate[54] mendeng TUHAN tuntang hamauh, “Aku TUHAN, Hatalla je inyembah Abraham tuntang Isaak. Aku handak manenga akam tuntang akan turonam tanah je ekam menter toh.

¹⁴ Turonam kareh karee kilau kawo hong petak. Ewen kareh mampalombah eka ewen akan hete-hete. Hajamban ikau tuntang turonam, Aku handak mamberkat kakare bangsa[55] hong hunjun petak.

¹⁵Ingat, Aku handak mandohop tuntang mangalindong ikau, akan kueh bewei ikau haguet tuntang Aku akan mimbit ikau haluli akan tanah toh. Aku dia akan malihi ikau sampai Aku jari malalus kakare taloh je injanji-Ku akam.”

¹⁶Balalu Yakob misik bara tirohe tuntang hamauh, “TUHAN aton intu eka toh, tapi haroe katika toh aku mangatawae!”

¹⁷Ie lembut kikehe balalu hamauh, “Eka toh bakaike-ikeh! Batantu jetoh human Hatalla, bauntonggang sorga.”

¹⁸Hanjewu jewue, Yakob harikas palus manduan batu je hapae akan bantale tuntang mampendenge jadi batu pampingat. Ie manusoh undus hong hunjun batu te uka imbaris akan Hatalla.

¹⁹Eka te inggare Betel.[56] (Solake arae Lus).

²⁰Palus Yakob sumpah, “Amon TUHAN mandohop tuntang mangalindong aku hong jalanangku toh hayak manenga akangku panginan tuntang pakaian,

²¹sampai aku buli akan human bapaku dengan salamat, TUHAN kareh manjadi Hatallangku.

²²Palus aku kareh manenga akan TUHAN sapersapuluh taloh je inenga TUHAN akangku. Batu pampingat je impendengku toh kareh jadi eka manyembah TUHAN.”