Read Ngaju GENESIS 29 Bible Online

GENESIS 29 - Ngaju bible

GENESIS 29

¹Yakob marajur pangguete palus manintu akan lewu intu hila timor Kanaan.

²Salenga gitae ije kalin danum hong janah, tuntang tokep hete aton menter telo kawan tabiri je patoh impihop hete. Kalin danum te tatutup awi batu hai.

³Amon uras kawan tabiri jari imumpong hete, kare sakatik manggaling batu te akan balikat, palus tabiri te impihop. Limbah te kare sakatik manutup kalin danum te haluli.

⁴Palus Yakob misek kare sakatik je aton hete, “O, pahari, bara kueh keton toh?” “Bara Haran,” tombah ewen.

⁵Yakob misek tinai, “En keton kasene dengan Laban anak Nahor?” “Kasene,” tombah ewen.

⁶“Kilen ampie?” Yakob misek tinai. “Bahalap ih,” tombah ewen. “Item, te anake je bawi, arae Rahel. Ie dumah mimbit kawan tabirin bapae.”

⁷Koan Yakob, “Andau magon ambo tuntang hindai katikae tabiri inamean akan karambange. Mbuhen kare meto te dia keton mampihope, balalu mimbite kuman oru tinai?”

⁸Tombah ewen, “Ikei haron tau mampihop kare tabiri te amon uras kare kawan tabiri jari hapumpong hetoh tuntang batu je manutupe jari inggaling.”

⁹Metoh Yakob bapander dengan ewen, Rahel dumah dengan kawan tabirie.

¹⁰Sana Yakob mite Rahel hayak kawan tabirie te, Yakob manalih kalin danum te, palus manggaling batu je manutupe akan balikat palus mampihop kawan tabiri te.

¹¹Limbah te ie manyium Rahel, tuntang manangis awi kapaham angat kataharoe.

¹²Koae dengan Rahel, “Aku anak Rebeka, paharin bapam.” Balalu Rahel hadari buli akan humae hayak manyarita taloh te akan bapae.

¹³Sana Laban mahining kabar tahiu Yakob, akee te, ie palus hadari handak manyondaue. Laban mamalok Yakob tuntang manyiume, palus mibite tame huma. Limbah Yakob manyarita kare perkarae akan Laban,

¹⁴Laban hamauh, “Toto, ikau puna isi dahangku.” Yakob melai intu huma te jadi ije bulan katahie.

¹⁵Sinde andau Laban hamauh dengan Yakob, “Dia patut ikau bagawi omba aku kalote bewei, baya awi ikau kolangku. Pire upah je ingahandakm?”

¹⁶Laban te aton anake due biti bawi; je bakas arae Lea, tuntang andie arae Rahel.

¹⁷Lea bahalap ampin matae,[57] tapi Rahel bahalap ampin bitie tuntang baue.

¹⁸Yakob sinta Rahel, tagal te ie tombah auh Laban, “Aku nahuang bagawi katahin uju nyelo amon mama maku aku kawin dengan Rahel.”

¹⁹Koan Laban, “Labih bahalap aku manenga ie akam bara akan oloh beken; yoh melai ih intu hetoh.”

²⁰Palus Yakob bagawi katahin uju nyelo mangat dinon Rahel. Akae kare nyelo te mahalau kilau pire-pire andau ih, awi sintae dengan oloh bawi te.

²¹Limbah te Yakob hamauh dengan Laban, “Uju nyelo jari halau; soho aku kawin dengan anak mama.”

²²Palus Laban mawi pesta kawin hayak marawei kakare oloh intu lewu te.

²³Tapi hong alem te, dia Rahel, tapi Lea je iagah Laban akan Yakob, palus Yakob marantep ie. (

²⁴Laban manenga reware je bawi akan Lea, akan indu reware).

²⁵Harun andau jewue Yakob katawan je ie ingawin dengan Lea. Palus Yakob manalih Laban tuntang hamauh, “Mbuhen mama mawi aku kilau toh? En dia aku bagawi mangat dinon Rahel? Mbuhen mama manipu aku?”

²⁶Tombah Laban, “Manumon hadat hetoh, andie dia tau kawin helo bara kakae.

²⁷Entai sampai lepah pesta uju andau pangawin toh, aku akan manenga kea Rahel te akam, asal ikau maku bagawi uju nyelo tinai.

²⁸Yakob maku, tuntang limbah pesta te lepah, Laban manenga akae Rahel jadi sawae. (

²⁹Laban manenga rewar bawi je arae Bilha akan Rahel, mangat jadi reware.)

³⁰Yakob marantep Rahel kea, tuntang ie labih sinta Rahel bara Lea. Limbah te ie bagawi uju nyelo tinai.

³¹Metoh Hatalla mite je Lea dia lalau inyinta kilau Rahel, TUHAN mawi Lea manak, tapi Rahel tetep dia dinon anak.

³²Lea batihi palus manak ije anak hatue. Koae, “TUHAN jari mite kasusahku, maka toh banangku handak sinta aku.” Balalu ie manenga aran anake te Ruben.[58]

³³Lea batihi tinai balalu manak ije anak hatue. Koan Lea, “TUHAN jari manenga akangku anak toh tinai awi hininge je aku dia inyinta.” Palus manenga aran anake te Simeon.[59]

³⁴Lea batihi tinai balalu manak ije anak hatue. Koae “Toh banangku handak labih heret dengangku awi aku manak telo anak hatue.” Palus ie manenga aran anake te Lewi.[60]

³⁵Limbah te Lea batihi tinai tuntang manak ije anak hatue. Koae, “Sinde toh aku handak manara TUHAN.” Balalu ie manenga aran anake te Yuda.[61] Limbah te Lea dia manak tinai.