Read Ngaju GENESIS 3 Bible Online

GENESIS 3 - Ngaju bible

GENESIS 3

¹ Handipe iete meto je paling pangalintar bara kare meto je inampa Hatalla. Handipe te misek oloh bawi te, “En Hatalla toto mangahana keton kuman bua bara kare batang bua hong kabon toh?”

²“Ikei tau bewei kuman bua bara kare batang bua hong kabon toh,” tombah oloh bawi te,

³“baya bara batang je hong bentok kabon. Hatalla mangahana ikei kuman bua bara kare batang te atawa manigonge, amon ikei mawie ikei matei.”

⁴Handipe te tombah, “Dia toto; keton dia baka matei.

⁵Hatalla mansanan jete awi Ie katawan amon keton kuman bua te, batantu tirok pikir keton impatarang; keton batantu jadi sama kilau Hatalla [9] tuntang katawan narai taloh je bahalap tuntang taloh je papa.” [10]

⁶Oloh bawi te manampayah je batang bua te bahalap, tuntang ampin buae mangat akan indu kinan. Tuntang ie manirok bahalap toto amon ie tau manjadi oloh je pintar harati. Awi te ie mamutik buae, palus kumae, tuntang manengae kea akan banae tuntang banae mahin kumae kea.

⁷Limbah kuman bua te, tirok pikir ewen balalu impatarang tuntang ewen katawan je ewen halowai. Awi te ewen manutup bitin ewen mahapan dawen kayu ara je inyemat ewen.

⁸Halemei te ewen mahining Hatalla mananjong hong kabon. Ewen due palus manyahokan arepe marak kare upon kayu mangat dia gitan awi Hatalla.

⁹Tapi Hatalla mantehau oloh hatue te, “Hong kueh ikau?”

¹⁰Oloh hatue te tombah, “Aku mahining Ikau hong kabon; aku mikeh, palus aku manyahokan arepku awi aku halowai.”

¹¹“Eweh je mansanan akam je ikau halowai?” koan Hatalla. “En ikau jari kuman bua je ingahanaku ikau kumae?”

¹²Oloh hatue te tombah, “Oloh bawi je inengam mangawal aku te, jari manenga bua te akangku, palus aku kumae.”

¹³ Hatalla misek oloh bawi te, “Mbuhen ikau mawi taloh kilau te?” Tombah ie, “Aku buah tipu awi handipe, palus aku kuman bua te.”

¹⁴Limbah te Hatalla hamauh dengan handipe te, “Ikau ihukum awi gawim te; bara kare meto ikau ih je mananggong sapa toh: Nampara toh ikau manggayar hapan kanaim, tuntang kuman tunek petak katahim belom.

¹⁵ Ikau akan hakasingi dengan oloh bawi toh. Turonae kareh akan mamparotek takolokm, tuntang ikau akan manotok takir ewen.”

¹⁶Palus Hatalla hamauh dengan oloh bawi te, “Aku akan mandahang kapehem metoh ikau batihi tuntang metoh ikau luas. Tapi aloh kalote, ikau tetep nahuang dengan banam, tuntang ikau akan manumon auhe.”

¹⁷ Balalu Hatalla hamauh dengan oloh hatue te, “Ikau mahining auh sawam palus kuman bua je ingahanaku ikau kumae. Awi gawim te maka petak jari tarasapa. Ikau musti bagawi bahimat katahim belom uka petak toh manenga asil je sukup indu kinam.

¹⁸Kare onak duhi kareh lembut hong petak tuntang kare oru harayap kareh indu kinam.

¹⁹Ikau akan bagawi bahimat tuntang dengan bebes baum mangat petak toh tau mampalembut asile, sampai ikau haluli buli petak tinai, awi puna bara petak ikau inampa. Ikau inampa bara petak, tuntang haluli buli petak tinai.”

²⁰Adam [11] manggare sawae Hawa,[12] awi oloh bawi te jadi indu kakare bangsa oloh.

²¹Maka Hatalla manampa pakaian bara upak meto akan Adam tuntang sawae, palus mangkepae intu ewen.

²² Hatalla hamauh, “Toh olon jari sama kilau itah awi ewen aton pangatawan tahiu taloh je bahalap tuntang taloh je papa. Awi te ie patut ihakan uka ela sampai ewen kuman bua batang je manenga pambelom, mangat ie ela belom sampai katahie.”

²³Maka Hatalla maharak olon bara kabon Eden tuntang manyoho ewen nguan petak je puna asal ewen.

²⁴Limbah te, hila timor kabon te hong bauntonggang jalan tame, Hatalla mingkes kare kerub, [13] tuntang ije padang je mangilat manintu eka te, mangat jaton ije biti oloh je tau tame manokep batang pambelom te.