Read Ngaju GENESIS 30 Bible Online

GENESIS 30 - Ngaju bible

GENESIS 30

¹Tapi Rahel hindai kea dinon anak. Awi te ie bahiri dengan kakae, palus koae dengan Yakob, “Tenga anak akangku, amon dia, aku kareh matei.”

²Yakob malait Rahel tuntang hamauh, “Aku toh dia Hatalla. Ie je tau mawi ikau dinon anak.”

³Palus koan Rahel, “Toh rewarku Bilha; keleh marantep ie mangat ie manak. Kalote aku tau jadi indu tagal ie.”

⁴Palus ie manenga Bilha akan banae. Yakob marantep reware te.

⁵Bilha batihi palus manak ije anak hatue.

⁶Koan Bilha, “Hatalla jari mamutus akan gunan itah. Keleh hining lakudoangku tuntang keleh nenga ije biti anak hatue akangku.” Palus inampae aran anak te Dan.[62]

⁷Bilha batihi tinai tuntang manak ije biti anak hatue.

⁸Koan Rahel, “Aku jari bahimat malawan kakaku, toh aku manang.” Awi te inampae aran anak te Naptali.[63]

⁹Metoh Lea mangkeme arepe je ie dia tau dinon anak hindai, inengae reware, iete Silpa akan Yakob mangat jadi sawae.

¹⁰Silpa manak ije biti anak hatue.

¹¹Koan Lea, “Aku ontong,” palus inampae aran anak te Gad.[64]

¹²Silpa manak ije biti anak hatue tinai,

¹³tuntang Lea hamauh, “Hai kasanangku! Toh uras oloh bawi kareh manyewut aku sanang.” Balalu ie manampa aran anak te Aser. [65]

¹⁴Hong wayah getem, Ruben haguet akan janah; intu hete ie sondau taloh tumbo intu petak je tau jadi ramon tatamba,[66] palus iimbite akan indue, Lea. Rahel hamauh dengan Lea, “Tenga akangku isut ramon tatamba je inyondau awi anakm te.”

¹⁵Tombah Lea, “En hindai sukop ikau manduan banangku? Toh ikau mahin handak kea manduan ramon tatamba je inyondau anakku.” Koan Rahel, “Amon ikau maku manenga ramon tatamba anakm te akangku, ikau tau marantep Yakob alem toh.”

¹⁶Metoh Yakob buli akan huma bara janah halemei te, Lea manambange hayak hamauh, “Keleh marentap aku alem toh awi aku jari mambayar te hapan ramon tatamba bara anakku.” Palus Yakob marantep ie alem te.

¹⁷Hatalla mahining auh Lea; ie batihi palus luas anak je kalime.

¹⁸Koan Lea, “Hatalla jari manenga akangku upah awi aku jari manyarah Silpa akan banangku.” Awi te inampae aran anak te Isaskar.[67]

¹⁹Lea batihi tinai tuntang manak anake je kajahawen.

²⁰Koae, “Hatalla jari manenga akangku panenga je bahalap toto. Toh banangku kareh marega aku, awi te aku manak jahawen biti anak hatue,” awi te ie manampa aran anak te Sebulon.[68]

²¹Limbah te Lea manak ije biti anak bawi je inampae arae Dina.

²²Palus Hatalla mingat Rahel; Hatalla mahining lakudoae tuntang mawi ie tau manak.

²³Palus Rahel batihi tuntang manak ije biti ahak hatue. Koan Rahel, “Hatalla jari mampanihau katawahku.

²⁴Keleh TUHAN manenga akangku ije biti anak hatue tinai.” Awi te ie manampa aran anak te Yosep. [69]

²⁵Limbah Rahel manak Yosep, Yakob hamauh dengan Laban, “Aku balaku uka tau buli akan lewungku.

²⁶Lapas aku dengan kadadue sawangku hayak kare anakku. Ewen jari dinongku awiku bagawi omba mama. Mama katawan, aku jari bagawi bahimat.”

²⁷Laban misek ie, “Hining helo. Aku mandino tujum je TUHAN jari mamberkat aku tagal ikau.

²⁸Suman wei pire je lakum.”

²⁹Tombah Yakob, “Mama kabuat katawan je aku jari bagawi bahimat, tuntang meto ain mama sasar are awi pahagangku.

³⁰Helo bara aku dumah, ramon mama dia sapire karee. Tapi toh mama jari tatau. TUHAN jari mamberkat mama awi tege aku. [70] Toh sampai katikae aku bagawi akan keluargaku kabuat.”

³¹Koan Laban, “Balalu narai je patut inengaku akam?” Tombah Yakob, “Dia usah manenga narai-narai. Aku handak tetep mahaga meto ayun mama, asal mama maku manumon auhku toh:

³²Andau toh aku handak mananjong hong bentok kare kawan tabirin mama; balalu aku manduan genep anak tabiri je babilem,[71] hayak te kea genep anak kambing tabela je habelang atawa harintik. Te ih upah je ilakuku.

³³Rahian mangat mama katawan en aku dia bujur. Awi amon mama dumah handak mariksa upahku, hayak mite aton kambing je dia harintik atawa habelang, atawa tabiri je dia babilem, mama kareh mangatawan je meto te jari inakauku.”

³⁴Laban tombah, “Satuju! Itah handak malalus taloh je koam te!”

³⁵Tapi hong andau te Laban mamisah uras kambing hatue je hasuring atawa habelang, harintik, atawa je aton bintik baputie; ie kea mamisah uras tabiri je babilem. Limbah te inyohoe kare anake manantuani kare meto te.

³⁶Ewen balalu haguet dengan kare meto te mangejaue bara Yakob, kekejaue tanjong telo andau. Tisan kawan tabiri ayun Laban ihaga awi Yakob.

³⁷Palus Yakob manduan kare edan bahijau bara batang kayu parara, kayu kanari, tuntang kayu armon. Ie mangupak belahe bara upake sampai jadi habelang.

³⁸Andake kare endan te intu baun kawan kambing te, intu ekae mihop. Awi kare meto te rajin kawin metoh handak mihop.

³⁹Te amon kare kambing te kawin intu baun kare edan te, anake hasuring atawa habelang atawa harintik.

⁴⁰Limbah te Yakob manduan kare tabiri palus mampendenge hataharep dengan kare kambing je hasuring tuntang je babilem. Kalote ie mandino kawan metoe kabuat hayak mamisahe bara kawan meto ain Laban.

⁴¹Amon kare meto je abas kanjerae kawin, Yakob mingkes kare edan je ingupake te intu taharep ewen, intu eka danum ihope.

⁴²Tapi ie dia mingkes kare edan te intu tahareb meto je balemo. Te uras meto je baputi te balemo, jete ayun Laban. Tapi uras meto je babilem, habelang tuntang harintik je abas, jete ayun Yakob.

⁴³Kalote Yakob jari tatau toto. Ayue are kawan tabiri, onta, kalidai tuntang rewar.