Read Ngaju GENESIS 31 Bible Online

GENESIS 31 - Ngaju bible

GENESIS 31

¹Yakob mahining kare anak Laban hakotak kilau toh: “Yakob jari manduan kare panatau ayun bapa itah. Uras panataue bara panatau bapa itah.”

²Yakob nampayah kea je Laban te jari jaton kataue dengae kilau bihin.

³Palus TUHAN hamauh dengan Yakob, “Lius buli lewun bapam tuntang tundah paharim. Aku kareh mangalindong ikau.”

⁴Limbah te Yakob manyoho oloh mansanan akan Rahel tuntang Lea mangat hasondau dengae hong janah, intu eka kare kawan tabirie.

⁵Koan Yakob dengan ewen, “Aku mite je bapam jari jaton kajentae tinai dengangku; tapi Hatalla je inyembah bapaku mangalindong aku.

⁶Keton due katawan je aku jari bagawi omba bapa keton salepah kaabasku.

⁷Aloh kalote aku jari inipue tuntang iobahe upahku sampai sapuluh tingkat. Tapi Hatalla dia manalua ie mawi kapapa dengangku.

⁸Metoh bapam hamauh, ‘Kambing je harintik indu upahm,’ te hapus kawan meto manak anak je harintik. Metoh ie hamauh, “Kambing je habelang indu upahm,” te hapus kawan meto te manak anak je habelang.

⁹Kalote Hatalla jari manduan kawan meto ayun bapam palus manenga jete akangku.

¹⁰Metoh wayah meto te kawin, aku nupi mite hapus kambing hatue je kanjerae kawin te hasuring, harintik tuntang habelang.

¹¹Palus Hatalla je manyarowa ampin malekat hamauh dengangku hong nupi te, Ie hamauh, ‘Yakob!’ Te aku tombah, ‘Toh aku.’

¹²Malekat te hamauh tinai, ‘Item, hapus kambing je kanjerae kawin te hasuring, harintik tuntang habelang. Tantai iawiku te akam awi aku mite kakare taloh je iawi Laban dengam.

¹³ Aku Hatalla je jari mamparahan arep-Ku akam hong Betel. Hete ikau jari maluput parapah ije batu pampingat hayak manusoh undus hunjue. Hete kea ikau sumpah dengangku. Toh lius buli lewu ekam inakan.’ ”

¹⁴Palus Lea tuntang Rahel tombah, “Jaton bagi tinai bara panatau bapa ikei je handak iwaris awi ikei.

¹⁵Ie jari mitong ikei kilau oloh. Ie jari manjual ikei tuntang taloh je jari inarimae te, jari impalepahe kea.

¹⁶Hapus panatau je jari induan Hatalla bara bapa ikei sapunae ayun ikei tuntang ayun kare anak ikei. Lalus taloh je inyoho Hatalla akam.”

¹⁷Yakob balalu batatap handak buli manalih bapae intu tanah Kanaan. Ie manggatang kare sawae tuntang kare anake lompat akan hunjun onta. Imbite kea hapus kawan tabiri tuntang taloh je jari dinoe hong Mesopotamia.

¹⁸

¹⁹Metoh te Laban aton hong janah kanjerae manggunting bulun kare tabirie. Awi te Rahel sampet manakau hampatong pangalindong keluarga[72] bapae.

²⁰Yakob mamikir Laban hapan gawie je dia mansuman pangguete.

²¹Ie manduan kakare ramoe palus haguet kaje-kajeng. Ie dimpah sungei Euprat balalu manintu tanah bukit Gilead.

²²Harue telo andau limbah te oloh mansanan akan Laban tahiu Yakob je jari hadari.

²³Palus Laban mamumpong kare oloh ayue tuntang haya-hayak manggoang Yakob, uju andau katahie harue olih jake intu tanah bukit Gilead.

²⁴Hong hamalem Hatalla manalih Laban intu nupie, hayak hamauh, “Awas ela samasinde ikau mawi Yakob hapan auh, aloh ije kabawak kotak.”

²⁵Metoh te Yakob jari mampendeng kemahe hong ije bukit. Limbah te hong ije bukit je beken intu eka te kea Laban dengan kare oloh ayue mampendeng kemahe.

²⁶Limbah te Laban hamauh dengan Yakob, “Mbuhen ikau mamikir aku tuntang manamput kare anakku kilau tawanan parang?

²⁷Mbuhen ikau mamikir aku awim haguet suni-suni, dia mansuman? Amon ikau mansuman arepm, batantu aku manalua ikau haguet dengan kasanang atei, impahayak nyanyin musik tarabang tuntang kacapi!

²⁸Ikau mahin dia manenga katika akangku manyium anak esongku je akan hapisah. Humong toto gawim te!

²⁹Aku tau mawi kapapa dengam, tapi alem endau Hatalla je inyembah bapam mampingat aku mangat ela samasinde mampikeh ikau.

³⁰Katawangku je ikau haguet awim handak toto buli. Tapi mbuhen ikau manakau hampatong pangalindong keluargaku?”

³¹Palus tombah Yakob, “Aku haguet suni-suni awi mikeh mama kareh mangahana kare anak mama.

³²Tahiu hampatong te, amon mama sondau oloh hetoh je manakaue, ie kareh ihukum matei. Riksa, en aton ramo ayun mama hetoh. Amon aton, keleh duan. Oloh ain itah tau manyaksie.” Yakob dia katawan je Rahel manakau hampatong te.

³³Palus Laban haguet akan kemah Yakob mariksae. Limbah te ie manalih kemah Lea tuntang kemah due-due rewar bawi te, tapi ie dia sondau hampatong te. Kajariae ie tame kemah Rahel.

³⁴Tapi Rahel jari manduan hampatong te palus majoke huang kantong lapik onta, palus ie mondok hunjun lapik te.

³⁵Palus Rahel hamauh dengan bapae, “Ela bapa sangit, aku dia olih mendeng manambang bapa, awi aku kanjeran pali.” Laban manggau titi-titip tapi dia sondau hampatong te.

³⁶Te Yakob sangit, “Narai je papa je jari iawiku?” Kasangit paiseke, “Narai kasalangku sampai mama manggoang aku?

³⁷Toh, limbah mariksa hapus ramongku, en mama sondau ramo ain mama? Palua ramo te tuntang andak hetoh, mangat oloh ayungku tuntang oloh ayun mama tau mitee tuntang mamutus eweh bara itah je bujur.

³⁸Due puluh nyelo aku melai omba mama. Kare kawan kambing tuntang tabirin mama jari olih manak-manaka. Hindai puji aku kuman kambing hatue ayun mama aloh ije kongan bara meto ain mama.

³⁹Je matei kinan meto basiak dia puji imbitku akan mama, tapi inggantiku kabuat. Je inakau aloh handau atawa hamalem harajur ilaku mama mangat aku manggantie.

⁴⁰Kinjap aku imapui lasut andau tuntang awi kasadingen alem. Kinjap aku dia tau batiroh kea.

⁴¹Kalote ampingku metoh aku bagawi omba mama katahin duepuluh nyelo genep. Epat walas nyelo katahie aku bagawi mangat mandino due-due anak mama te. Tinai jahawen nyelo mangat dinon kawan tabiri te. Palus katahin te mama mobah upahku sampai sapuluh tingkat.

⁴²Jaka ih aku dia ingalindong awi Hatallan tato hiangku, iete Hatalla je inyembah Abraham tuntang Isaak, te mama batantu jari manyoho aku haguet baya mimbit tunjuk sapuluh. Tapi Hatalla nantuani kasusahku tuntang gawingku je jari ilalusku. Alem ndau ie jari manenga katukase.”

⁴³Balalu Laban tombah auh Yakob, “Due-due bawi te anakku; anak ewen te ayungku; kawan tabiri te ayungku kea. Toto, kare je gitangku hetoh ayungku. Tapi aku dia tau mawi taloh en-en mangat mangahana anak esongku.

⁴⁴Tagal te keleh itah mampendeng janji tuntang manyusun kare batu akan tanda te.”

⁴⁵Limbah te Yakob manduan ije batu tuntang mampendenge jadi batu pampingat.

⁴⁶Palus ie manyoho oloh ayue mamumpong batu akan ije toyok. Limbah te ewen kuman haya-hayak tokep toyok batu te.

⁴⁷Laban manenga aran toyok batu te Yegar-Sahaduta,[73] tapi Yakob manggaree Galed.[74]

⁴⁸Koan Laban dengan Yakob, “Toyok batu toh kareh jadi pampingat akan kue.” Jete sababe eka te arae Galed.

⁴⁹Laban hamauh kea, “Keleh TUHAN manantuani itah, kahum itah belom hakangkejau.” Awi te eka te inggare kea Mispa.[75]

⁵⁰Laban hamauh tinai, “Amon ikau mawi kapapa dengan kare anakku, atawa kawin dengan oloh bawi beken, aloh jaton je mangatawa, ingat, Hatalla manantuani itah.

⁵¹Toh batu je jari inoyok awiku, jetoh batu pampingat.

⁵²Aloh toyok jetoh, atawa batu pampingat te mampingat itah je aku dia tau manangkalau toyok toh uka mantakan ikau. Ikau kea dia tau manangkalau toyok toh tuntang batu pampingat toh uka mantakan aku.

⁵³Hatalla je inyembah Abraham tuntang bapaku Nahor[76] kareh indu hakim akan kue.” Palus Yakob sumpah tagal Hatalla je inyembah Isaak, bapae, hapan manggenep janjie.

⁵⁴Ie manyambalih ije kongan meto hayak malupute akan parapah intu hunjun bukit te. Palus iraweie kare oloh ayue akan pesta. Limbah kuman, ewen baramalem intu bukit te.

⁵⁵Hanjewu jewue, Laban manenga sium selamat jalan akan anak esoe. Ie mamberkat ewen, palus buli akan ekae melai.