Read Ngaju GENESIS 33 Bible Online

GENESIS 33 - Ngaju bible

GENESIS 33

¹Yakob mite Esau dumah hayak epat ratus oloh ayue. Awi te ie mambagi kare anake akan telo kabagi iete akan Lea, Rahel tuntang akan kadadue gundike.

²Ie mina kadadue gundike hayak kare anak ewen intu hila baun. Limbah te Lea dengan kare anake, tinai Rahel tuntang Yosep intu hila likut toto.

³Yakob manajong intu hila baun ewen samandiai, tuntang sambil manokep kakae, ie sontop menyembah sampai uju tingkat.

⁴Tapi Esau hadari manalih Yakob, balalu mamaloke tuntang manyiume. Kadadue oloh hampahari te sama-sama manangis.

⁵Metoh Esau mite kakare oloh bawi dengan kare anak te, ie misek, “Eweh ewen je aton dengam toh?” Tombah Yakob, “Kare anak te ayungku,” tombah Yakob, “Jete tengan Hatalla akangku.”

⁶Limbah kare gundik miar hayak kare anak ewen, ewen palus sontop manyembah.

⁷Lea manuntut hayak dengan kare anake, tuntang je pangkarahiae Yosep dengan Rahel manokep, balalu ewen uras sontop manyembah.

⁸Esau misek, “En kahandakm dengan kare kawan meto je hasondau dengangku endau?” Yakob tombah, “Jete hapa mampasanang atei kaka.”

⁹Tapi Esau hamauh, “Jari sukop panatauku, dia usah ih ikau manenga akangku.”

¹⁰Koan Yakob, “Ela! Amon aku jari manyanang atei kaka, keleh tarima panenga je iimbitku toh. Akangku, manampayah baun kaka sama kilau manampayah baun Hatalla, basa kaka tau toto dengangku.

¹¹Aku balaku, keleh tarima panenga je iimbitku toh. Hatalla jari bahalap ateie dengangku tagal kare taloh samandiai je imerluku.” Yakob jua-juan balaku sampai kajariae Esau manarima panenga te.

¹²Esau hamauh, “Keleh itah batatap mangat haguet, aku kareh mananjong helo hila baum.”

¹³Yakob tombah, “Kaka katawan je kare anak balemo, aku patut batawat dengan kakare meto je magon impatoso. Amon iimbit kaje-kajeng, aloh baya ije andau ih, te hapus kawan meto te kareh matei.

¹⁴Keleh mananjong labih helo, aku manuntut rahian rangka-rangkah. Aku kareh miar sakalepah kacapatku hayak dengan kare meto tuntang kare anakku toh sampai olih manjake kaka intu Edom.”

¹⁵Koan Esau, “Amon kalote, ayo ih aku mampelai dengam pire-pire oloh ayungku.” Tapi Yakob tombah, “Dia usah heka-heka, aku baya nahuang manyanang atei kaka.”[80]

¹⁶Kalote ampie andau te Esau haguet haluli akan Edom.

¹⁷Tapi Yakob haguet akan Sukot, palus mampendeng huma akae kabuat tuntang eka manyandehan akan metoe. Jete sababe eka te inggare Sukot.[81]

¹⁸Hong panjalanae bara Mesopotamia, te Yakob sampai dengan salamat intu lewu Sikhem hong tanah Kanaan, palus mampendeng kemahe hong ije janah tokep lewu.

¹⁹ Janah eka kemah te imilie bara oloh turonan Hemor, bapa Sikhem, je regae seratus duit perak.

²⁰Limbah te ie mampendeng mesbeh intu hete tuntang manampa arae “El, Hatallan Israel!”