Read Ngaju GENESIS 35 Bible Online

GENESIS 35 - Ngaju bible

GENESIS 35

¹ Sinde andau, Hatalla hamauh dengan Yakob, “Aku toh Hatalla je mamparahan arep-Ku akam metoh ikau hadari bara kakam Esau. Lius jeleng akan Betel. Keleh melai intu hete tuntang mampendeng ije mesbeh akang-Ku.”

²Palus Yakob hamauh dengan jalahae tuntang kakare oloh je aton dengae, “Itah handak haguet bara hetoh akan Betel. Hete aku mampendeng mesbeh akan Hatalla je jari mandohop aku hong kajakengku, tuntang jari mangalindong aku akan kueh bewei aku haguet. Te keleh manganan hampatong kare dewa ayun oloh je aton intu keton. Lalus gawi mamparasih arep tuntang kepan pakaian je barasih.”

⁴Palus ewen manyarah akan Yakob uras hampatong dewa ayun oloh je aton intu ewen. Uras ramo te ingalian Yakob intu penda upon kayu hai tokep lewu Sikhem.

⁵Metoh Yakob dengan hapus keluargae haguet, Hatalla manyangkolep kare oloh lewu je tokep hete hapan angat kikeh je paham, sampai dia manggoang Yakob tuntang sahapus keluarga.

⁶Palus ewen sampai tanah Kanaan intu lewu Betel je bihin arae Lus.

⁷Intu hete Yakob mampendeng mesbeh tuntang manampa aran eka te “El-Betel”, awi hete Hatalla mamparahan arep akae metoh ie hadari bara kakae.

⁸Hete kea Debora, indu angkat Rebeka, matei palus ingubur intu penda upon kayu hai hila salatan lewu te. Tagal te batang kayu te inggare “Batang Kayu Tangis”.

⁹Limbah Yakob haluli bara Mesopotamia, Hatalla mamparahan Arep tinai akae tuntang mamberkat ie.

¹⁰ Koan Hatalla dengae, “Ikau dia tinai inggare Yakob, tapi Israel.”

¹¹ Palus koan Hatalla tinai, “Aku toh Hatalla Je Jaton Tikas Kuasae. Keleh ikau manak meso je are! Ikau kareh manjadi tato hiang kare bangsa tuntang jadi tato hiang kare raja.

¹²Lewu je jari inenga-Ku akan Abraham tuntang Isaak, handak inengaku akam tuntang turonam.”

¹³Limbah te Hatalla malihi Yakob te.

¹⁴ Intu eka Hatalla hakotak dengan Yakob, ie mampendeng ije batu pampingat. Palus batu te iluput kilau parapah akan Hatalla, tuntang ie manusoh anggor tuntang undus intu hunjue.

¹⁵Eka te inyewute “Betel”.

¹⁶Limbah te Yakob tuntang keluarga ayue malihi Betel. Metoh ewen kanjerae kejau isut bara Eprata, te sampai katikae akan Rahel luas. Tapi anake bahali balua.

¹⁷Metoh kapehee luas te paham toto, bidan hamauh dengae, “Nyalawah ateim, Rahel, anakm hatue tinai.”

¹⁸Tapi Rahel jari tokep matei, tuntang katika te ie handak manggeto tahasenge. Ie manenga aran anak te Ben-Oni [83] tapi bapae manenga arae Benyamin.[84]

¹⁹Limbah te Rahel matei, ie ingubur intu saran jalan je manintu Eprata, je wayah toh arae Betlehem.

²⁰Yakob mampendeng ije batu pampingat hete. Sampai toh kea kubur Rahel magon inanda awi batu te.

²¹Limbah te Yakob marajur jalanae, balalu mampendeng kemahe intu ije eka mahalau candi Eder.

²² Metoh ewen kanjerae melai intu hete, Ruben batiroh dengan Bilha, gundik bapae. Taloh te hining Yakob, palus ie sangit toto.[85] Yakob bara anak due walas anak hatue.

²³Kare anak Lea iete Ruben (anak Yakob je tambakase), Simeon, Lewi, Yuda, Isaskar tuntang Sebulon.

²⁴Kare anak Rahel iete Yosep tuntang Benyamin.

²⁵Kare anak Bilha, rewar Rahel iete Dan tuntang Naptali.

²⁶Kare anak Silpa, rewar Lea, iete Gad tuntang Aser. Kare anak te inakan intu Mesopotamia.

²⁷ Balalu Yakob sampai eka Isaak bapae, intu ekae melai hong Mamre tokep Hebron. (Bihin Abraham buee, melai hete kea).

²⁸Metoh umure bakas toto, iete saratus hanya puluh jalatien nyelo Isaak matei palus ingubur awi anake Esau tuntang Yakob.