Read Ngaju GENESIS 37 Bible Online

GENESIS 37 - Ngaju bible

GENESIS 37

¹Yakob manetep intu tanah Kanaan, eka melai bapae,

²tuntang toh saritan turonan Yakob: Metoh Yosep anak Yakob umure uju walas nyelo, ie mahaga kawan tabiri haya-hayak dengan kare kakae, iete kare anak Bilha tuntang Silpa, due-due gundik bapae. Ie mansuman akan bapae kare gawi papa je ilalus awi kare kakae.

³Yakob labih sayang dengan Yosep bara kakare anake je beken, tagal Yosep inakan metoh bapae jari bakas. Sinde andau inampae akan Yosep ije jubah je bahalap toto.[88]

⁴Limbah kare kaka Yosep mite je bapa ewen paham sayang dengan Yosep malabien bara dengan ewen, te ewen basingi dengan Yosep, sampai ewen dia maku tinai bapander bua-buah dengae.

⁵Hong ije alem Yosep nupi, palus metoh ie manyarita nupie te akan kare kakae, te ewen labih basingi haream dengae.

⁶Toh ie taloh je insuman Yosep dengan ewen, “Hining!

⁷Aku nupi uras itah kanjeran intu tana mameteng gandom. Palus gandomku mendeng tagap. Te kare peteng gandom keton mangaliling peteng gandomku palus sontop manyembah ie.”

⁸“Ikau madoe ikau kareh jadi raja tuntang marentah ikei!” tingak kare kakae. Palus ewen labih basingi haream dengae tagal kare nupie tuntang kare taloh je insanae.

⁹Limbah te Yosep nupi tinai, tuntang insanae akan kare kakae, “Aku nupi tinai, aku mite matanandau, bulan tuntang bintang sontop manyembah aku.”

¹⁰Nupi te insumae kea akan bapae. Bapae maningak ie, koae “Nupi narai te? Tirokm aku, indum tuntang kare paharim handak dumah tuntang sontop manyembah ikau?”

¹¹ Kare kaka Yosep bahiri dengae, tapi bapae tetep manirok nupi te.

¹²Sinde andau metoh kare kaka Yosep haguet akan Sikhem manyakatik kawan tabirin bapa ewen,

¹³Yakob hamauh dengan Yosep, “Keleh haguet akan Sikhem, akan eka kare kakam manyakatik kawan tabiri ain itah”. Tombah Yosep, “Yoh, pa”.

¹⁴Koan bapae, “Tampayah kilen ampin kare kakam dengan kare tabiri, palus buli mansanan akangku.” Limbah te ilapase anake Yosep haguet malihi petak Rampar Hebron. Dia tahi limbah te Yosep sampai intu Sikhem.

¹⁵Metoh ie mananjong kanih kate intu janah, ie hasondau dengan ije biti oloh hatue je misek ie, “Narai je inggaum?”

¹⁶“Kare kakaku. Ewen kanjerae manyakatik kawan tabiri” koan Yosep, “en katawam intu kueh ewen te?”

¹⁷Koan oloh te, “Ewen jari haguet bara hetoh. Hiningku ewen hamauh je ewen handak haguet akan Dotan.”

¹⁸Bara kejau ewen mite Yosep, tuntang helo bara ie sampai talih ewen, ewen pakat handak mampatei ie.

¹⁹Ewen hamauh sama arep ewen, “Item, tukang nupi te dumah.

²⁰Ayo itah mampatei ie palus manjakah hantue akan huang kalin danum je keang. Kareh itah mansuman je ie jari imisak meto basiak. Kareh gitan itah kajarian kare nupi te.”

²¹Ruben mahining kanahuang ewen te, palus ie manggau jalan mangat manyalamat Yosep. “Ela mampatei ie,” koae.

²²“Keleh itah manjakah ie akan huang kalin danum intu padang pasir toh, tapi ela itah mamukul atawa mampahimang ie.” Taloh te insanae awi ie handak manyalamat Yosep tuntang manyoho ie buli akan huma.

²³Metoh Yosep sampai kare kakae, ewen mengkak jubah Yosep je bahalap[89] toto te hayak kakasar ewen.

²⁴Palus ewen mihir ie palus malabohe akan huang kalin danum je keang.

²⁵Metoh ewen kanjerae kuman, salenga gitan ewen ije kawan dagang oloh Ismael je kanjerae hong pangguete bara Gilead akan Misir. Kare onta ain ewen mamuat rarampah tuntang kismis.

²⁶Balalu koan Yuda dengan kare paharie, “Narai gunae mampatei andi itah tuntang milim pampatei te?

²⁷Keleh itah manjual akan oloh Ismael te. Dia usah itah ngapehe ie. Aloh kilen kea ie te andi itah kabuat.” Kare paharie maku.

²⁸ Palus metoh pire-pire Sadagar Midian[90] mahalau, Yosep impalua awi kare kakae[91] bara huang kalin danum te. Ie palus injual akan oloh Ismael te dengan rega due puluh kabawak duit perak. Limbah te kare sadagar te mimbit ie akan Misir.

²⁹Metoh Ruben haluli akan kalin danum te tuntang dia sondau Yosep hete, imbisake pakaiae awi pehe ateie.

³⁰Ie haluli manalih kare paharie palus hamauh, “Anak te jaton ati tinai hete! Narai je patut iawiku toh?”

³¹Balalu ewen manyambalih ije kongan kambing tuntang mansulop jubah Yosep akan dahan kambing te.

³²Palus jubah te inyoho awi ewen magahe akan bapa ewen impahayak peteh, “Jubah toh sondau ikei. En toh ain anak bapa?”

³³Yakob kasene jubah te, palus hamauh, “Toto jetoh jubah anakku! Batantu ie jari imisak meto basiak. Kayah, anakku Yosep jari matei imisak meto te!”

³⁴Yakob marabit pakaiae awi pehe atei tuntang mahapan pakaian tatum. Tahi andaue ie manatum anake.

³⁵Kare anake, aloh je hatue atawa bawi dumah mampong ie, tapi ie dia maku iampong. Koae, “Sampai matei aku harajur manatum anakku.” Tumon te ie harajur manatum tagal Yosep anake.

³⁶Pandehan te, intu Misir, kare oloh Midian jari manjual Yosep akan Potipar, ije biti pagawai ain raja, kapalan oloh je manjaga istana.