Read Ngaju GENESIS 39 Bible Online

GENESIS 39 - Ngaju bible

GENESIS 39

¹Yosep jari imbit akan Misir awi kare oloh Ismael te. Ie injual akan Potipar, ije biti pagawai ain raja, kapalan kare oloh je manjaga Istana.

² TUHAN mandohop Yosep sampai ie harajur mandino hasil huang kare gawie. Ie melai intu human tuan aie, oloh Misir te.

³Tuan aie mite je TUHAN mandohop Yosep, awi te Yosep mandino hasil huang kare taloh je iawie.

⁴Potipar sanang dengan Yosep palus mangkat ie jadi rewar humae. Palus inyohoe Yosep manantuani hapus humae tuntang kare ramoe.

⁵Bara metoh te, tagal Yosep, TUHAN mamberkat human oloh Misir te; tamput kea uras taloh handiai je ayue buah berkat, aloh je intu huma atawa je intu tana.

⁶Uras taloh je ayun Potipar imercayae dengan Yosep. Tumon te Potipar samasinde dia paduli tahiu humae, suali tahiu panginae. Yosep gagah hayak bakena.

⁷Limbah pire-pire katahie, sawan Potipar nampara nahuang dengan Yosep. Oloh tabela te imbite hinje batiroh.

⁸Yosep dia maku hayak hamauh dengae, “Ela, Nyonya, tuan Potipar jari mamercaya uras panataue dengangku. Ie dia paduli en-en tinai intu humae toh.

⁹Intu hetoh kuasangku sama kahaie dengan kuasae. Jaton ije je dia inyarahe akangku, suali Nyonya. Dia baka aku tau mawi gawi papa tumon te tuntang badosa dengan Hatalla.”

¹⁰Aloh sawan Potipar ngatau Yosep sining andau, oloh tabela te tetep dia maku batiroh dengae.

¹¹Sinde andau metoh Yosep tame akan huang huma handak nguan gawie jaton ije biti oloh intu hete.

¹²Sawan Potipar manjijit Yosep intu jubahe tuntang hamauh, “Ayo itah hinje batiroh.” Yosep bagagah tuntang olih lapas, palus hadari balua, tapi jubahe tapalihi intu lengen oloh bawi te.

¹³Metoh sawan Potipar mite je Yosep jari hadari tuntang jubahe tapalihi,

¹⁴ie mantehau kare reware hayak hamauh, “Item! oloh Ibrani je iimbit banangku akan huma toh, manawah itah. Ie tame kamarku tuntang handak hinje aku, tapi aku mangkariak hai auhku.

¹⁵Metoh mahining tangkariaku, ie hadari balua tuntang jubahe tapalihi.”

¹⁶Palus sawan Potipar mingkes jubah te sampai banae buli.

¹⁷Metoh banae buli, ie balalu mansuman taloh te akae, koae, “Oloh Ibrani je imbitm akan hetoh te, tame akan huang kamar manawah aku.

¹⁸Tapi metoh aku mangkariak, ie hadari balua tuntang jubahe tapalihi.”

¹⁹Potipar paham balait.

²⁰Ie bajeleng manyoho manyingkap Yosep tuntang inamean akan huang penjara, eka kare tahanan raja ingurong.

²¹ Tapi TUHAN mandohop Yosep tuntang harajur sinta ie, sampai kapala penjara rajin dengae.

²²Yosep imercaya awie uka maharagu kare oloh tahanan je beken tuntang manantuani hapus gawi huang penjara te.

²³Kapala penjara te dia tinai manantuani kare taloh je jari imercaya dengan Yosep. Awi TUHAN mandohop Yosep sampai ie tau mandino hasil huang kare gawie.