Read Ngaju GENESIS 4 Bible Online

GENESIS 4 - Ngaju bible

GENESIS 4

¹Maka Adam marantep Hawa, sawae, tuntang oloh bawi te batihi. Ie manak ije anak hatue sambil hamauh, “Awi pandohop TUHAN aku jari mandino ije biti anak hatue.” Palus ie manggare anak te Kain. [14]

²Rahian tinai Hawa manak ije anak hatue, arae Abel. Abel manjadi sakatik meto, tuntang Kain oloh pamalan.

³Sinde katika Kain maluput parapah bara hasil tanae akan TUHAN.

⁴ Palus Abel kea mimbit anak tabiri je pangkasolake inakan bara ije kongan tabirie, manyambalihe palus maluput bara bagin je pangkahalape akan TUHAN. TUHAN sanang dengan Abel tuntang parapahe,

⁵tapi manolak Kain tuntang parapahe. Te Kain paham sangit, tuntang baue sangit.

⁶Maka TUHAN hamauh dengan Kain, “Mbuhen ikau sangit? Mbuhen baum giri-garitat?

⁷Amon ikau mawi kahalap, batantu ikau tatawe;[15] tapi amun ikau mawi taloh papa, dosa jari mentai uka tame haung ateim. Dosa handak manguasa ikau, tapi ikau patut mampakalahe.”

⁸ Palus koan Kain dengan Abel, andie, “Keleh itah haguet akan tana.” [16] Metoh ewen sampai hete, Kain mantakan tuntang mampatei andie Abel.

⁹TUHAN misek Kain, “Hong kueh Abel, andim?” Kain tombah, “Aku dia katawan, en aku tantai manjaga andiku?”

¹⁰ Balalu TUHAN hamauh, “Mbuhen ikau mawi taloh je mangkarieng te? Dahan andim mangkariak manintu Aku bara petak kilau auh tangkariak je balaku baleh.

¹¹Ikau tarasapa sampai ikau dia tau malan tinai. Petak te minyop dahan andim, kilau jaka jete marakang nyamae manarima dahan andim te metoh ikau mampateie.

¹²Amon ikau malan, petak te dia mahasil taloh en-en; ikau akan jadi oloh perantau je jaton bara eka manetep hong kalunen toh.”

¹³Maka koan Kain dengan TUHAN, “Hukum te lalau babehat, aku dia olih mananggonge.

¹⁴Ikau maharak aku bara tanah toh, kejau bara taharep Aim. Aku akan jadi oloh perantau je jaton bara eka hong kalunen toh, tuntang aku akan impatei awi eweh bewei je supa aku.”

¹⁵Tapi TUHAN hamauh, “Dia. Amon ikau impatei, maka indu balehe, uju biti oloh dengan je mampatei ikau te akan impatei kea.” Limbah te TUHAN manenga tanda intu Kain mangat eweh bewei je hasondau dengae dia mampatei ie.

¹⁶Palus Kain haguet bara taharep TUHAN tuntang melai hong eka je bagare “Eka manamuei” hila timor Eden.

¹⁷Kain tuntang sawae mandino anak hatue, je bagare Henokh. Limbah te Kain mamangun ije lewu tuntang ie manggare lewu te manumon aran anake.

¹⁸Henoh bapa Irad. Irad bapa Mehuyael. Mehuyael bapa Metusael, tuntang Metusael bapa Lamekh.

¹⁹Lamekh due sawae, Ada tuntang Sila.

²⁰Ada manak Yabal, tuntang turonan Yabal te bangsa je mambelom meto tuntang melai hong kemah.

²¹Andie bagare Yubal, tuntang turonan Yubal te baris oloh tukang main kacapi tuntang suling.

²²Sila manak Tubal Kain, tuntang turonae tukang manampa kare pakakas [17] bara tambaga tuntang sanaman. Betau Tubal Kain bagare Naama.

²³Lamekh hamauh dengan kadadue sawae te, “Ada tuntang Sila hining toh! Aku mampatei ije biti oloh hatue tabela awi ie mawi aku.

²⁴Amon uju biti oloh buah patei mangat mambaleh pampatei Kain, maka uju puluh uju biti oloh akan impatei amon aku impatei.”

²⁵Adam tuntang sawae mandino ije biti anak hatue tinai. Koan Hawa, “Hatalla jari manenga akangku anak hatue gantin Abel, je jari impatei awi Kain.” Awi te Hawa manggare anak te Set.[18]

²⁶Set manak hatue je arae Enos. Hong jaman te oloh nampara manyewut aran TUHAN amon ewen balakudoa.