Read Ngaju GENESIS 40 Bible Online

GENESIS 40 - Ngaju bible

GENESIS 40

¹Pire-pire katahie limbah due biti pelayan ain raja iete oloh je tukang menyadia taloh ihop tuntang oloh je tukang manyadia panginan mawi kasalan dengan raja.

²Te raja balait dengan due biti pelayae te,

³palus ewen inamean akan huang penjara intu human kapalan kare oloh je manjaga istana, intu eka Yosep inahan.

⁴Tahi kea ewen huang penjara te. Kapalan kare oloh je manjaga istana manyoho Yosep manantuani ewen due te.

⁵Hong ije alem oloh je tukang manyadia taloh ihop tuntang je manyadia panginan genep bitie uras nupi. Riman nupin ewen te dia sama.

⁶Metoh Yosep dumah talih ewen hanjewu jewue, ewen gitan kapehe awi pehe atei.

⁷Palus ie misek, “Mbuhen kare pahari paham susah andau toh?”

⁸Tombah ewen, “Alem endau ikei nupi, tuntang jaton ije je katawan rimae.” Koan Yosep, “Baya Hatalla bewei je mawi oloh tau manarang riman nupi. Keleh sanan nupim te.”

⁹Oloh je tukang manyadia taloh ihop te hamauh, “Huang nupi te aku mite aton ije batang anggor intu hila baungku.

¹⁰Batang anggor te aton telo edae. Sana kare edae mandawen, balalu mangambang, palus buae masak.

¹¹Metoh te aku kanjeran mimbing cangkir je hapan raja mihop, palus induangku bua anggor te tuntang ihamisku akan huang cangkir raja balalu inyarongangku akae.”

¹²Yosep hamauh, “Toh ie rimae: Telo edan te rimae telo andau.

¹³Hong telo andau tinai raja kareh malapas ikau. Ie kareh mampun ikau tuntang malian ikau akan gawim je solake.

¹⁴Tapi ingat aku amon pambelom ayum jari bahalap. Dohop nyampai tahiu aku akan raja, mangat ie malapas aku bara penjara toh.

¹⁵Awi, sapunae bihin aku inamput bara lewun oloh Ibrani. Tuntang intu hetoh kea, intu Misir toh, dia puji aku mawi taloh papa sampai patut inamean akan huang penjara.”

¹⁶Limbah oloh je tukang manyadia panginan te katawan je riman nupin oloh je tukang manyadia taloh ihop te bahalap, te ie hamauh dengan Yosep, “Aku nupi kea, aku mite aton telo karanjang rote je hasusun hunjun takolokku.

¹⁷Intu karanjang je pangkahunjun aton pire-pire macam wadai akan raja. Tapi kare burong dumah kuman wadai te.”

¹⁸Tombah Yosep, “Toh riman nupi te: Telo karanjang te rimae telo andau.

¹⁹Huang telo andau toh raja kareh manyoho oloh manetek kolokm palus mangkuak hantum intu ije tihang. Kare burong kareh kuman isim.”

²⁰Telo andau limbah te iete andau raja hapus nyeloe. Ie mawi pesta hai akan hapus oloh ayue. Ie manyoho uka oloh je tukang manyadia taloh ihop tuntang oloh je tukang manyadia taloh kinan impalua bara penjara palus iimbit intu taharep hapus oloh istana.

²¹Oloh je tukang manyadia taloh ihop ilian akan gawie je solake.

²²Tapi oloh je tukang manyadia panginan ihukum matei. Uras taloh te manjadi tumon auh je insanan Yosep.

²³Tapi oloh je tukang manyadia taloh ihop te dia mingat Yosep tinai. Ie kalapean sama sinde dengan Yosep.