Read Ngaju GENESIS 42 Bible Online

GENESIS 42 - Ngaju bible

GENESIS 42

¹Metoh Yakob mahining aton gandom intu Misir, ie hamauh dengan kare anake, “Mbuhen keton mela-melai bewel?

² Jari hiningku aton gandom intu Misir. Lius akan kanih tuntang pili gandom mangat itah dia matei balau.”

³Palus sapuluh kaka Yosep te haguet akan Misir mamili gandom

⁴Tapi Yakob dia manyoho Benyamin, andi Yosep ije kalambutan, haguet omba ewen. Awi ie mikeh ela-ela aton calaka tinai mawi anake te.

⁵Tagal lau intu tanah Kanaan, kare anak Yakob tuntang are oloh beken dumah mamili gandom intu Misir.

⁶Je bajual gandom akan kare oloh bara hapus kalunen iete Yosep, gubernur Misir. Awi te kare kaka Yosep dumah tuntang sontop intu taharepe.

⁷Metoh Yosep mite kare kakae, ie mangasene ewen, tapi ie pura-pura dia kasene. Ie misek hapan auh je kasar dengan ewen, “Keton oloh kueh?” “Ikei oloh Kanaan. Ikei dumah handak mamili panginan,” tombah ewen.

⁸Aloh Yosep kasene kare kakae, ewen dia kasene ie.

⁹ Palus ie taraingat nupie tahiu ewen. Te ie hamauh, “Keton toh oloh kalati; keton dumah mangalati intu kueh kalemon lewun ikei!”

¹⁰“Dia, tuangku,” tombah ewen. “Ikei, kare rewarm dumah, baya handak mamili panginan.

¹¹Ikei toh hampahari tuangku. Ikei oloh bahalap, dia oloh kalati.”

¹²Yosep hamauh dengan ewen, “Tanjaro! keton dumah akan hetoh handak mangatawan intu kueh kalemon lewu toh.”

¹³Tombah ewen, “Ikei toh duewalas biti hampahari, tuangku, ikei anak bara ije bapa intu tanah Kanaan. Ije bara ikei jari matei, tuntang je busu aton melai dengan bapa ikei.”

¹⁴“Puna toto kilau koangku,” tombah Yosep, “Keton toh oloh kalati.

¹⁵Aku handak mariksa keton: Aku sumpah tagal aran raja, je keton dia tau malihi lewu toh amon andi keton je busu te dia dumah akan hetoh.

¹⁶Ije bara keton musti buli manduae. Je beken kareh inahan sampai kare auh keton te gitan katotoe. Amon dia, tagal aran raja, keton toh oloh kalati ain musoh!”

¹⁷Limbah te ewen inamean akan huang penjara telo andau katahie.

¹⁸Intu andau je kateloe Yosep hamauh dengan ewen, “Aku oloh je mikeh tuntang manumon auh Hatalla. Keton kareh inyalamatku hapan ije auh je batantu.

¹⁹Hapan mambukti je keton toh oloh bujur, ije bara keton kareh inahan hong penjara. Je beken tau buli tuntang mimbit gandom je mili keton akan human keton je metoh awi lau.

²⁰Limbah te keton musti mibit andi keton je busu akangku. Jete tandae kareh je auh keton te toto, te keton kareh dia ihukum matei.” Ewen maku manumon auh gubernur te.

²¹Balalu ewen hakotak sama arepe, “Toh, itah ihukum tagal kasalan itah dengan andi itah bihin. Ie balaku dohop tapi itah dia paduli, aloh itah mite je ie paham kapehe. Jete bukue itah toh mangkeme kapehe jetoh.”

²² Koan Ruben, “En dia aku bihin hamauh dengan keton uka ela mangapehe anak te, tapi keton dia maku mahininge. Toh pampateie imbaleh akan itah.”

²³Yosep harati basan ewen, tapi ewen dia katawae, awi ewen bapander dengan Yosep mahapan ije juru bahasa.

²⁴Yosep malihi ewen palus manangis. Metoh ie jari olih hakotak tinai, ie haluli manalih ewen. Induae Simeon, palus manyoho oloh mameteng ie intu baun kare paharie.

²⁵Yosep manyoho uka kare balasai je imbit kare kakae inyuang dengan gandom. Palus duit genep bitin ewen inamean akan kare balasai te.

²⁶Limbah te kare kaka Yosep mamuat kalidai ewen hapan gandom je jari imili ewen te, palus ewen haguet bara hete.

²⁷Intu eka ewen bamalem, ije bara ewen muap balasai gandome handak mampakanan kalidaie. Sondaue duit hunjun gandom te.

²⁸“Duitku ilian,” koae mangkariak dengan kare paharie. “Item, aton intu balasaiku!” Atei ewen kontep kikeh hayak misek sama arep ewen, “Narai je ilalus Hatalla dengan itah?”

²⁹Metoh sampai intu Kanaan, ewen manyarita akan bapa ewen taloh handiai je jari buah ewen. Koan ewen,

³⁰“Gubernur hapan auh je kasar dengan ikei tuntang mandawa ikei mangalati lewue.

³¹Tombah ikei, ‘Ikei oloh bahalap, dia oloh kalati, ikei oloh bujur.

³²Uras ikei due walas hampahari, anak bara ije bapa. Ije jari matei, tapi je busu aton dengan bapa intu Kanaan.’

³³Gubernur te hamauh, ‘Aku handak mancoba keton, hapa ngatawan en keton oloh bujur: ije bara keton musti melai; je beken tau buli mimbit gandom akan keluarga keton je metoh awi lau.

³⁴Limbah keton haluli mimbit andi keton je busu, aku kareh katawan je keton dia oloh kalati, tapi oloh bujur. Palus panarim je inahangku te kareh iliangku akan keton, harue keton tau melai intu lewu toh hayak bebas badagang.’ ”

³⁵Limbah te, metoh ewen mambuang balasai ewen, ewen sondau epok ain ganep bitin ewen je basuang duit. Balalu ewen mikeh toto, tuntang bapa ewen kea.

³⁶Palus bapa ewen hamauh, “Keton mawi aku nihau uras anakku. Yosep jari nihau, Simeon jaton tinai. Tuntang toh keton manduan Benyamin kea. Pahalau kasusahku!”

³⁷Palus Ruben hamauh dengan bapae, “Sarah Benyamin akangku, Bapa. Kareh aku mimbit ie haluli. Amon dia, bapa tau mampatei kadadue anak hatue aingku”.

³⁸Tapi Yakob hamauh, “Dia! Benyamin dia tau keton mimbite. Kakae jari matei tuntang toh baya ie ih je belom. Ela-ela ie dinon celaka intu pangguet te. Aku jari bakas, tuntang kapehen atei je handak ilalus keton akangku te kareh mawi pampateiku.”