Read Ngaju GENESIS 43 Bible Online

GENESIS 43 - Ngaju bible

GENESIS 43

¹Lau hong Kanaan sasar paham. Limbah Yakob dengan oloh humae jari mampalepah uras gandom je imili bara Misir, Yakob hamauh dengan kare anake, “Lius tinai akan kanih tuntang pili gandom akan itah.”

³Palus Yuda hamauh dengan bapae, “Gubernur Misir jari paham mampingat, koae, ikei dia tau manyondau ie tinai amon ikei dia mimbit andi ikei te.

⁴Amon bapa manyoho andi ikei omba, ikei maku haguet akan kanih mamili panginan.

⁵Tapi amon bapa dia manyoho Benyamin omba, ikei dia maku haguet, awi gubernur te jari hamauh je ikei dia tau naharep amon andi ikei dia omba.”

⁶Koan Yakob, “Mbuhen keton manyusah aku awi keton mansanan akan oloh te je keton magon bara andi?”

⁷Tombah ewen, “Oloh te raju-rajur misek tahiu ikei tuntang tahiu keluarga ikei, koae, ‘En bapa keton magon belom? En keton magon bara andi hatue beken?’ Ikei tarapaksa tombah uras piseke. Kueh tau ikei mangira je ie handak manyoho ikei mimbit andi ikei te?”

⁸Palus koan Yuda dengan bapae, “Soho anak te omba, aku je mananggonge. Ikei handak bajeleng haguet mangat jaton ije bara itah matei balau.

⁹Aku toh mananggonge. Bapa tau balaku ie bara aku. Amon aku dia mimbit ie haluli dengan salamat, hapus pambelomku mananggong hukumae.

¹⁰Paribasa itah dia mentai tumon te katahie, batantu ikei metoh toh jari lulang-luli due tingkat.”

¹¹Bapa ewen tombah, “Amon puna musti tumon te, imbit hasil je pangkahalape bara lewu toh intu huang kare balasai keton indu panenga akan gubernur te: Kismis, mado, rarampah, bua kaminting, tuntang bua kanari.

¹²Imbit kea duit due lipet karee, awi duit je inyondau hong balasai keton te musti ilian keton haluli. Mikeh jete kasalaya.

¹³Imbit andim te, tuntang haluli jeleng.

¹⁴Keleh Hatalla Je Jaton Tikas Kuasae mawi gubernur te masi dengan keton, sampai ie maku malian Benyamin tuntang Simeon akan keton. Tahiu aku toh, amon aku puna musti nihau kare anakku, narai taloh koangku.”

¹⁵Limbah te kare paharin Yosep mimbit kare panenga te tuntang duit due lipet, intu pangguet ewen akan Misir dengan Benyamin. Limbah sampai kanih, ewen manaharep Yosep.

¹⁶Metoh Yosep mite Benyamin dengan kare kakae, ie hamauh dengan kare pelayan je mangapala huma seroke, “Imbit kare oloh toh akan humangku. Ewen kareh kuman dengangku andau toh. Tagal te sambalih ije kongan meto je ihaga palus nyadia taloh kinan.”

¹⁷Kare pelayan te malalus parentah te hayak mimbit kare paharin Yosep akan huang human gubernur.

¹⁸Metoh ewen iimbit akan huang human Yosep, ewen mikeh tuntang manirok, “Itah imbit akan hetoh tagal duit je inyondau huang balasai itah metoh itah dumah akan hetoh bihin. Ewen handak manyalenga manyingkap itah, palus manduan kalidai itah hayak mawi itah rewar ewen.”

¹⁹Awi te tokep bauntonggang human Yosep ewen hamauh dengan kepalan kare oloh je mahaga human Yosep,

²⁰“O, tuan, ikei jari puji dumah akan hetoh mamili panginan.

²¹Hong pangguet buli, metoh ikei handak bamalem, ikei muap balasai ikei. Salenga uras duit je hapan mambayar gandom ikei aton intu hunjun gandom. Ikei dia katawan eweh je namean duit te. Toh ikei mimbite haluli akan tuan. Beken bara te ikei mahin mimbit duit kea hapan mamili panginan tinai.”

²³Pelayan te hamauh, “Ela mikeh. Ela gugup. Hatallan keton, iete Hatalla je inyembah bapam, iete je manenga duit te akan huang balasai keton. Aku jari manarima bayaran keton akan gandom te.” Limbah te imbite Simeon talih ewen,

²⁴balalu iagahe akan huang huma. Ie manenga akan ewen danum hapa menyau pai, tuntang panginan akan kalidai ewen.

²⁵Limbah te ewen manatap panenga uka inenga akan Yosep amon ie dumah bentok andau, awi jari insuman akan ewen je ewen kareh kuman haya-hayak dengae.

²⁶Metoh Yosep sampai huma, ewen manjulok kare panenga te akan Yosep hayak sontop akae.

²⁷Yosep misek tahiu ampin ewen, koae, “Keton jari manyarita akangku tahiu bapa keton je bakas te. Kilen ampie? Bahalapkah?”

²⁸Tombah ewen, “Yoh, tuan, bapa ikei, bahalap ih.” Palus ewen sontop akae.

²⁹Metoh Yosep mite Benyamin andie, ie hamauh, “En toh andi keton je busu te, je jari insuman keton akangku? Keleh Hatalla mamberkat ikau, anakku.”

³⁰Atei Yosep kontep kataharoe tuntang kasayange dengan andie. Ie handak dia olih manahan arepe. Tagal te ie kaje-kajeng tame akan kamare balalu manangis.

³¹Limbah te ie manyaup baue, palus ie balua tinai. Marak manahan kapaham huange, ie manyoho manatap panginan.

³²Yosep kuman intu meja mangabuat, kare paharie intu meja je beken. Oloh Misir je aton hong hete kuman intu meja je beken tinai, tagal ewen mangkeme randah amon kuman hayak dengan oloh Ibrani.

³³Kare paharin Yosep imbaris intu meja je hataharep dengan Yosep. Ewen mondok turo-turon tumon kabakas umure, nampara bara je bakas sampai je busu. Metoh ewen mite ampin pondok ewen te, ewen hatampayah awi hengan.

³⁴Panginan akan ewen inenga bara mejan Yosep. Benyamin dinon lime lipet karee. Palus ewen kuman mihop haya-hayak dengan Yosep sampai besoh.