Read Ngaju GENESIS 44 Bible Online

GENESIS 44 - Ngaju bible

GENESIS 44

¹Hemben te kea Yosep manyoho pelayan je mangapala huma seroke, koae, “Suang balasai kare oloh te hapan gandom, tumon kaolih ewen mimbite. Tamean duit gagenep bitin ewen akan balasaie, intu hunjun gandom te.

²Tamean kea sangkir perakku akan huang balasai andi ewen je busu, haya-hayak duit hapan bayar gandome.” Kare pelayan te malalus parentah te.

³Andau jewue, hanjewu toto, Yosep hapisah dengan kare paharie, ewen palus haguet dengan kare kalidai ain ewen.

⁴Ewen hindai kejau bara lewu te, metoh Yosep hakotak dengan pelayan je mangapala huma seroke, “Golong, goang kare oloh te. Amon jari dinon, suman akan ewen, ‘Mbuhen keton mambaleh kahalap dengan kapapa?

⁵Mbuhen keton manakau sangkir perak tuangku? [95] Sangkir te hapae mihop tuntang pakakas hapa manujum. Keton jari mawi kapapa hai.’ ”

⁶Metoh pelayan kapalan huma serok Yosep te majake kare paharin Yosep, insumae taloh je irentah Yosep.

⁷Tombah ewen koae, “Narai maksud tuan? Ikei sumpah je ikei dia mawi gawi te!

⁸Tuan kabuat katawan, duit je inyondau ikei huang kare balasai ikei intu hunjun gandom te, jari lian ikei akan tuan. Awi te dia mungkin ikei salenga manakau perak atawa amas bara human gubernur!

⁹Tuan, amon ramo te aton sondau intu ije biti bara ikei toh, nauhe ie ihukum matei, tuntang ikei je awang beken jadi pelayan Tuan.”

¹⁰Pelayan te hamauh, “Buah ih, tapi baya oloh je eka sangkir te sondau, baya iete ih je jadi rewarku, ije beken tau buli akan eka keton.”

¹¹Balalu ewen bajeleng genep bitie mampamohon balasai tuntang mukeie uka iriksa awi pelayan kapalan huma ain Yosep.

¹²Pelayan kapalan huma serok ain Yosep te mariksa balasai te titip toto, manampara balasai ain ije bakas sampai balasai ain ije busu, tuntang sangkir te tarasondau huang balasai ain Benyamin.

¹³Kakare kakae uras pehe ateie balalu ewen marabit pakaiae. Ewen mamuat balasai haluli akan hunjun kalidai tuntang ewen haguet haluli akan lewu.

¹⁴Metoh Yuda tuntang kare paharie sampai intu human Yosep ie magon aton intu hete, balalu ewen sontop manyembah intu taharep Yosep.

¹⁵Balalu Yosep hamauh, “Narai je jari iawi keton te? Dia keton katawan je aku toh olih mangatawan kare gawin keton ije papa mahapan kaharati je basilim?”

¹⁶“Kilen auh ikei dengan Tuangku?” koan Yuda, “Kilen ampin ikei tau malawae tuntang mambujur arep ikei? Hatalla jari mamparahan kasalan ikei. Toh ikei uras jadi rewar Tuan, dia baya ie je eka sangkir inyondau.”

¹⁷Koan Yosep, “Dia! Aku dia handak malalus gawi kalote. Baya ie je eka sangkir te je inyondau ih je manjadi rewarku. Ije beken tau buli manalih bapa keton.”

¹⁸Yuda miar manokep Yosep hayak hamauh koae, “Ampun Tuangku, keleh jaka Tuangku handak manyoho rewarm toh hakotak tinai dengan Tuangku. Ela basingi dengan rewarm toh; Tuangku kilau raja Misir kabuat.

¹⁹Tuangku jari misek dengan ikei toh, ‘En bapa keton magon belom, tuntang en atonkah paharin keton je beken?’

²⁰Te koan ikei dengan Tuangku, ‘Bapa lkei jari bakas tuntang andi ikei inakan metoh bapa ikei jari bakas. Kakae je ije indu dengan andi ikei toh jari matei, maka wayah toh baya ie kabuate je magon belom, tuntang bapa ikei paham kaherete dengae.’

²¹Tuangku manyoho ikei mimbit ie akan hetoh, mangat Tuangku mite ie,

²²balalu ikei mansanan je andi ikei je busu te dia olih hapisah dengan bapae; tuntang amon ie hapisah bara bapae, maka bapa akan matei.

²³Limbah te Tuangku hamauh, ‘Keton dia tau manaharep aku tinai amon keton dia mimbit andi keton te.’

²⁴Metoh ikei jari buli manalih bapa ikei, ikei menyampai peteh Tuangku akan bapa ikei.

²⁵Limbah te bapa ikei menyoho ikei haluli akan hetoh uka mamili panginan.

²⁶Tapi ikei hamauh, ‘Ikei dia akan haguet akan kanih, awi ikei dia tau manaharep gubernur amon andi ikei je busu toh dia omba kea.’

²⁷Limbah te bapa ikei hamauh, ‘Keton katawan Rahel kabalingku te baya due-due ih anake.

²⁸Anake ije solake jari malihi aku. Ie jari imisak meto basiak, awi sampai toh aku jaton mitee tinai.

²⁹Amon keton manduan anak je busu toh bara aku tuntang ie buah calaka, maka kapehen atei je buah aku awi keton, akan mimbit pampatei akangku awi aku puna bakas.’ ”

³⁰“Awi te Tuangku,” koan Yuda dengan Yosep, “amon rewarm buli manalih bapa ikei dia dengan andi ikei toh, maka jetoh mimbit pampatei akan bapa ikei. Tahasenge bahapang dengan anak te, tuntang awi ie jari bakas maka kapehen ateie tagal gawin ikei dengae akan mimbit pampateie.

³²Tinai rewarm jari hajanji dengan bapa je rewarm toh je mananggong anak toh.

³³Jadi rewarm balaku asi, uka Tuangku tau manyoho rewarm toh manjadi rewar Tuangku mangganti andi ikei toh, uka ie tau buli haya-hayak dengan kare kakae.

³⁴Kilen ampie rewarm tau buli manalih bapa ikei, amon anak te dia omba buli kea? Rewarm dia olih mite kapehen atei ije kareh buah bapa ikei.”