Read Ngaju GENESIS 46 Bible Online

GENESIS 46 - Ngaju bible

GENESIS 46

¹Yakob manatap kare ramoe palus haguet. Sampai intu Berseba ie maluput parapah akan Hatalla je inyembah awi Isaak bapae.

²Hong ije paite metoh hamalem, Hatalla hamauh dengae, “Yakob, Yakob!” “Yoh TUHAN,” tombah ie.

³“Aku Hatalla, Hatalla je inyembah bapam,” koae. “Ela mikeh haguet akan Misir. Aku kareh mawi turonam bangsa je hai intu kanih.

⁴Aku handak mampahayak ikau akan Misir, tuntang mimbit turonam haluli akan lewu toh. Yosep kareh aton tokep ikau amon ikau matei.”

⁵Yakob balalu haguet bara Berseba. Kare anake mampalompat bapa ewen dengan anak sawan ewen akan hunjun kereta je ingirim raja Misir.

⁶ Ewen mimbit kea meto tuntang kare panatau je jari dinon ewen intu Kanaan, palus haguet akan Misir. Yakob mimbit hapus turonae, iete

⁷uras anak esoe hatue tuntang bawi.

⁸Kare oloh bara keluarga Yakob je omba akan Misir iete:

⁹Ruben, anak tambakas; kare anake; Henoh, Palu, Hesron tuntang Karmi.

¹⁰Simeon; kare anake: Yemuel, Yamin, Ohad, Yakin, Sohar tuntang Saul, anak bara sawae oloh bawin Kanaan.

¹¹Lewi; kare anake: Gerson, Kehat tuntang Merari.

¹²Yuda; kare anake: Sela, Peres tuntang Serah, tuntang anak Yuda je beken, iete Er dengan Onan matei intu Kanaan. Kare anak Peres: Hesron tuntang Hamul.

¹³Isaskar; kare anake: Tola, Pua, Ayub tuntang Simron.

¹⁴Sebulon; kare anake: Sered, Elon tuntang Yahleel.

¹⁵Ewen urase iete kare anak je inakan awi Lea akan Yakob intu Mesopotamia. Beken bara te anake bawi je arae Dina. Hapus turonan Yakob bara sawae Lea 33 biti karee.

¹⁶Gad; kare anake: Sipyon, Hagi, Suni, Esbon, Eri, Arodi tuntang Areli.

¹⁷Aser; kare anake: Yimna, Yiswa, Yiswi tuntang Beria dengan Serah, paharin ewen je bawi. Kare anak Beria iete Heber tuntang Malkiel.

¹⁸Jahawen walas biti te iete turonan Yakob bara Silpa, rewar bawi je inenga Laban akan Lea, anake bawi.

¹⁹Rahel, sawan Yakob aton anake due, iete Yosep tuntang Benyamin.

²⁰ Intu Misir Yosep dinon due anak, iete Manase tuntang Epraim je inakan awi sawae Asnat, anak Potipera, je jadi imam intu Heliopolis.

²¹Benyamin; kare anake: Bela, Beker, Asbel, Gera, Naaman, Ehi, Ros, Mupim, Hupim tuntang Ared.

²²Epatwalas oloh te turonan Yakob bara sawae Rahel.

²³Limbah te Dan; anake: Husim.

²⁴Naptali; kare anake: Yahseel, Guni, Yeser tuntang Silem.

²⁵Uju biti te turonan Yakob bara Bilha, rewar bawi je inenga Laban akan Rahel anake.

²⁶Turonan Yakob je haguet akan Misir urase 66 biti karee, dia tame kare manantue.

²⁷ Kare anak Yosep je inakan intu Misir aton due biti. Maka oloh keluarga Yakob je sampai intu Misir samandiai aton 70 biti.

²⁸Yakob manyoho Yuda mananjong helo bara ie uka mantehau Yosep mangat manyondau bapae intu Gosen.

²⁹Yosep mandai kereta manyondau bapae hete. Metoh ewen hasondau, Yosep mamalok bapae hayak tahi manangis.

³⁰Koan Yakob dengan Yosep, “Toh aku nahuang matei, tagal jari mite ikau tuntang katawan je ikau magon belom.”

³¹Palus koan Yosep dengan kare paharie je beken, “Aku akan haguet tuntang mansanan akan raja tahiu kare paharingku tuntang uras kolangku je melai Kanaan jari dumah.

³²Aku handak mansanan je keton sakatik tabiri tuntang sapi, tuntang jari mimbit meto ain keton hayak kare ramon keton.

³³Amon raja mantehau keton tuntang misek gawin keton,

³⁴sanan akae je keton toh pahaga meto bara kakorik, kilau tato hiang keton. Amon kalote te, te ie tau manyoho keton melai intu Gosen.” Yosep mansuman taloh te awi oloh Misir mangkeme randah belom hinje dengan kare sakatik.