Read Ngaju GENESIS 49 Bible Online

GENESIS 49 - Ngaju bible

GENESIS 49

¹Limbah te Yakob mantehau kare anake tuntang hamauh, “Keleh pumpong hetoh, tokep aku. Handak insanangku akan keton narai je kareh ingkeme keton intu katika je rahian.

²Keleh hapumpong, kare anak Yakob, hining Israel bapam.

³Ruben, anakku je bakas, ikau kaabasku, bua tamparan kagancangku. Ikau pangkagagah tuntang pangka abase bara hapus anakku.

⁴Ikau murah hongge kilau danum, awi te ikau dia je mambatang; awi ikau hinje dengan gundikku, imapam eka batiroh bapam.

⁵Simeon tuntang Lewi hampahari; sanjata ewen jete alat kakaras.

⁶Aku dia handak omba huang pakat ewen, dia kea huang pumpong ewen. Awi ewen mampatei huang kasingi, mampalongkang banteng tagal rami-rami.

⁷Sapa akan kasingin ewen, awi kapahame. Sapa akan kalait ewen, awi kapapae. Aku handak mamisah-darai awen hong hapus Israel. Aku handak manaburan ewen marak kakare bangsa.

⁸Yuda, ikau kareh manangkarap tekok musohm; kare paharim kareh manara ikau tuntang sontop manyembah intu taharepm.

⁹ Yuda kilau singa tabela, ie manangkarap taloh kinae, palus haluli akan sarangae; ie ngaliat palus menter, tuntang jaton ije je bahanyi mangguleie.

¹⁰Yuda kareh mimbing tongkeh karajaan, turonae kareh marentah katatahie. Kare bangsa kareh magah panenga,[98] tuntang sontop manyembah intu taharepe,

¹¹Anak kalidai imetenge intu upon kayu, upon anggor je pangkahalape. Ie mampukan pakaiae hapan anggor, anggor bahandang kilau daha.

¹²Bahandang matae awi mihop anggor, baputi kasingae awi mihop susu.[99]

¹³Sebulon kareh melai tokep tasik; kare kapal kareh tende intu saran pantai ayue; sampai Sidon tikas ekae.

¹⁴Isaskar te kilau kalidai abas je menter helat karanjang je ietoe.

¹⁵Ie mite eka te paham kahalape tuntang lewu te paham kabungase, palus ie maniling bahae eka mandak taloh eton, ie imaksa bagawi kilau jipen.

¹⁶Ikau Dan, kareh marentah bangsa aim ikau jadi bangsa kilau bangsa beken intu Israel.

¹⁷Ikau kilau handipe intu saran jalan, handipe tada intu saran jalan, je manutok takir kuda sampai panongkange tambalang.

¹⁸O TUHAN, salamat je inengam, jete je ientaiku.

¹⁹Gad, ikau kareh iawi bigal, tapi ikau kareh mambaleh mambigal ewen.

²⁰Aser, panginam malabien hayak manga-mangat, ikau kareh manatap panginan akan kare raja.

²¹Naptali, sama kilau bajang lapas, paham bahalap kare anake.[100]

²²Yosep sama kilau kalidai tabela, kalidai baliar tokep tahasak danum, dari-dari intu biling bukit.[101]

²³Musoh paham mawi, manggoange hapan panah dengan sampitie.

²⁴Tapi Yosep tetep gancang penange,[102] tetep kaabas panah aie, tagal kuasan Sakatik je paham abas, Hatalla ain Yakob, je mahaga Israel.

²⁵Hatalla ain bapam mandohop ikau; Je Jaton Tikas Kuasae mamberkat ikau hapan ujan bara langit tuntang danum bara penda petak. Hapan anak tuntang sapi,

²⁶gandom tuntang kambang.[103] Berkat Hatalla ain bapam labih bara panatau kare bukit je bakas toto.[104] Keleh kare berkat te mohon akan hunjun takolok Yosep, hong lingkaue Ie te paling mambatang marak kare paharie.

²⁷Benyamin te sarigala je basiak. Hong hanjewu ie manangkarap taloh kinae. Hong hamalem ie mambagi-bagie.”

²⁸Jete kare due walas suku Israel, tuntang auh je inyewut bapa ewen metoh manyampai auh salamat hapisah akan genep bitin ewen.

²⁹ Limbah te Yakob mameteh kare anake, “Hanjulo tinai aku handak matei kilau tato hiangku. Keleh mangubur aku kareh habambai dengan ewen hong goha intu Makhpela, hila timor Mamre hong tanah Kanaan. Abraham jari mamili goha tuntang tanah hakalilinge bara Epron oloh Het mangat akan manjadi kubur.

³¹ Intu hete Abraham tuntang Sarah, Isaak tuntang Rebeka ingubur; tuntang intu hete kea aku mangubur Lea.

³²Tana tuntang goha je aton intu hete jari imili bara oloh Het. Keleh mangubur aku intu hete.”

³³ Limbah jari lepah kare auh petehe akan kare anake Yakob mampenter arepe palus mahutos.