Read Ngaju GENESIS 5 Bible Online

GENESIS 5 - Ngaju bible

GENESIS 5

¹ Jetoh horoi rinting turonan Adam [Metoh Hatalla manjapa olon, injapae ewen kilau ampin Hatalla kabuat.

² Injampae ewen hatue tuntang bawi. Ie mamberkat ewen tuntang manyewut ewen “Olon”.]

³Metoh Adam 130 nyelo umure, ie mandino anak hatue je ampie kilau ie kabuat, palus inengae arae Set.

⁴Limbah te Adam magon belom katahin 800 nyelo tinai tuntang mandino kare anak je beken.

⁵Ie matei hong umur 930 nyelo.

⁶Metoh Set 105 nyelo umure, ie mandino anak hatue, arae Enos.

⁷Limbah te Set magon belom 807 nyelo tinai tuntang mandino kare anak beken.

⁸Ie matei hong umur 912 nyelo.

⁹Metoh Enos 90 nyelo umure, ie mandino anak hatue, arae Kenan.

¹⁰Limbah te Enos magon belom 815 nyelo tinai tuntang mandino kare anak beken.

¹¹Ie matei hong umur 905 nyelo.

¹²Metoh Kenan 70 nyelo umure, ie mandino anak hatue, arae Mahalaleel.

¹³Kenan magon belom 840 nyelo tinai tuntang mandino kare anak je beken.

¹⁴Ie matei hong umur 910 nyelo.

¹⁵Metoh Mahalaleel 65 nyelo umure, Ie mandino anak hatue, arae Yared.

¹⁶Limbah te Mahalaleel magon belom 830 nyelo tinai tuntang mandino kare anak je beken.

¹⁷Ie matei hong umur 895 nyelo.

¹⁸Metoh Yared 162 umure, ie mandino anak hatue, arae Henokh.

¹⁹Limbah ie manak Henokh, Yared magon belom 800 nyelo tinai tuntang mandino kare anak beken.

²⁰Ie matei hong umur 962 nyelo.

²¹Metoh Henoh 65 nyelo umure ie mandino anak hatue arae Metusalah.

²²Limbah te Henokh belom hong kehinje dengan Hatalla katahin 300 nyelo. Ie mandino kare anak je beken

²³tuntang umure manyampai 365 nyelo.

²⁴ Awi Henokh harajur heret dengan Hatalla, ie lilap induan awi Hatalla.

²⁵Metoh Metusalah 187 nyelo umure, ie mandino anak hatue, arae Lamekh.

²⁶Limbah te Metusalah magon belom 782 nyelo tinai tuntang mandino kare anak je beken.

²⁷Ie matei hong umur 969 nyelo.

²⁸Metoh Lamekh 182 nyelo umure, ie mandino anak hatue.

²⁹Lamekh hamauh, “Anak toh akan mampahian gawin itah metoh itah bagawi babehat nguan petak je inyapa TUHAN.” Awi te Lamekh manggare anak te Noah.[19]

³⁰Limbah te Lamekh magon belom 595 nyelo tinai. Ie mandino kare anak je beken,

³¹tuntang matei hong umur 777 nyelo.

³²Limbah Noah 500 nyelo umure, ie mandino telo anak hatue, iete Sem, Ham, tuntang Yapet.