Read Ngaju GENESIS 8 Bible Online

GENESIS 8 - Ngaju bible

GENESIS 8

¹Hatalla mingat Noah tuntang kare meto je aton dengae hong kapal te. Hatalla mampadumah riwut sampai danum te nampara surut.

²Uras lowang danum hong penda petak tuntang uras bauntonggang danum hong langit inutup Awie. Ujan terai,

³tuntang danum sasar surut. Limbah 150 andau danum te dia kea lalau handalem.

⁴Hong tanggal uju walas bulan uju, kapal te sangkarah hujun bukit Ararat.

⁵Danom mamparajur kasurute tuntang hong tanggal ije bulan sapuluh kare tantan bukit nampara gitan.

⁶Limbah epat puluh andau, Noah mambuka ije baunsengok kapal,

⁷tuntang malapas ije kongan burong kak. Burong te dia haluli akan kapal tapi harajur tarawang lulang-luli sampai danum soho te lepah toto.

⁸Palus Noah malapas ije kongan burong dara hapa mangatawan, en danum jari surut.

⁹Tapi awi danum magon mampaleteng hapus petak, burong dara te dia sondau ekae tingkep. Palus ie buli haluli akan kapal; Noah mantajok lengee palus mimbit ie tame kapal.

¹⁰Noah mentai uju andau tinai, palus ilapase tinai burong dara te.

¹¹Katika andau jari halemei burong te haluli manalih ie mimbit intu totoke ije kalambar dawen saitun je belom. Awi te Noah mangatawan je danum jari surut.

¹²Limbah mentai uju andau tinai, ie malapas burong dara te sinde tinai; sinde te burong te dia haluli talih ie tinai.

¹³Metoh umur Noah 601 nyelo, hong tanggal ije bulan ije, danum jari surut samasinde. Noah mambuka sapau kapal te, tuntang mite kare taloh hakaliling. Ie mite petak jari keang.

¹⁴Hong tanggal due puluh uju bulan due, petak jari keang.

¹⁵Palus Hatalla hamauh dengan Noah,

¹⁶“Keleh balua bara kapal te dengan sawam, kare anakm tuntang kare sawan ewen.

¹⁷Imbit balua kare burong tuntang meto je beken, aloh hai atawa korik, mangat ewen tau manak-manaka tuntang tayap akan hapus petak.”

¹⁸Balalu Noah balua bara kapal te dengan sawae, tuntang kare anake dengan kare sawan ewen.

¹⁹Uras kare burong tuntang meto hunjun petak balua bara kapal te, genep kongan dengan kare jalahae.

²⁰Noah mampendeng ije mesbeh akan TUHAN. Induae ije kongan bara genep jalahan burong tuntang meto je beken, palus jete ilupute akan parapah je ingehu hunjun mesbeh.

²¹Parapah je mangat ewaue te mampasanang atei TUHAN, tuntang ie hamauh huang ateie, “Aku dia akan manyapa kalunen toh tinai tagal gawin olon; Aku katawan je bara wayah katabelae, tirok pikir olon te papa. Aku dia tinai mampatei kare taloh belom kilau je haron ilalus awi-Ku toh.

²²Katahin kalunen toh aton, harajur aton wayah mimbul tuntang wayah manggetem, wayah sadingen tuntang wayah balasot, wayah pandang tuntang wayah ujan, handau tuntang hamalem.”