Read Ngaju 2 SAMUEL 11 Bible Online

2 SAMUEL 11 - Ngaju bible

2 SAMUEL 11

¹ Bahut, kare raja miar baparang hong wayah taloh manyuloh hong tamparan nyelo. Tuntang hong wayah jete nyelo te Dawid manyoho Yoab miar baparang hayak kare pangkalimae tuntang hapus tantara Israel; palus ewen mampakalah oloh Amon tuntang mangapong lewu Raba. Tapi Dawid melai intu Yerusalem.

²Sinde katika hong halemei, limbah Dawid misik batiroh, ie tanjo-tanjong intu sapau istanae je rata te. Bara hete ie mite ije biti oloh bawi je kanjerae mandoi, tuntang oloh bawi te paham bahalap.

³Palus Dawid manyoho misek eweh oloh bawi te. Insuman akan Dawid je oloh bawi te arae Batseba; aran bapae te Eliam tuntang aran banae Uria oloh Het.

⁴Dawid manyoho oloh mangat manduan oloh bawi te, tuntang limbah ie dumah akan Istana, Dawid batiroh dengae. (Batseba harue ih jari mawi upacara mamparasih arepe limbah haid). Palus ie buli akan humae.

⁵Pire-pire katahie limbah te Batseba nampara batihi palus ie mangirim kabar akan Dawid tahiu taloh te.

⁶Dawid bagulong mangirim parentah akan Yoab, koae, “Soho Uria oloh Het te dumah talih aku.” Palus Yoab manyoho Uria manyondau Dawid.

⁷Metoh Uria manaharep Raja Dawid, raja misek kilen ampin Yoab tuntang pasukan Israel, tuntang kea kilen ampin kajadian huang parang.

⁸Limbah te Dawid hamauh dengan Uria, “Keleh buli akan humam tuntang istirahat hanjulo.” Limbah Uria malihi Istana, Dawid mangirim panenga akan human Uria.

⁹Tapi Uria dia buli, malengkan ie batiroh intu baun lawang istana dengan kare pangawal raja.

¹⁰Akan Dawid insanan tahiu taloh te. Palus ie misek Uria, “Ikau harun ih haluli bara pangguet kejau, mbuhen ikau dia buli akan humam?”

¹¹Tombah Uria, “Tantara Israel tuntang Yuda kanjerae nguan gawin kalahi matei-matei tuntang Patin Janjin TUHAN mampahayak ewen; Yoab pangkalima ikei tuntang kare perwirae mampendeng kemah intu janah. Lalehae aku toh buli akan huma, tuntang kuman mihop hayak batiroh dengan kabalingku? Tagal hambaruan raja tuntang hambaruan ayungku, aku dia kareh mawi taloh te!”

¹²Palus koan Dawid, “Terai, keleh istirahat tinai intu hetoh andau toh tuntang hanjewu jewu inyohoku ikau haguet.” Uria melai intu Yerusalem andau te. Andau jwue ie irawei kuman awi Dawid.

¹³Ie kuman tuntang inenga akae are taloh ihop sampai ie babusau. Tapi hong alem te kea Uria mahin dia buli akan humae, malengkan batiroh halapik kahowute[24] intu huang kamar pangawal istana.

¹⁴Andau jewue tinai Dawid manyurat akan Yoab, tuntang mangirime hayak Uria.

¹⁵Ie manyurat, “Andak Uria intu baris hila baun, eka parang je paling sabak, palus ikau undur jaton ingatawan awie, mangat ie matei.”

¹⁶Metoh Yoab mangapong lewu te, Uria inyoho haguet akan eka je puna ingatawan awie injaga toto-toto awi musoh.

¹⁷Metoh tantara musoh balua bara lewu tuntang manyarang pasukan Yoab, pire-pire biti pangkalima Dawid matei, tamput kea Uria.

¹⁸Limbah te Yoab mangirim sarohan akan Dawid mansanan ampin kajadian huang parang te.

¹⁹Parentah Yoab akan sarohan te “Limbah raja mahining laporan tahiu kajadian huang parang toh,

²⁰mungkin ie sangit tuntang misek dengam, ‘Mbuhen keton pahalau tokep dengan lewu te? En dia keton katawan je musoh pasti kareh mamanah bara hunjun kare dinding batu te?

²¹ En keton jari kalapean kilen ampie Abimelekh anak Gideon te impatei intu Tebes? En dia ie matei awi ije biti oloh bawi je manjakah batu galingan tepong bara hunjun dinding akae? Jadi, mbuhen keton lalau tokep dengan dinding te?’ Amon raja misek kalote, sanan akae, ‘Uria perwira ain raja, matei kea!’ ”

²²Palus sarohan te haguet manaharep Dawid tuntang mansanan taloh je irentah Yoab akae.

²³Sarohan te hamauh, “Musoh ikei labih kuat, tuntang ewen balua bara lewu manyarang ikei intu janah. Tapi hapan kajujun ikei, ikei olih manjuju ewen haluli sampai akan lawang lewu.

²⁴Limbah te bara hunjun dinding ewen mamanah ikei, tuntang pire-pire bara pangkalima raja tamput kea Uria jari matei.”

²⁵Dawid hamauh dengan sarohan te, “Keleh mampaabas atei Yoab tuntang sanan akae mangat ela korik atei, awi dia tau inujum eweh je kareh matei hong parang. Sanan akae uka nguan gawi manyarang je labih tamam hindai taharep lewu te sampai lewu te manyarah.”

²⁶Metoh Batseba mahining je banae jari matei, ie manatum.

²⁷Limbah lepah wayah tatume, Dawid manyoho manduan oloh bawi te akan istana tuntang ie jadi sawae. Pire-pire bulan limbah te ie manak ije anak hatue. Tapi TUHAN dia sanang dengan gawin Dawid te.