Read Ngaju 2 SAMUEL 12 Bible Online

2 SAMUEL 12 - Ngaju bible

2 SAMUEL 12

¹ Limbah te TUHAN manyoho Nabi Natan manyondau Dawid. Natan haguet talih ie tuntang hamauh, “Aton due biti oloh je melai hong ije lewu, je ije tatau tuntang je ije tinai susah.

²Je tatau ayue aton are meto tuntang tabiri.

³Je susah baya aton ije kongan anak tabiri je imilie. Anak tabiri te ihagae sampai hai hong humae hayak kare anake. Anak tabiri te impakanae hayak panginan oloh te, mihop bara sangkire haream, tuntang batiroh huang pangkoae; pandak auh, iawie sama kilau anak bawi ayue kabuat.

⁴Sinde andau je tatau te dinon tamu. Ie dia maku manyambalih tabiri ayue atawa sapi kabuat uka impakasak akan tamu te. Tapi ie manduan anak tabirin oloh je susah te, palus impakasake akan tamu te.”

⁵Mahining auh te Dawid paham sangit tagal gawin oloh je tatau te tuntang hamauh, “Sala toto oloh tatau te! Tagal TUHAN je belom, oloh te musti mangganti anak tabiri te epat lipet karee tuntang ie musti ihukum matei!”

⁷Koan Natan dengan Dawid, “Oloh te iete raja kabuat! Tuntang jetoh je insanan TUHAN, Hatallan Israel, ‘Ikau jari iangkat-Ku jadi raja akan Israel tuntang inyalamat-Ku bara Saul.

⁸Karajaan Israel tuntang kare sawae jari inenga-Ku akam. Ikau iangkat-Ku haream jadi raja akan Israel tuntang Yuda. Jaka jete dia sukup, pasti kareh inenga-Ku tinai akam sama kilau te karee.

⁹Mbuhen ikau dia paraba kare parentah-Ku? Mbuhen ikau mawi kapapa te? Ikau manyoho uka Uria impatei hong parang. Inaluam ie impatei awi oloh Amon, tuntang ikau manduan sawae!

¹⁰Awi ikau dia manumon auh-Ku tuntang ikau manduan sawan Uria, maka huang genep turonam gilir-manggilir aton je matei buah puno.

¹¹ Aku basumpah uka mawi calaka akam je panumahe bara kaluarga ayum kabuat. Aku kareh manduan kare sawam intu baun matam kabuat. Ewen inenga-Ku akan oloh beken je kareh batiroh dengan ewen handa-handau.

¹²Ikau jari mawi dosa suni-suni, tapi aku kareh mambukti ancamang-Ku tara-tarang intu taharep baun hapus oloh Israel.’ ”

¹³Palus koan Dawid dengan Natan, “Aku jari badosa intu TUHAN.” Tombah Natan, “TUHAN jari mampun raja; raja dia kareh matei.

¹⁴Tapi awi raja jari manawah TUHAN dengan gawim te, anak raja je harue inakan te kareh matei.”

¹⁵Limbah te Natan buli humae. Anak Dawid je inakan awi Batseba balon Uria, haban dengan kahandak TUHAN.

¹⁶Palus Dawid balakudoa intu TUHAN mangat anak te keleh. Ie puasa tuntang genep alem ie menter hapus alem intu laseh kamar ayue.

¹⁷Palus kare oloh hai istana manalih ie tuntang mangatau mangat harikas, tapi ie manolak tuntang dia maku kuman hayak ewen.

¹⁸Ije minggo limbah te anak te matei, tuntang kare jipen Dawid mikeh mansanan hal te. Koan ewen, “Raja dia maku mahining amon ikei hakotak dengae. Mahin tinai katika toh limbah anake matei! Ela-ela ie kareh putus tau mangapehe arepe!”

¹⁹Metoh Dawid mite kare oloh ayue te bisik-bisika, ie katawan je anak te jari matei. Palus ie misek dengan ewen, “En anak te jari matei?” “Jadi, raja,” tombah ewen.

²⁰Palus Dawid harikas bara laseh, balalu mandoi tuntang manyarak balau, hayak baganti baju. Limbah te ie haguet sombayang akan human TUHAN. Limbah te ie haluli akan istanae, tuntang balaku inatap panginan akae, palus ie kuman.

²¹Nampayah te, kare oloh ayue hamauh dengae, “Ikei dia harati raja. Metoh anak te magon belom, raja bapuasa tuntang manangis; tapi limbah ie matei, raja harikas tuntang kuman!”

²²“Yoh,” tombah Dawid, “puna aku bapuasa tuntang manangis metoh anak te magon belom, awi aku manirok: Mungkin TUHAN kareh masi aku tuntang nahuang mangat anak te belom.

²³Tapi toh, limbah ie matei, kanduengku tarus bapuasa? En tau aku mambelome haluli? Kareh aku mahin haguet kea akan ekae aton, tapi toh ie dia tau haluli talih aku.”

²⁴Limbah te Dawid mampong atei Batseba sawae, palus batiroh dengae. Batseba luas ije anak hatue je inggare Salomo awi Dawid. TUHAN sinta anak te

²⁵tuntang manyoho Nabi Natan manggare anak te Yedija,[25] awi TUHAN sinta ie.

²⁶Yoab magon parang malawan Raba ibukota lewu Amon, tuntang jari bilak handak irabute.

²⁷Palus ie mangirim sarohan akan Dawid tuntang malapor, “Aku jari manyarang Raba, tuntang marabut eka oloh manyadia danume.

²⁸Toh, keleh raja mamumpong tisan tantara, palus mamimpin gawi manyarang uka manguasa lewu te. Tumon te kareh dia oloh manyewut aku je marabut lewu te.

²⁹Palus Dawid mamumpong hapus tantara, tuntang manyarang Raba, ie manyarange tuntang mampakalahe.

³⁰Dawid manduan makota bara takolok rajan ewen[26] tuntang ihapae kabuat intu takoloke. Makota te ehate lakau 35 kilogram tuntang bahias batu barega. Dawid kea mimbit are toto ramo rampasan bara lewu te.

³¹Beken bara oloh lewue iirak, tuntang inyoho mimbit garagaji, cangkul sanaman, tuntang kapak sanaman, ewen kea inyoho bagawi[27] intu eka mawi batu bata. Taloh te ilaluse kea dengan oloh lewu bara kare lewu Amon je beken. Limbah te Dawid tuntang hapus tantarae haluli akan Yerusalem.