Read Ngaju 2 SAMUEL 13 Bible Online

2 SAMUEL 13 - Ngaju bible

2 SAMUEL 13

¹Absalom anak Dawid aton ije betaue je bahalap, arae Tamar. Amnon anak hatue ain Dawid bara sawae je beken, sinta dengan Tamar

²tuntang handak batiroh dengae. Tapi jete taloh je mastahel akae awi Tamar hindai kawin tuntang dia tau bergaul dengan oloh hatue. Amnon harajur manirok taloh te sampai kajariae ie haban.

³Amnon aton sobat ayue je paham pintar arae Yonadab anak Simea kaka Dawid.

⁴Yonadab hamauh dengan Amnon, “Pangeran, mbuhen genep andau ikau ampie pehe atei? Tege narai?” Tombah Amnon, “Aku sinta dengan Tamar, andi Absalom paharingku te.”

⁵Palus koan Yonadab dengae, “Jete murah ih! Menter ih intu ekam batiroh, tuntang awi arepm sama kilau jaka metoh ikau haban. Amon bapam dumah manyengok ikau, sanan akae, ‘Bapa, soho Tamar dumah mangat ie manenga akangku taloh kinan. Amon aku tau mite ie mampakasak panginan intu hetoh, aku tau kuman.’ ”

⁶Limbah te Amnon menter hong ekae batiroh kila-kilau haban. Metoh te Dawid dumah manyengok. Amnon hamauh dengae, “Bapa, soho Tamar dumah mangat mampakasak wadai intu taharepku hetoh; kareh aku nahuang kuman.”

⁷Limbah te Dawid mangirim peteh akan Tamar intu istana, koae, “Lius akan human kakam Amnon, tuntang nampa taloh kinan akae.”

⁸Palus Tamar haguet akan hete tuntang sondau Amnon menter intu ekae batiroh. Tamar manduan isut adonan, palus intu taharep Amnon ie manatap wadai akan imanggang.

⁹Limbah te impaluae wadai te bara panci tuntang inyarongae. Tapi Amnon dia maku kuman. Ie hamauh, “Soho uras oloh balua bara hetoh!”

¹⁰Limbah uras oloh balua bara kamar te, Amnon hamauh dengan Tamar, “Imbit kare wadai te akan hetoh, tuntang pasuap aku!” Tamar manumon.

¹¹Tapi metoh Tamar manjuju wadai te akae, Amnon mimbing oloh bawi te sambil hamauh, “Ndi, ayo batiroh dengangku!”

¹²“Ela, ka!” tombah oloh bawi te. “Ela mamaksa aku mawi taloh je hina kilau te! Taloh te dia puji ilalus intu Israel.

¹³Amon manjadi kalote, akan kueh aku musti manyahokan baungku? Mahin tinai ikau kareh inawah oloh hong hapus Israel toh. Keleh manahiue dengan raja, pasti raja kareh manyoho aku jadi sawam.”

¹⁴Tapi Amnon dia maku manumon, tuntang awi ie labih abas, imaksae andie te hapan kakaras, palus irayape.

¹⁵Tapi limbah te Amnon paham basingi dengan Tamar, tuntang kasingie te labih hai bara sintae je solake. Palus ie hamauh dengan andie te, “Balua!”

¹⁶Tamar tombah, “Hau, mbuhen kalote ka? Amon ikau maharak aku, kapapa te labih hai[28] bara taloh je jari iawim endau!” Tapi Amnon dia maku mahining.

¹⁷Ie mantehau pelayan ayue palus hamauh, “Imbit oloh bawi toh balua, tuntang ngunci bauntonggang!”

¹⁸Pelayan te malalus parentah te. Pakaian Tamar iete jobah panjang je balenge panjang.[29] Hong jaman te[30] kare putri je hindai kawin biasa mahapan pakaian sama kilau te.

¹⁹Tapi Tamar mandak kawo intu hunjun takoloke, marabit jobahe, tuntang haguet sambil makop baue dengan kaduadue lengee hayak manangis tungo-tungoi.

²⁰Metoh Absalom mitee, ie misek, “En Amnon endau malanggar kahormatam? Terai andiku, ela ikau manirok taloh te tinai. Ie te kan kakam, jadi ela mansanan taloh te akan ewe-eweh.” Palus Tamar mangabuat arep huang human Absalom, tuntang ie paham pehe atei hayak ungi-ungin.

²¹Raja Dawid mahining tahiu kajadian te, tuntang ie paham sangit.

²²Absalom paham mingkes kasingie dengan Amnon tuntang dia maku tinai bapander dengae awi ie jari marayap andie Tamar.

²³Due nyelo limbah te Absalom mawi pesta manggunting bulun tabiri intu Baal-Hasor, tokep lewu Epraim, tuntang ie marawei uras anak raja.

²⁴Ie manaharep Raja Dawid tuntang hamauh, “Bapa, aku mawi pesta manggunting bulun tabiri. Keleh bapa dumah kea akan pesta te dengan kare oloh hai hong istana.”

²⁵Tapi raja tombah, “Ela, anakku, awi amon ikei uras dumah, ikei kareh manyusah ikau.” Absalom bajuju musok, tapi bapae tetep dia maku dumah. Ie baya manenga berkat ih akae.

²⁶Palus Absalom hamauh, “Amon kalote soho paharingku Amnon omba dengan ikei.” Koan raja, “Dia usah ie omba.”

²⁷Tapi awi Absalom harajur musok, kajariae Dawid manyoho Amnon tuntang uras anak hatuee je beken omba dengan Absalom. [Palus Absalom manyarongan panginan je mangat toto.][31]

²⁸Ie marentah kare oloh ayue, “Ite bua-buah, amon Amnon jari babusau awi mihop anggor, aku kareh manenga tanda, palus patei ie. Ela mikeh, aku je batanggung jawab akan taloh te. Awi dengan bahanyi tuntang ela bembang!”

²⁹Kare rewar te malalus parentah Absalom, palus ewen mampatei Amnon. Mite jete kare anak Dawid je beken manungkang genep kalidaie mije-mije tuntang mandari arepe.

³⁰Metoh ewen magon huang pangguet buli, oloh mansanan akan Dawid, “Absalom jari mampatei uras anak hatue ain raja, jaton ije je belom!”

³¹Raja harikas, palus marabit pakaiae awi pehe atei, tuntang mampeter arepe akan laseh. Uras pagawaie omba marabit pakaian ewen kea.

³²Tapi Yonadab anak Simea kaka Dawid hamauh, “Raja, ela mikeh tuntang ela manirok je uras anak raja jari matei. Baya Amnon ih je matei, awi jadi tarang jete je ingahandak Absalom bara metoh Tamar andie irayap awi Amnon.

³³Awi te ela percaya je anak raja jari uras matei lepah, awi je matei baya Amnon ih.”

³⁴Metoh te Absalom jari mandari arepe. Panjaga istana Dawid mite are oloh dumah mohon bukit bara hila Horonaim.[32] Ie balalu haguet manalih raja malapor taloh te.[33]

³⁵Palus Yonadab hamauh dengan Dawid, “Jete kare anak raja! Toto sama kilau je insanan rewarm endau.”

³⁶Harun ih ie lepah hakotak, kare anak Dawid tame akan huang. Ewen te nampara manangis, tuntang Dawid dengan kare oloh ayue kea manangis hayak pehe atei.

³⁷ Absalom hadari akan istana raja Gesur, iete Talmai anak Amihur. Ie melai intu hete katahin telo nyelo. Tapi Dawid manatum akan Amnon;

³⁹tapi limbah Dawid dia pehe atei tinai ie paham mangenang Absalom.