Read Ngaju 2 SAMUEL 14 Bible Online

2 SAMUEL 14 - Ngaju bible

2 SAMUEL 14

¹Yoab katawan je Raja Dawid paham mangenang Absalom,

²awi te ie manyoho manduan ije oloh bawi je pintar intu Tekoa. Metoh oloh bawi te sampai, Yoab hamauh dengae, “Keleh ikau pura-pura pehe atei; hapan pakaian manatum, tuntang ela mahapan minyak harum. Awi arepm sama kilau oloh bawi je jari tahi manatum pampatei oloh je inyintae.

³Limbah te lius talih raja, sanan akae kalotoh.” Palus Yoab mansanan akae taloh je musti insanae.

⁴Palus oloh bawi te haguet manaharep raja, tuntang sontop manyembah hayak hamauh, “Tuangku je Paham Tinduh-kahai, keleh dohop rewarm!”

⁵“Aton en?” pisek raja dengae. Oloh bawi te tombah, “Aku toh ije biti balo je belom susah. Banan rewarm jari matei.

⁶Aku aton due biti anak hatue, tuntang sinde andau ewen hasual intu janah. Awi jaton oloh je mamisahe, maka ije buah patei.

⁷Tuntang toh, hapus tundah kolan ayungku mamusoh aku tuntang balaku mangat aku manyarah anak ayungku je mampatei te akan ewen, mangat ewen mahukume dengan hukum matei, awi ie jari mampatei paharie. Amon aku manyarah anak rewarm te, maka batisa rewarm ungi-ungin kabuat. Ewen akan mampahancor kaharap rewarm je tikas ije, tuntang dia malihi ije anak hatue akan banan rewarm hapan manontong katuronae.”

⁸“Keleh buli,” koan raja, “Kareh aku maurus taloh te.”

⁹“Tuangku Je Paham Tinduh-kahai,” koan oloh bawi te, “en bewei je kareh iawi Tuangku, aku tuntang kaluarga ayungku je kareh mananggong kajariae; Tuangku tuntang kaluarga Tuangku dia basala.”

¹⁰Raja tombah, “Amon aton oloh je maancam ikau, imbit ie akangku, maka limbah te pasti ie dia kareh manderoh ikau tinai.”

¹¹Koan oloh bawi te, “Keleh Tuangku balaku doa intu TUHAN, Hatallan Tuangku, mangat oloh je handak mambaleh pampatei anak rewarm te ela sampai mawi kapapa je labih hai tinai dengan mampatei anakku je ije tinai.” Tombah Dawid, “Tagal TUHAN je belom, anakm te dia kareh inggulei aloh isut.”

¹²Palus oloh bawi te hamauh, “Tuangku Je Tinduh-kahai, soho aku hakotak isut tinai.” “Yoh,” tombah raja.

¹³Koan oloh bawi te, “Hapan auh Tuangku te, Tuangku jari mangaku je Tuangku kabuat basala awi dia manyoho anak Tuangku buli bara pangasingan. Mbuhen Tuangku mawi kasalan kalote taharep ungkup Hatalla?

¹⁴Itah urase kareh matei; itah toh sama kilau danum je batusoh akan petak tuntang dia tau imumpong haluli. Hatalla kea dia kareh mambelom tinai oloh je jari matei. Awi te keleh Tuangku manggau jalan mangat oloh buangan tau buli tinai.[34]

¹⁵Aku manaharep Tuangku awi aku iancam oloh. Palus aku manirok keleh aku hakotak dengan Tuangku dengan kaharap palakungku toh kareh inumon Tuangku.

¹⁶Rewarm manirok Tuangku kareh mahining tuntang manyalamat aku bara oloh je manggau jalan handak mampatei aku tuntang anakku. Ewen nahuang manganan ikei bara petak je inenga Hatalla akan ungkup Ayue.

¹⁷Rewar Tuangku toh percaya je janjin Tuangku te kareh manjamin kasalamat ayungku, awi Tuangku sama kilau malekat Hatalla, je tau mangabeken taloh je bahalap tuntang taloh je papa.[35] Keleh TUHAN, Hatallan Tuangku mampahayak Tuangku!”

¹⁸Raja tombah, “Aku nahuang misek ije paisek dengam, keleh tombah dengan bujur.” “Keleh Tuangku hakotak,” tombah oloh bawi te.

¹⁹Koan raja, “En Yoab je manyoho ikau?” Tombah oloh bawi te, “Tagal hambaruan Tuangku, aku dia tau mahila arep bara paisek Tuangku.[36] Puna toto auh Tuangku, Yoab jari mansanan akangku taloh je musti ilalus rewarm tuntang insanan rewarm.

²⁰Tapi ie mawi kalote akan mampahapus pakara te dengan bahalap. Tuangku pintar-harati sama kilau malekat Hatalla sampai katawan taloh handiai je manjadi.”

²¹Limbah te raja mantehau Yoab tuntang hamauh dengae, “Kanahuangm te kareh ilalusku. Lius manduan Absalom tuntang imbit ie akan hetoh.”

²²Yoab sontop intu taharep Dawid, palus hamauh, “Keleh Hatalla mamberkat raja! Toh aku katawan je raja marajin aku awi raja jari manumon palakungku.”

²³Palus Yoab haguet akan Gesur manduan Absalom mangat buli akan Yerusalem.

²⁴Tapi raja dia manyoho Absalom melai intu Istana. “Aku dia maku mite ie,” koan raja. Jadi Absalom langsung buli akan humae kabuat tuntang dia manaharep raja.

²⁵Absalom inara kilau oloh je paling bakena intu hapus Israel. Jaton oloh je labih bakena bara ie. Bara tatap paie sampai lawin balaue jaton kasalae.

²⁶Balaue labat toto, tuntang ie musti maneteke sinde ije nyelo awi angate lalau babehat. Balaue je ineteke te ehate labih bara due kilogram tumon timbangan ain raja.

²⁷Absalom aton telo anake hatue tuntang ije anake bawi je paham bahalap, arae Tamar.

²⁸Jadi due nyelo Absalom melai intu Yerusalem, tapi hindai kea ie hasondau dengan raja.

²⁹Sinde andau ie mantehau Yoab, uka manyoho ie manaharep raja, tapi Yoab dia maku dumah. Absalom mantehau sinde tinai, tapi Yoab dia maku dumah kea.

³⁰Limbah te hamauh ih Absalom dengan kare jipee, “Keton katawan tanan Yoab intu silan tanangku je imbul jelei? Nusul tana te.” Palus ewen haguet manusule.

³¹Balalu Yoab dumah akan human Absalom tuntang misek, “Mbuhen kare jipem manusul tanangku?”

³²Tombah Absalom, “Awi ikau dia maku dumah katika intehauku. Aku handak manyoho ikau manaharep raja tuntang manyampai paisekku toh, ‘Narai gunae aku malihi Gesur tuntang haluli akan hetoh? Labih bahalap aku melai intu kanih.’ ” Tuntang koan Absalom tinai, “Gau carae mangat aku tau manaharep raja, tuntang amon aku magon itong basala, aku sadia ihukum matei.”

³³Limbah te Yoab haguet manaharep Raja Dawid tuntang manyampai palakun Absalom. Palus raja mantehau Absalom, tuntang Absalom dumah sontop intu taharep raja. Raja palus manyambut ie hapan sium.