Read Ngaju 2 SAMUEL 15 Bible Online

2 SAMUEL 15 - Ngaju bible

2 SAMUEL 15

¹Limbah te Absalom manyadia akan arepe ije kareta parang dengan kuda hayak lime puluh biti pangiring.

²Genep andau Absalom misik susong hanjewu palus mendeng intu saran jalan tokep lawang istana. Genep oloh je handak mangadu pakarae akan raja, intehau tuntang isek awi Absalom koae, “Ikau bara suku kueh?” Tuntang amon oloh te tombah, “Bara suku toh atawa te,”

³maka Absalom hamauh, “Manumon hukum ikau bujur, tapi sayang jaton wakil raja je maku mahining auh kadom.”

⁴Palus koae tinai, “Coba jaka aku je jadi hakim, maka genep oloh je aton kabantah atawa tuntutan tau dumah talih aku tuntang kareh iawiku dengan adil.”

⁵Jaka aton oloh je manokep Absalom uka sontop manyembah ie, Absalom moloh lengee, palus oloh te imaloke tuntang inyiume.

⁶Kalote gawin Absalom dengan oloh Israel je handak mangado pakarae akan raja, tuntang tumon te Absalom manduan atei oloh Israel.

⁷Limbah halau epat[37] nyelo, Absalom hamauh dengan raja Dawid, “Bapa, soho aku haguet akan Hebron uka manggenep janjingku dengan TUHAN.

⁸Awi metoh aku magon melai intu Gesur lewu Siria, aku bajanji akan haguet sombayang akan TUHAN intu Hebron[38] amon Ie manyoho aku buli akan Yerusalem.”

⁹Tombah raja, “Lius dengan salamat.” Palus Absalom haguet akan Hebron.

¹⁰Tapi helo bara te ie jari mangirim kare sarohan akan uras bangsa Israel mimbit peteh, “Amon keton mahining auh tarompet, keleh malahap, ‘Absalom manjadi raja hong Hebron!’ ”

¹¹Bara Yerusalem aton due ratus biti je mandengan Absalom akan Hebron. Ewen dia katawan en-en tahiu pambarontakan te, tuntang ewen uras omba haguet jaton badawa en-en.

¹²Palus metoh Absalom maluput parapah, ie kea mangirim sarohan akan lewu Gilo uka mantehau Ahitopel, iete ije bara penasehat Raja Dawid. Kalote ampin komplotan malawan raja te sasar hai, tuntang sasar are oloh je omba Absalom.

¹³Limbah te ije biti sarohan tukang mimbit barita malapor akan Dawid, “Kare oloh Israel jari mamihak Absalom.”

¹⁴Palus Dawid hamauh dengan uras kare pagawaie je aton hong Yerusalem, “Ayo itah babungkat. Tikas jetoh jalae mangat itah luput bara Absalom. Dia tahi hindai ie kareh dumah. Gulong, ela sampai itah tau inggoang tuntang impakalah, sampai hapus oloh lewu impatei!”

¹⁵“Yoh, tuan raja,” tombah ewen. “Ikei tatap malalus en bewei kahandak raja.”

¹⁶Palus raja haguet, impahayak awi hapus keluargae tuntang pagawaie, kacuali sapuluh biti gundike je impelaie uka manunggu istana.

¹⁷Metoh raja tuntang uras kare pangiringe malihi lewu, ewen tende tokep huma je pangkalepahe.

¹⁸Uras kare pagawai raja mendeng[39] hila balikate metoh pasukan pangawal raja babaris mahalau ie. Kea jahawen ratus tantara je jari omba ie bara Gat, babaris intu taharepe.

¹⁹Nampayah jete raja hamauh dengan Itai pamimpin jahawen ratus tantara te, “Mbuhen ikau omba kea dengan ikei? Labih bahalap ikau haluli tuntang melai dengan raja je taheta. En ikau dia oloh asing, pangungsi je kejau bara lewum kabuat?

²⁰Hindai tahi ikau melai intu hetoh, lalehae kea aku manyoho ikau omba namuei dengangku? Aku kabuat dia katawan akan kueh aku kareh haguet. Keleh haluli tuntang imbit kea kawalm ije bangsa; keleh TUHAN sinta ikau tuntang baketep dengam.”[40]

²¹Tapi Itai tombah, “Ije Tinduh-kahai, tagal TUHAN je belom tuntang tagal hambaruan Tuangku, akan kueh bewei Tuangku haguet, aku kareh omba kea, aloh naharep pampatei.”

²²“Ayo!” tombah Dawid, “Miar tarus!” Palus Itai mananjong haya-hayak dengan hapus pasukae tuntang keluarga ewen.

²³Uras rayat manangis hai auhe metoh kare pasukan Dawid malihi lewu. Limbah te raja dimpah Sungei Kidron inuntut awi hapus pasukae, palus ewen mananjong manintu padang pasir.

²⁴Imam Sadok tuntang Imam Abyatar aton intu hete[41] hayak uras oloh Lewi je mimbit Patin Janjin TUHAN. Patin Janji te iandak,[42] tuntang hindai inggatang helo bara hapus rayat malihi lewu te.

²⁵Palus raja hamauh dengan Sadok, “Keleh malian Patin Janji te akan lewu. Amon TUHAN marajin aku, batantu aku kareh inyohoe haluli tuntang mite Patin Janji te tinai hayak dengan ekae melai.

²⁶Tapi amon TUHAN dia rajin dengangku, tasarah ih dengan taloh je eka kanahuang Ayue tahiu bitingku!”

²⁷Limbah te raja hamauh tinai dengan Sadok, “Imbit Ahimaas anakm tuntang Yonatan anak Abyatar; keleh keton haluli akan lewu dengan damai.[43]

²⁸Aku kareh mentai intu tokep kare eka dimpah sungei hong padang pasir sampai manarima kabar bara keton.”

²⁹Palus Sadok tuntang Abyatar mimbit Patin Janji te haluli akan Yerusalem tuntang ewen melai intu hete.

³⁰Limbah te Dawid mengkak sapatue. Ie dengan pangikute mandai Bukit Saitun sambil manangis dengan takolok inyandurong tanda pehe atei.

³¹Metoh insanan akan Dawid[44] je Ahitopel kea omba hayak komplotan Absalom, Dawid balakudoa kalotoh, “O, TUHAN, keleh mambalang auh nasehat Ahitopel!”

³²Hong katika Dawid sampai akan tantan bukit intu eka oloh bahut sombayang intu TUHAN, ie inyambut awi sobate je baketep, iete Husai oloh Arki. Pakaian Husai barabit tuntang takoloke imbowor kawo.

³³Dawid hamauh dengae, “Amon ikau omba hayak aku, ikau jadi tanggonggan akangku.

³⁴Tapi ikau tau mandohop aku amon ikau haluli akan lewu tuntang hamauh dengan Absalom, je ikau handak malayani ie dengan baketep, sama kilau ikau jari melayani bapae bihin. Dengan cara te ikau tau mambalang kakare nasehat Ahitopel.

³⁵Imam Sadok tuntang Abyatar kea aton intu kanih. Sanan akan ewen taloh handiai je ihiningm intu istana.

³⁶Ahimaas anak Sadok tuntang Yonatan anak Abyatar kea omba bapa ewen, jadi ewen aton intu hete kea. Kare anak ewen te je tau ikau manyohoe dumah akan hetoh manyampai kare kabar je tau ikau mahininge.”

³⁷Palus Husai sobat Dawid te haluli akan Yerusalem, pas metoh Absalom sampai intu hete.