Read Ngaju 2 SAMUEL 16 Bible Online

2 SAMUEL 16 - Ngaju bible

2 SAMUEL 16

¹ Metoh Dawid harun ih mahalau tantan bukit, salenga dumah Siba jipen Mepiboset, manyondau ie. Siba mimbit ije pasang kalidai je mamuat due ratus kabawak rote, saratus katampong bua anggor keang, saratus katampong kare bua je magon belo-belom tuntang ije kantong danum anggor.

²Raja Dawid misek dengae, “Akan narai uras kare taloh toh?” Tombah Siba, “Kare kalidai toh akan meto ukong akan keluaraga raja, rote tuntang kare bua toh akan kare pelayan raja, tuntang danum anggor toh akan ewen je heka intu padang pasir.”

³Palus pisek raja dengae, “Hong kueh Mepiboset eson Tuan Saul?” “Ie magon tetep intu Yerusalem,” tombah Siba, “awi ie percaya je toh oloh Israel handak malian karajaan Saul buee akae.”

⁴Palus raja hamauh dengan Siba, “Nampara toh kare taloh je ayun Mepiboset jadi ayum.” “Tarimakasih raja,” tombah Siba. “Keleh raja harajur sanang dengangku!”

⁵Metoh Dawid sampai Bahurim, bara eka te dumah ije biti oloh. Sambil manokep rombongan raja ie manyapa Dawid. Oloh te bagare Simei anak Gera bara tundah paharin Saul.

⁶Simei mamedak Dawid tuntang kare pagawaie dengan batu, aloh Dawid ingaliling awi oloh ayue tuntang kare pangkalimae.

⁷Simei manyapa, koae, “Tolak kanih! Tolak kanih! Pamuno! Oloh papa!

⁸Ikau jari marabut karajaan Saul! Toh ikau ihukum TUHAN awi mampatei kalote karee tundah paharin Saul. TUHAN jari manenga karajaam akan anakm Absalom. Toh keleh ikau matei o pamuno!”

⁹Abisai andi Yoab anak Seruya, hamauh dengan raja, “Mbuhen raja nalua pangeran te manyapa raja? Soho aku manyambalih uyate!”

¹⁰Tapi raja hamauh dengan Abisai tuntang Yoab kakae, “Ela paduli ie. Nalua ih ie manyapa aku. Awi amon TUHAN je manyoho ie, eweh je tau misek mbuhen ie mawie kalote?”

¹¹Palus Dawid hamauh tinai dengan Abisai tuntang dengan uras oloh ayue, “Anakku kabuat manggau jalan handak mampatei aku; Mbuhen ikau hengan mite gawin oloh Benyamin toh? TUHAN wei je manyoho ie manyapa aku; awi te ela mawi taloh en-en dengae tuntang nalua ih ie manyapa.

¹²Mungkin TUHAN akan manantuani kapehe[45] toh tuntang mamberkat aku kilau gantin sapae te.”

¹³Palus Dawid tuntang kare pangiringe marajur pangguet, tinai Simei mananjong balias manuntut ewen intu biling bukit sambil manyapa tuntang mamedak dengan batu tuntang petak.

¹⁴Raja tuntang hapus oloh ayue heka toto metoh sampai intu Sungei Yordan;[46] palus ewen manyarenan kahekae intu hete.

¹⁵Pandehan te Absalom tuntang uras oloh Israel je mampahayak ie tame akan lewu Yerusalem, tuntang Ahitopel omba kea.

¹⁶Metoh Husai kawal Dawid je baketep te hasondau dengan Absalom, Husai mangkariak “Belom raja! Belom raja!”

¹⁷Tapi Absalom misek dengae, “Intu kueh kaketepm dengan kawalm Dawid? Mbuhen ikau dia omba ie?”

¹⁸Husai tombah, “Kueh tau! Aku toh handak mamihak oloh je intih awi TUHAN, awi kare oloh toh, tuntang awi hapus oloh Israel. Oloh te je akan inuntutku.

¹⁹Tinai, eweh hindai kareh je indohopku? En dia anak Tuangku? Sama kilau aku jari mandohop bapa tuan, kalote kea kareh aku mandohop tuan toh.”

²⁰Limbah te Absalom hamauh dengan Ahitopel, “Suman taloh je musti iawiku.”

²¹Tombah Ahitopel, “Lius akan kare gundik bapa Tuangku, je ilihi akan manunggu istana, tuntang batiroh dengan ewen. Hapus Israel kareh katawan je dengan gawin Tuangku te, Tuangku jari itong musoh awi Tuangku. Te uras oloh ayun Tuangku kareh sasar bahanyi.”

²² Jadi, akan Absalom inampa kemah intu hunjun sapau istana je rata te. Palus sambil inampayah awi uras oloh, Absalom tame akan huang kemah te tuntang batiroh dengan kare gundik bapae.

²³Hong wayah te gagenep auh nasihat Ahitopel inarima kila-kilau jete auh Hatalla kabuat; aloh Dawid aloh Absalom manumon kare nasehate.