Read Ngaju 2 SAMUEL 17 Bible Online

2 SAMUEL 17 - Ngaju bible

2 SAMUEL 17

¹Dia tahi limbah te, Ahitopel hamauh tinai dengan Absalom, “Soho aku mintih 12.000 biti. Alem kareh aku haguet manggoang Dawid.

²Ie kareh inyarangku metoh ie heka tuntang nihau kamentenge. Aku akan manarewen ie sampai hapus oloh ayue hadari. Baya Dawid bewei je kareh impateiku.

³Tapi hapus oloh ayue kareh iliangku akan Tuangku sama kilau panganten bawi haluli akan banae. En dia Tuangku baya nahuang hambaruan ije biti bewei?[47] Je beken kareh dia aku mawie.”

⁴Nasehat te itong bahalap awi Absalom tuntang awi uras pamimpin Israel.

⁵Aloh kalote Absalom hamauh, “Tehau toh Husai; keleh itah mahining kilen tiroke.”

⁶Metoh Husai dumah manaharep, Absalom mansanan rencana Ahitopel, palus koae, “En handak itah manumon nasehat te? Amon dia tenga usul je beken.”

⁷Husai tombah, “Nasihat Ahitopel sinde toh dia bahalap.

⁸Tuan pasti katawan je Dawid tuntang oloh ayue te pejuang je menteng mamot. Ewen basiak sama kilau bahuang bawi je nihau anake. Tinai Dawid te tantara bapangalaman je dia puji bamalem haya-hayak dengan oloh ayue.

⁹Mungkin metoh toh ie manyahokan intu huang ije goha atawa eka beken. Jadi, paribasa oloh ayun tuan inyarang awi Dawid, tuntang aton je matei, maka eweh bewei je mahining taloh te kareh hamauh je oloh ayun Absalom jari impakalah.

¹⁰Oloh je paling bahanyi tuntang menteng mamot sama kilau singa, mahin pasti kareh mikeh. Awi uras oloh Israel katawan je bapa tuan te iete pahlawan. Oloh ayue te kare pejuang je menteng mamot.

¹¹Awi te nasehatku kalotoh: mumpong hapus Israel bara hapus lewu, sampai samandiaie sama kilau baras intu saran tasik. Palus tuan kabuat je mamimpin ewen maju batampur.

¹²Itah kareh manyondau Dawid huang kueh bewei ie aton. Itah manyarang ie helo bara ie katawan taloh je manjadi. Jaton je tau liwus, aloh ie atawa oloh ayue.

¹³Amon ie hadari akan ije lewu, hapus rayat itah kareh manduan tali tuntang mihir lewu te[48] palus mampanjatoe akan huang janah je pangkatokepe. Ije batu kareh mahin jaton je tapalihi intu hunjun bukit te.”

¹⁴Mahining auh te Absalom tuntang hapus oloh Israel hamauh, “Nasehat Husai labih bahalap bara nasehat Ahitopel.” Punae, TUHAN jari manukas mambalang nasihat Ahitopel je bahalap te, mangat Absalom buah calaka.

¹⁵Limbah te Husai malapor akan Imam Sadok tuntang Imam Abyatar tahiu nasihat Ahitopel tuntang nasihat ayue kabuat akan Absalom dengan kare pemimpin Israel.

¹⁶Koan Husai, “Gulong sanan akan Dawid mangat ela baramalem intu eka dimpah sungei hong padang pasir. Ie musti jeleng dimpah Sungei Yordan. Amon dia, ie tuntang hapus pasukae kareh impahancor.”

¹⁷Pandehan te kea Yonatan anak Abyatar tuntang Ahimaas anak Sadok metoh mentai tokep tahasak En-Rogel, intu saran lewu Yerusalem. Ewen dia bahanyi tame lewu awi mikeh gitan oloh. Sama kilau bahut ije biti jipen bawi manyampai akan ewen peteh je musti ilapor akan Raja Dawid.

¹⁸Tapi sinde te ije biti anak hatue tabarong mite ewen, tuntang mansanae akan Absalom. Jadi ewen capa-capat haguet tuntang manyahokan intu human ije biti oloh lewu Bahurim. Tokep huma te aton kalin danum tuntang ewen tame akan huange.

¹⁹Sawan tempon huma te mambirang ije kalambar benang intu hunjun rumbak kalin danum te tuntang manawor gandom intu hunjue, mawi kalin danum te dia gitan.

²⁰Kare oloh sarohan Absalom dumah akan huma te tuntang misek dengan oloh bawi endau, “Hong kueh Ahimaas tuntang Yonatan?” “Ewen harun ih dimpah sungei,” tombah ie. Ewen manggau due pemuda te tapi dia sondau, ewen palus buli akan Yerusalem.

²¹Ahimaas tuntang Yonatan balua bara kalin danum te, palus kaje-kajeng manyondau Raja Dawid tuntang malapor uras taloh te. Koan ewen, “Ahitopel manenga nasehat uka manyarang raja. Keleh haguet toh kea dimpah sungei toh.”

²²Palus Dawid dengan oloh ayue dimpah Sungei Yordan, tuntang metoh sampai intu dipah andau jari handak sawah.

²³Katika Ahitopel haratie je nasehat ayue dia inumon, ie mangkepan lapik pondok kalidaie palus buli akan lewue kabuat. Limbah mampajadi kare urusae ie manggantong arepe, palus ingubur huang kuburan keluargae.

²⁴Dawid jari sampai akan lewu Mahanaim metoh Absalom dimpah Sungei Yordan, impahayak awi kare oloh Israel. (

²⁵Absalom jari mangkat Amasa akan pamimpin pasukan mangganti Yoab, Amasa anak Yitra oloh Ismael;[49] indue bagare Abigail anak Nahas iete betau Seruya indu Yoab).

²⁶Absalom tuntang oloh ayue mampendeng kemah intu tanah Gilead.

²⁷Metoh Dawid sampai intu Mahanaim, ie inyambut awi Sobi anak Nahas bara lewu Raba intu Amon, tuntang awi Mahkir anak Amiel bara Lodebar tuntang awi Barsilai bara Rogelim intu Gilead.

²⁸Ewen mimbit mangkok, rinjing tuntang tilam akan Dawid tuntang oloh ayue. Ewen mimbit kea gandom, jelei, tepong, gandom basehei, saretak bahandang, saretak bahandang je hai, mado, keju, mantega tuntang pire-pire kongan tabiri. Ewen katawan je Dawid tuntang oloh ayue metoh balau, teah belai tuntang heka awi pangguet intu padang pasir.