Read Ngaju 2 SAMUEL 19 Bible Online

2 SAMUEL 19 - Ngaju bible

2 SAMUEL 19

¹Akan Yoab insanan je Dawid manangis tuntang manatum akan Absalom.

²Maka kamanang andau te hobah manjadi kapehen atei akan hapus tantara Dawid awi ewen mahining je raja manangis anake.

³Hayak suni-suni ewen haluli akan lewu, sama kilau tantara je mahamen awi hadari bara parang.

⁴Raja manyandurong baue tuntang manangis hai auhe, “Anakku! Anakku Absalom! Absalom anakku!”

⁵Yoab haguet manaharep raja tuntang hamauh, “Andau toh raja mampahawen oloh ayun raja, padahal ewen te je jari manyalamat hambaruan raja, hambaruan kare anak raja, sawan tuntang gundik raja.

⁶Raja sinta kare oloh je basingi dengan raja, tapi raja basingi kare oloh je sinta raja! Dengan tarang raja mamparahan je kare pangkalima tuntang kare tantara raja samasinde jaton rimae akan raja. Malengkan ampie raja kareh paham sanang paribasa andau toh Absalom magon belom tuntang ikei uras matei!

⁷Keleh raja harikas tuntang haguet akan luar uka mampong atei oloh ayun raja. Aku sumpah tagal TUHAN, amon raja dia balua manyondau ewen, maka alem toh kea ije mahin jaton kareh je maku mampahayak raja. Jete kareh kilau calaka je paling hai je ingkeme raja hapus pambelom.”

⁸Limbah te raja harikas tuntang haguet balua, palus mondok tokep lawang. Oloh ayue mahining je ie aton intu hete palus ewen dumah manaharep. Pandehan te pasukan Israel jari hadari tuntang buli akan genep human ayu-ayue.

⁹Intu marak hapus bangsa Israel lembut kalahin pander. Koan ewen, “Raja Dawid jari manyalamat itah bara oloh Pilistin tuntang malapas itah bara kare musoh je beken. Tapi toh ie jari hadari bara Absalom tuntang malihi lewu toh.

¹⁰Absalom ilantik itah jadi raja, tapi toh ie matei huang parang. Mbuhen jaton ije biti je manggau jalan uka mimbit Raja Dawid haluli?”

¹¹Kare auh te sampai kea akan Raja Dawid.[50] Awi te ie manyoho Imam Sadok tuntang Imam Abyatar misek dengan kare pamimpin Yuda kalotoh, “Mbuhen keton je pangkarahiae indu manambang tuntang mampahayak raja haluli akan istana?

¹²En dia keton tundah paharingku tuntang kola jalahangku? Mastahel keton je pangkarahiae balaku mangat aku buli?”

¹³Dawid kea manyoho ewen mansanan akan Amasa kalotoh, “En dia ikau kolangku? Nampara bara katika toh aku mangkat ikau jadi pangkalima mangganti Yoab. Keleh Hatalla mampatei aku amon taloh te dia ilalusku!”

¹⁴Kalote Dawid bahasil manduan atei oloh Yuda, sampai ewen mangirim peteh akan raja mangat haluli akan istana dengan uras kare pagawaie.

¹⁵Palus raja haguet tuntang sampai intu Sungei Yordan. Pandehan te kare oloh Yuda jari sampai akan Gilgal uka manduan raja tuntang mampahayak ie dimpah sungei te.

¹⁶ Katika te Simei anak Benyamin kaje-kajeng bara Bahurim akan Yordan manyondau Raja Dawid.

¹⁷Hayak dengae aton sakoyan biti suku Benyamin. Tuntang Siba, pelayan keluarga Saul, dumah kea dengan lime walas anak hatue tuntang due puluh pelayan. Ewen sampai Yordan helo bara raja.

¹⁸Ewen mandohop keluarga raja dimpah[51] tuntang malalus uras taloh je inyoho raja akan ewen. Metoh raja handak dimpah sungei, Simei sontop intu taharepe tuntang hamauh,

¹⁹“Aku balaku, keleh raja dia mitong aku tetep basala. Keleh raja mangalapean taloh je iawiku hong andau raja malihi Yerusalem.

²⁰Aku jari hobah je aku jari mawi dosa; tuntang awi te, hong marak kare suku je melai intu tanah utara aku ih je solake dumah manambang raja hong andau toh.”

²¹Mahining te Abisai anak Soraya hamauh, “Simei jari patut ihukum matei awi ie mayapa raja je jari intih TUHAN.”

²²Tapi Dawid hamauh dengan Abisai tuntang Yoab kakae. “Ela omba campur. Mbuhen keton manyusah aku? Andau toh aku jadi raja tinai akan Israel, tuntang dia tau aton oloh Israel je ihukum matei.”

²³Limbah te raja mawi sumpah dengan Simei, “Aku manjamin je ikau dia akan ihukum matei.”

²⁴ Kea Mepiboset eson Saul, dumah uka omba manambang raja. Ie dia menyau paie, dia manetek janggute, tuntang dia mampukan pakaiae bara katika raja Dawid malihi Yerusalem sampai ie haluli dengan salamat.

²⁵Katika Mepiboset dumah bara[52] Yerusalem akan manambang raja, raja palus hamauh dengae, “Mepiboset, mbuhen ikau dia omba dengangku metoh te?”

²⁶Tombah ie, “Raja katawan aku toh batimpang. Aku manyoho pelayan uka manatap kalidai je tau inongkang uka aku omba raja. Tapi ihianat awi palayan te.

²⁷Aku imapa haream taharep raja. Tapi raja sama kilau malekat Hatalla. Awi te lalus taloh je ingkeme Tuangku bahalap.

²⁸Hapus keluarga bapaku patut ihukum matei awi raja, tapi aku toh jari inyoho raja omba kuman intu istana. Toh aku dia bahanyi tinai balaku taloh en-en bara raja.”

²⁹Raja tombah, “Dia perlu ikau mansanan en-en tinai. Aku jari manukas uka manenga hapus panatau Saul akam tuntang akan Siba.”

³⁰Palus tombah Mepiboset, “Nauhe Siba manduan urase. Aku jari mangkeme sukop awi raja jari buli dengan salamat.”

³¹ Kea Barsilai oloh Gilead te dumah bara Rogelim uka mampahayak raja dimpah Sungei Yordan.

³²Barsilai jari bakas toto, umure jari hanya puluh nyelo. Ie tatau toto, tuntang katahin raja melai hong Naharaim bihin, Barsilai kea je manyadia panginan akan raja.

³³Raja hamauh dengae, “Keleh omba aku akan Yerusalem, kareh aku manyadia hapus kaperluam intu hete.”

³⁴Tapi Barsilai tombah, “Aku dia akan belom tahi hindai. Awi te akan en aku omba dengan raja akan Yerusalem?

³⁵Umurku jari hanya puluh nyelo. Jaton tinai je tau manenga kasanang akangku. Aku dia olih tinai mangkeme kamangat taloh je kinan atawa taloh je ihopku. Aku dia tau tinai mahining auh oloh manyanyi. Aku kareh baya mambehat raja.

³⁶Aku dia patut manarima upah kahain te. Aku baya handak mampahayak raja, pire-pire kaingkang ih bara dipah Sungei Yordan.

³⁷Limbah te nauhe aku buli akan huma tuntang matei tokep kubur oloh bakasku, tapi toh ie anakku Kinham. Soho ie mampahayak raja tuntang lalus akae taloh je inirok raja bahalap.”

³⁸Raja tombah, “Kinham kareh iimbitku tuntang iurusku sama kilau je ingahandak awim; tuntang uras je ilakum dengangku kareh inggenepku.”

³⁹Limbah te Dawid tuntang hapus oloh ayue dimpah Sungei Yordan. Palus Dawid manyium Barsilai tuntang manabe ie. Limbah te Barsilai buli akan humae.

⁴⁰Hapus pasukan Yuda tuntang saparo bara pasukan Isarel mampahayak raja dimpah sungei, limbah te raja palus akan Gilgal, tuntang Kinham omba ie.

⁴¹Limbah te uras oloh Israel dumah manaharep raja tuntang hamauh dengae, “Raja, mbuhen kare paharin ikei oloh Yuda te mangira ewen ih je tempon hak akan manduan tuntang manjaga raja hayak hapus keluarga tuntang oloh ayun raja dimpah Sungei Yordan?”

⁴²Palus oloh Yuda tombah, “Tantu bewei, awi raja te kolan ikei. Mbuhen keton sangi-sangit? En kaperluan ikei inaggong awi raja atawa jari inengae hadiah akan ikei?”

⁴³Oloh Israel tombah, “Hak ikei akan raja sapuluh lipet labih hai bara hak keton. Mbuhen keton mitong ikei mahian? Ela kalapean je ikei toh je sola-solake mawi usul uka mimbit raja haluli!” Tapi oloh Yuda labih karas bara oloh Israel tuntang dia maku kalah.