Read Ngaju 2 SAMUEL 2 Bible Online

2 SAMUEL 2 - Ngaju bible

2 SAMUEL 2

¹Limbah te Dawid misek TUHAN, “En TUHAN nahuang aku haguet manguasa ije bara kare kota intu Yuda?” “Yoh,” Tombah TUHAN. “Kota je kueh?” pisek Dawid. “Hebron,” Tombah TUHAN.

² Palus Dawid haguet akan Hebron hayak dengan due sawae; Ahinoam bawin oloh Yisreel, tuntang Abigail balon Nabal iete bawin oloh Karmel.

³Kalote kea anak buah ayue dengan genep keluarga ewen uras omba Dawid. Ewen balalu manetep intu Hebron tuntang eka hakalilinge.

⁴ Limbah te kare oloh Yuda dumah akan Hebron, tuntang malantik Dawid jadi raja Yuda. Metoh Dawid mahining je kare oloh Yabesh hong Gilead jari mangubur hantun Saul,

⁵ie mangirim sarohan akan hete tuntang manyampai peteh, “Keleh TUHAN mamberkat keton, awi keton jari mamparahan kaketep keton dengan rajan keton awi mangubur hantue.

⁶Tagal te, keleh TUHAN mamparahan sintan Aie tuntang kaketep Aie akan keton. Aku kea kareh mawi keton dengan bahalap awi gawin keton te.

⁷Paabas atei keton tuntang awi arep keton kilau pahlawan! Saul, rajan keton puna jari matei, tapi kare oloh Yuda jari malantik aku jadi rajan ewen.”

⁸Pangkalima tantara Saul, iete Abner anak Ner, jari hadari haya-hayak Isboset anak Saul, akan Mahanaim intu dipah Sungei Yordan.

⁹Intu hete Abner mangkat Isboset jadi raja akan kare tanah Gilead, Asuri,[2] Yesreel, Epraim tuntang Benyamin, akan hapus Israel haream.

¹⁰Umur Isboset epat puluh nyelo metoh ie iangkat jadi raja akan Israel, tuntang ie marentah due nyelo katahie. Tapi suku Yuda tetep eter dengan Dawid,

¹¹tuntang Dawid marentah intu Hebron uju satengah nyelo katahie.

¹²Sinde andau Abner haguet bara Mahanaim akan lewu Gibeon, impahayak awi oloh ayun Isboset.

¹³Kea Yoab (indue bagare Seruya), hayak oloh ayun Dawid manintu lewu te. Kadadue baris je hakalawan te hataharep intu talaga Gibeon. Abner tuntang baris ayue intu dipah hila hetoh, Yoab tuntang baris ayue intu dipah hila kanih.

¹⁴Palus Abner hamauh dengan Yoab, “Ayo, itah manyoho oloh ayun itah batanding!” “Ayo,” tombah Yoab.

¹⁵Balalu miar due walas biti bara suku Benyamin je mawakil Isboset, tuntang due walas bara oloh ayun Dawid.

¹⁶Gagenep bitin ewen hasintak balau tuntang hasodok kanain musohe, sampai ewen matei haya-hayak. Tagal te eka te inyewut “Tanan Padang.”

¹⁷Limbah te lembut parang je paham, tuntang Abner hayak tantara Israel impakalah awi oloh ayun Dawid.

¹⁸Telo-telo biti anak Seruya aton intu hete, iete Yoab, Abisai tuntang Asael. Asael darie capat bara karahau.

¹⁹Ie mangguong Abner raju-rajur.

²⁰Abner tampaliau akan likut tuntang misek, “En ikau Asael?” “Yoh,” panombahe.

²¹“Ela manggoang aku!” Koan Abner. “Coba singkap ije bara tantara te tuntang duan sanjatae!” Tapi Asael magon kea manggoang ie.

²²Sinde tinai Abner hamauh dengae, “Ela manggoang aku! Kareh tarapaksa ikau impateiku. Jadi, kilen aku tau manampayah baun Yoab kakam te?”

²³Metoh Asael tetep dia maku tende, Abner mambelas lunjue akan likut,[3] tuntang buah kanain Asael sampai lunju te tembus akan likute. Asael balihang tuntang matei intu eka te kea. Uras oloh je dumah akan eka ie halelek te, tende intu hete.

²⁴Tapi Yoab tuntang Abisai marajur pangguete talih Abner. Metoh matanandau belep, ewen sampai intu Bukit Ama, je aton intu hila timor Giah, manintu Padang pasir Gibeon.

²⁵Intu hete kare oloh bara suku Benyamin hinje tinai dengan Abner. Ewen mator barisan ewen intu tantan ije bukit.

²⁶Bara hete Abner mantehau Yoab, “En musti itah parang kalahi sampai katatahie? En ikau dia harati je parang toh baya mimbit taloh je bapait? Ikei toh paharim ije bangsa. Kilen katahie hindai ikau handak mentai sahelo bara ikau marentah anak buahm uka terai manggoang ikei?”

²⁷Yoab tombah, “Tagal Hatalla je belom, jaka ikau dia nampara hakotak, pasti anak buahku palus manggoang sampai hanjewu jewu.”

²⁸Palus Yoab mahimon tarompet kilau tanda akan oloh ayue terai manggoang oloh Israel, balalu parang te tende.

²⁹Abner tuntang oloh ayue ije ale-alem babaris mahalau Janah Yordan, palus dimpah Sungei Yordan. Limbah ewen tetep mananjong hapus andau limbah te, ewen sampai akan Mahanaim.

³⁰Limbah Yoab tende manggoang Abner, ie mumpong uras anak buahe. Beken bara Asael ampie telo walas bara ewen nihau.

³¹Oloh ayun Dawid jari mampatei 360 biti pasukan Abner bara suku Benyamin.

³²Limbah te Yoab tuntang oloh ayue manggatang hantun Asael tuntang mangubure intu huang kubur kaluargae intu Betlehem. Palus ewen mananjong ije ale-alem tuntang sampai Hebron tampalawei.