Read Ngaju 2 SAMUEL 20 Bible Online

2 SAMUEL 20 - Ngaju bible

2 SAMUEL 20

¹ Intu lewu Gilgal aton ije biti pangacau je arae Seba. Ie anak Bikri bara suku Banyamin. Metoh barisan Dawid dumah Seba mahimon tarompet tuntang mangkariak, “Itah jaton hubungan dengan Dawid. Kanduen itah omba ie? O oloh Israel, ayo itah buli!”

²Palus kare oloh Israel te haguet malihi Dawid tuntang omba Seba. Tapi kare oloh Yuda tetep baketep tuntang mampahayak Dawid bara Sungei Yordan sampai akan Yerusalem.

³ Limbah Dawid sampai hong istanae intu Yerusalem, sapuluh biti gundik je ilihi akan manunggu istana, inae hong huma je injaga awi pangawal. Kaperluan ewen inyadia sukop, tapi Dawid dia puji batiroh tinai dengan ewen. Ewen te ingowo tuntang pambelom ewen sama kilau balo sampai matei.

⁴Raja marentah Amasa, “Keleh mamumpong oloh Yuda, tuntang haluli akan hetoh hayak ewen hong telo andau.”

⁵Palus Amasa haguet mamumpong ewen, tapi ie dia haluli hong katika je inukas raja.

⁶Limbah te raja hamauh dengan Abisai, “Seba te kareh labih manyusah itah bara Absalom. Awi te imbit oloh ayungku tuntang goang ie, mangat ela sampai ie manguasa kare lewu je badinding batu, tuntang tau hadari bara itah.”

⁷Maka hong penda pimpinan Abisai, pasukan Yoab tuntang pasukan pangawal pribadi raja dengan uras kare tantara je beken haguet bara Yerusalem manggoang Seba.

⁸Metoh ewen sampai intu batu hai hong Gibeon, Amasa dumah manyondau ewen, Yoab metoh te bapakaian parang dengan padang bakumpang je imeteng intu kahange. Metoh ie mananjong miar kumpang padang te lapas sampai padange batindar akan lenge sambile.

⁹Yoab hamauh dengan Amasa, “En kabar, sobat?” Sambil mimbing janggut Amasa dengan lenge gantaue kila-kilau handak manyium ie.

¹⁰Amasa dia mite aton padang intu lenge sambil Yoab. Salenga Yoab manusok padang te akan kanain Amasa, sampai bajakah kanaie kasaburan akan petak. Ie matei katika te kea, sampai Yoab dia perlu manyodoke tinai. Palus Yoab tuntang Abisai andie tarus manggoang Seba.

¹¹Ije biti tantara Yoab mendeng tokep hantun Amasa tuntang mangkariak, “Eweh je mamihak Yoab tuntang Dawid, tuntut Yoab!”

¹²Hantun Amasa je mandoi daha te halelek intu bentok jalan. Prajurit Yoab endau mite je uras oloh je mahalau tende intu hete. Tagal te ie mihir hantu te akan tana tuntang manutupe hapan kahowut.

¹³Limbah hantu te inindar bara jalan, uras oloh marajur jalanae manuntut Yoab uka manggoang Seba.

¹⁴Seba jari mahalau uras daerah bangsa Israel, palus sampai intu lewu Abel-Bet-Maakha inuntut awi uras anggota jalahan Bikri.[53]

¹⁵Oloh ayun Yoab mahining je Seba aton intu hete, palus mangapong lewu te. Ewen manuyok petak hakaliling dinding luar tuntang nampara mangali petak intu penda dinding te akan manderepe.

¹⁶Intu lewu te aton ije oloh bawi je pintar; ie mendeng intu hunjun dinding palus mangkariak, “Hining! Hining! Laku mangat Yoab dumah akan hetoh; aku handak bapander dengae.”

¹⁷Palus Yoab dumah tuntang oloh bawi te misek, “En Tuan toh Yoab?” “Yoh”, koae. Koan oloh bawi te, “Hining auhku toh, Tuan.” “Yoh, aku mahining” tombah Yoab.

¹⁸Koan oloh bawi te, “Bihin kare oloh biasa hamauh kalotoh, ‘Amon aku perlu pansanan, lius akan lewu Abel’ — tuntang jete je ilalus ewen.

¹⁹Kotan ikei Abel toh hai, ije bara lewu je paling damai tuntang baketep hong tanah Israel. Mbuhen Tuan handak mampalomose? En Tuan handak mamparusak petak ayun TUHAN?”

²⁰“Samasinde dia!” tombah Yoab, “aku samasinde dia handak marusake atawa mampahancor lewum!

²¹Tapi ije biti oloh je bagare Seba anak Bikri, je asale bara daerah je habukit hong Epraim, jari mambarontak taharep raja Dawid. Sarah ie, palus aku kareh haguet bara lewu toh.” Koan oloh bawi te, “Takolok oloh te kareh imedak ikei akan Tuan bara dinding toh.”

²²Palus ie haguet tuntang dengan kapintare manyampai kanahuange akan oloh lewu te. Limbah te takolok Seba inetek tuntang injakah akan Yoab. Limbah te Yoab mahimon tarompet tuntang oloh ayue malihi lewu te palus buli akan genep humae. Yoab kea buli akan Yerusalem manaharep raja.

²³Jetoh kare pagawai hai je iangkat awi Dawid: Pangkalima hapus tantara Israel: Yoab. pamimpin pasukan pangawal pribadi Dawid: Benaya anak Yoyada.

²⁴pamimpin akan gawi paksa: Adoram. Bendahara karajaan: Yosapat anak Ahilud.

²⁵Sekretaris karajaan: Seya Imam: Sadok tuntang Abyatar.

²⁶Imam hong istana: Ira bara lewu Yair.