Read Ngaju 2 SAMUEL 21 Bible Online

2 SAMUEL 21 - Ngaju bible

2 SAMUEL 21

¹Intu wayah Dawid marentah, lembut lau paham katahin telo nyelo. Palus Dawid balaku patunjok TUHAN tahiu taloh te. Ie hamauh, “Lau te manjadi awi kasalan Saul tuntang keluargae, awi ewen jari mampatei oloh Gibeon.”

² (Kare oloh Gibeon dia oloh Israel; ewen tame baris oloh je isut bitie ain oloh Amori. Kare oloh Israel jari bajanji handak mangalindong ewen; tapi Saul jari manggau jalan mampalomos ewen, awi Saul manirok kaperluan oloh Israel tuntang Yuda). Palus Dawid mantehau kare oloh Gibeon te;

³Ie misek ewen, “En je tau iawiku akan keton? Aku nahuang manewus kasalan je jari iawi akan keton mangat keton mamberakat ungkup TUHAN.”

⁴Tombah ewen, “Pakara ikei dengan Saul tuntang keluargae dia tau indamai dengan perak atawa amas. Tapi ikei kea dia nahuang mampatei aloh ije oloh je bara bangsa Isarel.” Palus koan Dawid, “Amon kalote, en je ingahandak keton aku mawie?”

⁵Tombah ewen, “Saul raja paintih TUHAN nahuang mampatei ikei urase sampai ikei lepah bara hapus Israel.

⁶Awi te, sarah uju biti bara turonae je hatue, mangat ikei manggantonge intu taharep TUHAN hong Gibea, lewun Raja Saul kabuat.” Tombah raja, “Yoh, ewen kareh inyarahku.”

⁷ Tapi awi Dawid tuntang Yonatan jari basumpah sama arepe, Dawid dia manyarah Mepiboset anak Yonatan.

⁸ Je induan awi Dawid iete Armoni tuntang Mepiboset, iete due anak Saul je inakan awi Rispa anak Aya; kea lime biti anak Merab anak bawi ain Saul, kare anak te inakan bara pangawin Merab dengan Adriel anak Barsilai, oloh Mehola te.

⁹Ewen inyarah akan kare oloh Gibeon; palus uju biti te matei haya-hayak ingkoak intu hunjun bukit hong taharep TUHAN. Hukuman matei te ilalus hong lawin wayah dawen kayu manyuloh, metoh jelei nampara inggetem.

¹⁰Palus Rispa, gundik Saul, mambirang benang guni akae kabuat intu hunjun batu eka kare hantu te ingujuh. Rispa dia haguet bara hete bara tamparan wayah getem sampai panumah ujan hong wayah pangujan. Dia inalua kare hantu te inggulei awi kare burong amon handau atawa awi kare meto basiak amon hamalem.

¹¹Metoh insanan akan Dawid taloh je ilalus awi Rispa,

¹² ie haguet manduan kare tulang Saul tuntang Yonatan bara kare oloh lewu Yabes hong Gilead. (Kare oloh te jari manduan kare tulang bara alun-alun intu lewu Beth-San, eka oloh Pilistin mangkoak kare hantu te limbah mampakalah Saul intu bukit Gilboa.)

¹³Kare tulang Saul tuntang Yonatan te imbit bara hete; palus imumponge kea kare tulang uju biti oloh je ingkoak te.

¹⁴Limbah te kare tulang Saul tuntang Yonatan dengan kare tulang uju biti oloh te ingubur intu huang kubur Kis bapa Saul intu Sela hong tanah Banyamin. Limbah urase ilalus tumon parentah raja, Hatalla manarima lakudoan ewen akan lewu te.

¹⁵Marak oloh Filistin dengan Israel lembut tinai parang. Dawid tuntang oloh ayue haguet parang kalahi malawan oloh Pilistin. Huang parang te Dawid heka.

¹⁶Aton dumah ije biti raksasa je arae Yisbi-Benob. Lunjue inampa bara tambaga je ehate kakira telo satengah kilogram. Ie kea manangking padang je taheta, tuntang ie percaya tau mampatei Dawid.

¹⁷Tapi Abisai anak Seruya dumah mandohop Dawid. Inyarange raksasa te tuntang impateie. Limbah te oloh ayun Dawid balaku mangat Dawid bajanji dia kareh omba tinai huang parang. “Raja te eka kaharap Israel, ela sampai ikei nihau Raja,” koan ewen.

¹⁸Lembut tinai parang malawan oloh Pilistin intu Gob. Huang parang te Sibkhai oloh Husa mampatei ije raksasa arae Sap.

¹⁹Huang parang beken, dengan oloh Pilistin intu Gob, Elhanan anak Yair[54] bara Betlehem mampakalah Goliat bara Gat. Tantahan lunjun Goliat te kahain buntis.

²⁰Lembut tinai parang, oloh Pilistin intu Gat. Intu hete aton ije raksasa je rajin toto baparang. Ie aton jahawen tunjok hong genep lengee tuntang jahawen kea tunjok paie hasansila.

²¹Ie manawah oloh Israel, tuntang awi te ie impatei awi Yonatan anak Simea kaka Dawid.

²²Epat biti je impatei awi Dawid tuntang pasukae te, iete turonan raksasa intu Gat.